IPL FINAL 2023 : ವರುಣಾರ್ಭಟದಲ್ಲೇ ಕೊಚ್ಚಿ ಹೋಗುತ್ತಾ ಇಂದಿನ ಪಂದ್ಯ? – ಇಂದೂ ಕೂಡ ಮಳೆ ಬಂದ್ರೆ ಕಪ್ ಯಾರಿಗೆ?

ನ್ಯೂಸ್ ಆ್ಯರೋ‌ : ಎಲ್ಲಾ ಅಂದುಕೊಂಡಂತೆ ಆಗಿದ್ದರೆ ಐಪಿಎಲ್​ ಸೀಸನ್​ 16ರ ಚಾಂಪಿಯನ್​ ಯಾರು ಎನ್ನುವ ಮಿಲಿಯನ್ ಡಾಲರ್ ಪ್ರಶ್ನೆಗೆ ನಿನ್ನೆಯೇ ಉತ್ತರ ಸಿಗುತ್ತಿತ್ತು, ಲಕ್ಷಾಂತರ ಅಭಿಮಾನಿಗಳ ಕಾತುರಕ್ಕೆ ತೆರೆ ಬೀಳುತ್ತಿತ್ತು. ಆದರೆ ಮಳೆರಾಯ ರವಿವಾರದ ಫೈನಲ್ ಪಂದ್ಯಕ್ಕೆ ತಡೆಯೊಡ್ಡಿ ಕುತೂಹಲವನ್ನು ಇಂದಿಗೆ ಮುಂದೂಡಿದ್ದಾನೆ.

ಅಹಮದಾಬಾದ್​ನ ನರೇಂದ್ರ ಮೋದಿ ಮೈದಾನದಲ್ಲಿ ನಿನ್ನೆ (ಮೇ 28) ನಡೆಯಬೇಕಿದ್ದ ಗುಜರಾತ್​ ಸೂಪರ್​​ ಜೈಂಟ್ಸ್​ ಮತ್ತು ಚೆನ್ನೈ ಸೂಪರ್​ ಕಿಂಗ್ಸ್​​ ನಡುವಿನ ಪಂದ್ಯ ಮಳೆಯಿಂದ ರದ್ದಾಯಿತು. ಟಾಸ್​​ ಕೂಡ ಮಾಡಲಾಗದ ರೀತಿಯಲ್ಲಿ ಎಡೆಬಿಡದೇ ಸುರಿದ ಮಳೆ ಪಂದ್ಯವನ್ನೇ ಸ್ಥಗತಗೊಳಿಸಿತ್ತು. ಅಂಪೈರ್ಸ್​​​ ಕೊನೆಗೆ ಇಂದಿಗೆ ಪಂದ್ಯವನ್ನ ಮುಂದೂಡಿದರು.

ಸೂಪರ್ ಸಂಡೆ ಬದಲಿಗೆ ಸೂಪರ್ ಮಂಡೆ

ರಿಸರ್ವ್​ ಡೇ ಇದ್ದಿದ್ದಕ್ಕೆ ಇಂದಿಗೆ ಪಂದ್ಯ ಮುಂದೂಡಿಕೆಯಾಗಿದೆ. ಆದರೆ ಇವತ್ತು ಪಂದ್ಯ ನಡೆದೇ ಬಿಡುತ್ತೆ ಎಂದು ಖಚಿತವಾಗಿ ಹೇಳುವ ಹಾಗಿಲ್ಲ. ಯಾಕೆಂದರೆ ಇಂದೂ ಕೂಡ ನಿನ್ನೆಯ ಹಾಗೆ ಅನಿರೀಕ್ಷಿತವಾಗಿ ಮಳೆ ಬರುವ ಸಾಧ್ಯತೆ ಇದೆ.

ಏನಾಗಬಹುದು?

ಅಹಮದಾಬಾದ್​ನಲ್ಲಿ 38 ಡಿಗ್ರಿ ಸೆಲ್ಸಿಯಸ್​ನಿಂದ 26 ಡಿಗ್ರಿ ಸೆಲ್ಸಿಯಸ್​ ಉಷ್ಣತೆ ​ ಇರುವ ಸಾಧ್ಯತೆಯಿದ್ದು, ಶೇ. 53ರಷ್ಟು ಹ್ಯುಮಿಡಿಟಿ ಇರಲಿದೆ. ಪಂದ್ಯದ ವೇಳೆ ಮಳೆ ಬರುವ ಸಾಧ್ಯತೆ ಶೇ. 12ರಷ್ಟಿದೆ. ಹವಾಮಾನ ಇಲಾಖೆಯ ವರದಿ ​ ಪ್ರಕಾರ ಇಂದು ಮಳೆ ಬರುವ ಸಾಧ್ಯತೆ ಕಡಿಮೆ. ಹಾಗಂತ ಬರೋದೆ ಇಲ್ಲ ಹೇಳುವಂತಿಲ್ಲ. ಯಾಕೆಂದರೆ ರವಿವಾರ ಬೆಳಗ್ಗೆ ಕೂಡ ಅಹಮದಾಬಾದ್​​ನಲ್ಲಿ ಮಳೆ ಬರುವ ಸುಳಿವೇ ಇರಲಿಲ್ಲ. ಆದರೆ ಸಂಜೆ ಇದಕ್ಕಿದ್ದಂತೆ ಸುರಿದ ಮಳೆ ಇಂದಿಗೆ ಪಂದ್ಯವನ್ನೇ ಅಪೋಶನ ತೆಗೆದುಬಿಟ್ಟಿತು.

ಇಂದಿನ ದಿನದಾಟಕ್ಕೂ ಮಳೆ ಅಡ್ಡಿಪಡಿಸಿದರೆ ರಾತ್ರಿ 9.30ರವರೆಗೆ ಕಾದು ನೋಡುವ ತಂತ್ರವನ್ನು ಅಂಪೈರ್​​ಗಳು ಅನುಸರಿಸಲಿದ್ದಾರೆ. 9.30ರ ಒಳಗೆ ಪಂದ್ಯ ಆರಂಭವಾದರೆ ಯಾವುದೇ ಓವರ್​​ ಕಡಿತವಾಗಲ್ಲ. ಒಂದು ವೇಳೆ ರಾತ್ರಿ 9.30ರ ಬಳಿಕ ಪಂದ್ಯ ಆರಂಭವಾದರೆ ಓವರ್​ಗಳಲ್ಲಿ ಕಡಿತ ಮಾಡಲಾಗುತ್ತೆ. ಇನ್ನು ರಾತ್ರಿ 12 ಗಂಟೆಯ ಬಳಿಕ ಪಂದ್ಯಕ್ಕೆ ಮಳೆ ಅವಕಾಶ ಮಾಡಿಕೊಟ್ರೆ ತಲಾ 5 ಓವರ್​​ಗಳ ಆಟವನ್ನು ಆಡಿಸಲಾಗುತ್ತದೆ.

ಪಂದ್ಯ ರದ್ದಾದರೆ ಚಾಂಪಿಯನ್​ ಯಾರು?

ನಿನ್ನೆ ಸುರಿದಂತೆ ಇಂದೂ ಎಡೆ ಬಿಡದೇ ಮಳೆ ಸುರಿದರೆ ಲೀಗ್​ ಹಂತದಲ್ಲಿ ಅತಿ ಹೆಚ್ಚು ಗೆಲುವು ದಾಖಲಿಸಿದ ತಂಡಕ್ಕೆ ಟ್ರೋಫಿ ಒಲಿಯಲಿದೆ. ಚೆನ್ನೈಗಿಂತ ಲೀಗ್​ ಹಂತದಲ್ಲಿ ಗುಜರಾತ್​​ ತಂಡ 2 ಪಂದ್ಯ ಹೆಚ್ಚು ಗೆದ್ದಿದ್ದು, ಚಾಂಪಿಯನ್​ ಆಗಿ ಹೊರ ಹೊಮ್ಮಲಿದ್ದು, ತವರಿನ ಅಂಗಳದಲ್ಲಿ 2ನೇ ಟ್ರೋಫಿಗೆ ಮುತ್ತಿಕ್ಕಲಿದೆ.