ಸಮ್ಮತಿಯ ಸೆಕ್ಸ್ ವಯೋಮಿತಿ 18 ರಿಂದ 16ವರ್ಷಕ್ಕೆ ಇಳಿಕೆ – ಹೈಕೋರ್ಟ್ ನೀಡಿದ ತೀರ್ಪಿನ ಉದ್ದೇಶ ಏನ್ ಗೊತ್ತಾ?
- ರಾಷ್ಟ್ರೀಯ ಸುದ್ದಿ
- July 1, 2023
- No Comment
- 271
ನ್ಯೂಸ್ ಆ್ಯರೋ : ದೇಶದಾದ್ಯಂತ ಹೆಣ್ಣು ಮಕ್ಕಳ ಮೇಲೆ ಹಾಗೂ ಅಪ್ರಾಪ್ತರ ಮೇಲೆ ನಿರಂತರವಾಗಿ ಅತ್ಯಾಚಾರ, ಲೈಂಗಿಕ ದೌರ್ಜನ್ಯಗಳು ದಿನದಿಂದ ದಿನಕ್ಕೆ ಏರಿಕೆಯಾಗುತ್ತಲೇ ಇದೆ. ಈ ನಡುವೆ ಮಧ್ಯಪ್ರದೇಶ ಹೈಕೋರ್ಟಿನ (MP high court) ಗ್ವಾಲಿಯರ್ ಪೀಠವು ಪುರುಷ ಹಾಗೂ ಮಹಿಳೆಯ ನಡುವಿನ ಸಮ್ಮತಿಯ ಸೆಕ್ಸ್ ವಯೋಮಿತಿಯನ್ನು (Age Of Consent) 18 ರಿಂದ 16ಕ್ಕೆ ಇಳಿಸಿ ಕೇಂದ್ರ ಸರ್ಕಾರಕ್ಕೆ ಆದೇಶ ನೀಡಿದೆ. ಹೈಕೋರ್ಟ್ ಈ ನಿರ್ಧಾರಕ್ಕೆ ಬರಲು ಕಾರಣವೇನು? ಕೋರ್ಟ್ ತೀರ್ಪಿನಲ್ಲಿ ಏನಿದೆ? ಬನ್ನಿ ನೋಡೋಣ.
ಪ್ರಕರಣದ ಹಿನ್ನೆಲೆ
ಅತ್ಯಾಚಾರಕ್ಕೆ ಸಂಬಂಧಿಸಿದಂತೆ ಪ್ರಕರಣವೊಂದರ ವಿಚಾರಣೆ ವೇಳೆ ನ್ಯಾಯಮೂರ್ತಿ ದೀಪಕ್ ಅಗರ್ವಾಲ್ ಈ ಆದೇಶ ನೀಡಿದ್ದಾರೆ. ಮಧ್ಯಪ್ರದೇಶದ ಹಾರುಲ್ ಜಟವ್ ಎಂಬ ವ್ಯಕ್ತಿ 18 ವರ್ಷ ಪ್ರಾಯದ ಯುವತಿಯೊಂದಿಗೆ ಆಕೆಯ ಸಮ್ಮತಿಯ ಮೇರೆಗೆ ಲೈಂಗಿಕ ಕ್ರಿಯೆ ನಡೆಸಿದ್ದ. ಆದರೆ 2022 ಜುಲೈ ತಿಂಗಳಲ್ಲಿ ಆ ಯುವತಿ ರಾಹುಲ್ ಜಟವ್ ಮೇಲೆ ಪೋಕ್ಸೋ ಕಾಯಿದೆಯಡಿ ಪ್ರಕರಣ ದಾಖಲಿಸಿದ್ದಳು. ಆದರೆ ವಿಚಾರಣೆ ನಡೆಸಿದ ಹೈಕೋರ್ಟ್ ಆರೋಪಿಯು ನಿರ್ದೋಷಿ ಮತ್ತು ಆತನ ಮೇಲಿನ ಕೇಸ್ ಹಿಂತೆಗೆಯಲು ಪೊಲೀಸ್ ಠಾಣೆಗೆ ಆದೇಶ ನೀಡಿದೆ.
ಹೈಕೋರ್ಟ್ ಈ ತೀರ್ಪು ನೀಡಲು ಕಾರಣವೇನು?
ತನ್ನ ತೀರ್ಪಿನ ಬಗ್ಗೆ ಸ್ಪಷ್ಟನೆ ನೀಡಿದ ಹೈಕೋರ್ಟ್ ನ್ಯಾಯಮೂರ್ತಿ ದೀಪಕ್ ಅಗರ್ವಾಕ್, ‘ಸೋಶಿಯಲ್ ಮೀಡಿಯಾಗಳ ಮೂಲಕ ಪರಿಚಯವಾಗುವ ಹಾಗೂ ಪರಸ್ಪರ ಸಲುಗೆಯಿಂದ ವರ್ತಿಸುವ ಹುಡುಗ – ಹುಡುಗಿಯರು ವಯೋಸಹಜವಾಗಿ ಏರ್ಪಡುವ ತಮ್ಮ ಆಸೆಗಳನ್ನು, ಬೇಕು ಬೇಡಗಳನ್ನು ನಿರ್ಧರಿಸಿಕೊಳ್ಳುವಷ್ಟು ಅರ್ಹರಾಗಿರುತ್ತಾರೆ. 16ನೇ ವಯಸ್ಸು ತಲುಪುವ ವೇಳೆ ಸಹಜವಾಗಿಯೇ ಮಕ್ಕಳಲ್ಲಿ ಆ ಬೌದ್ಧಿಕತೆ ಬೆಳವಣಿಗೆಯಾಗಿರುತ್ತದೆ’ ಎಂದಿದ್ದಾರೆ.
ಮುಂದುವರೆದು, ‘ಈ ಹಿಂದೆ ಸಮ್ಮತಿಯ ಸೆಕ್ಸ್ ವಯೋಮಿತಿಯನ್ನು 18ವರ್ಷಕ್ಕೆ ಹೆಚ್ಚಿಸಲಾಗಿತ್ತು. ಇದು ಸಮಾಜದಲ್ಲಿ ಏರುಪೇರುಗಳನ್ನು ಸೃಷ್ಟಿಸುತ್ತದೆ. 16ನೇ ವಯಸ್ಸಿನ ನಂತರ ಸಹಜವಾಗಿ ಆ ಸಂಬಂಧ ಏರ್ಪಡುತ್ತದೆ. ಎಲ್ಲಾ ಪ್ರಕರಣಗಳಲ್ಲಿ ಹುಡುಗರನ್ನೇ ತಪ್ಪಿತಸ್ಥರು ಎನ್ನಲಾಗದು. ಕೆಲವು ಯುವತಿಯರು ದೈಹಿಕ ಸಂಬಂಧ ಬೆಳೆಸಿ ಕೊನೆಗೆ ಕಾಯ್ದೆಯನ್ನು ದುರುಪಯೋಗ ಮಾಡಿಕೊಳ್ಳುತ್ತಾರೆ. ಹೀಗಾಗಿ ಈ ಮಿತಿಯನ್ನು 16 ವರ್ಷಕ್ಕೆ ಇಳಿಸುವುದು ಸೂಕ್ತ. ಐಪಿಸಿ ಸೆಕ್ಷನ್ 375 ಇದನ್ನೇ ಹೇಳುತ್ತದೆ’ ಎಂದು ಅವರು ಅಭಿಪ್ರಾಯಪಟ್ಟರು.