ಬೆಂಗಳೂರು ಕಂಬಳಕ್ಕೆ ಆಗಮಿಸಿ ತುಳುವಿನಲ್ಲೇ ಮಾತಾಡಿದ ನಟಿ ಪೂಜಾ ಹೆಗ್ಡೆ..! – ಮುಂದಿನ ವರ್ಷವೂ ಬರ್ತೇನೆಂದ ನಗುಮೊಗದ ಚೆಲುವೆ..

ನ್ಯೂಸ್ ಆ್ಯರೋ : ‘ಕಂಬಳ’ ಎನ್ನುವಂತದ್ದು ನಮ್ಮ ಕರಾವಳಿ ಮಣ್ಣಿನ ಜನಪ್ರಿಯ ಕ್ರೀಡೆ.‌ಈ ಕ್ರೀಡೆಯ ಬಗ್ಗೆ ನಡೆದ ವಿರೋಧಗಳೆಷ್ಟು, ನಡೆಸಿದ ಹೋರಾಟ, ಪ್ರತಿಭಟನೆಗಳೆಷ್ಟೊ. ಕೊನೆಗೂ ತೀರ್ಪು ಮಾತ್ರ ಕಂಬಳದ ಕಡೆಗೇ ಹಸಿರು ನಿಶಾನೆ ತೋರಿಸಿತ್ತು. ಇನ್ನೇನೋ ಕಂಬಳದ ಸೀಸನ್ ಶುರುವಾಗಿಬಿಟ್ಟಿದೆ. ನಮ್ಮ ಮಣ್ಣಿನ ಸೊಗಡಿನ ಈ ಕ್ರೀಡೆಯನ್ನು ಸಿಲಿಕಾನ್ ಸಿಟಿಯಲ್ಲೂ ನಡೆಸುವಲ್ಲಿ ಕಂಬಳ ಸಂಘಟಕರು ಯಶಸ್ವಿಯಾದ್ರು. ಈ ಕಂಬಳ ಕಾರ್ಯಕ್ರಮಕ್ಕೆ ಅನೇಕ ಸಿನಿಮಾ ಸೆಲೆಬ್ರಿಟಿಗಳು ಕೂಡಾ ಭಾಗವಹಿಸಿದ್ರು.

ಅರಮನೆ ಮೈದಾನದಲ್ಲಿ ಬೆಂಗಳೂರು ಕಂಬಳ ನಡೆಯುತ್ತಿದ್ದು ನಿನ್ನೆ 2ನೇ ದಿನಕ್ಕೆ ಕಾಲಿಟ್ಟಿತ್ತು. ಹಲವಾರು ನಟ-ನಟಿಯರು ಕಾರ್ಯಕ್ರಮಕ್ಕೆ ಆಗಮಿಸಿದ್ದರು. ಬಾಲಿವುಡ್​ ನಟಿ ಪೂಜಾ ಹೆಗ್ಡೆ ಕೂಡ ಕಾರ್ಯಕ್ರಮಕ್ಕೆ ಆಗಮಿಸಿ ಚೆಂದಗಾಣಿಸಿಕೊಟ್ಟಿದ್ದಾರೆ.

ಕಂಬಳದ ವೇದಿಕೆ ಆಗಮನಿಸಿದ ನಟಿ ಪೂಜಾ ಹೆಗ್ಡೆ ನೆರೆದಿದ್ದ ವೀಕ್ಷಕರನ್ನು ಕುರಿತು ತುಳುವಿನಲ್ಲಿ ಮಾತನಾಡಿದ್ದಾರೆ. ‘ನಾನು ಮೊದಲ ಬಾರಿಗೆ ಕಂಬಳ ನೋಡ್ತಾ ಇದ್ದೇನೆ. ಪ್ರಕಾಶ್ ಅಣ್ಣ ಕರೆದಿದ್ದಕ್ಕೆ ಥ್ಯಾಂಕ್​, ನನ್ನ ಪ್ರೀತಿಯ ದೊಡ್ಡಪ್ಪ ಕೂಡ ಇದ್ದಾರೆ. ನಮ್ಮ ಒಂದು ಹೆಮ್ಮೆ ಇದು. ಕರ್ನಾಟಕದಿಂದ ವಿಶ್ವದಾದ್ಯಂತ ಹೋಗಬೇಕು. ಇದು ನಮ್ಮ ಸಂಸ್ಕೃತಿಯಲ್ಲಿ ಇದೆ.

ಈ ಪಂದ್ಯ ನೋಡಲು ಮಜವಾಗಿದೆ. ಥ್ಯಾಂಕ್​ ಯು ಸೋ ಮಚ್​. ಮುಂದಿನ ವರ್ಷ ಕೂಡ ಬರ್ತೇನೆ. ಇದಕ್ಕಿಂತ ದೊಡ್ಡದಾಗಿ ಕಾರ್ಯಕ್ರಮ ಆಗಲಿ’ ಎಂದಿದ್ದಾರೆ. ಬಳಿಕ ಕನ್ನಡದಲ್ಲಿ ಮಾತನಾಡಿದ
ನಟಿ ಪೂಜಾ ಹೆಗ್ಡೆ, ‘ಕನ್ನಡ ಸೊಲ್ಪ ಸೊಲ್ಪ ಬರ್ತದೆ. ನಾನು ಕನ್ನಡ ಕಲಿತಾ ಇದ್ದೇನೆ’ ಎಂದು ಹೇಳಿದ್ದಾರೆ. ​​

ಒಟ್ಟಾರೆಯಾಗಿ ನಮ್ಮ ಹೆಮ್ಮೆಯ ಜಲಕ್ರೀಡೆಗೆ ಸೆಲೆಬ್ರೆಟಿಗಳೂ ಸೇರಿದಂತೆ ಬೆಂಗಳೂರಿನ ಜನರೂ ಇಷ್ಟು ಬೆಂಬಲ ವ್ಯಕಪಡಿಸಿರುವುದು ಹೆಮ್ಮೆಯ ಸಂಗತಿ.