ಕೇರಳದಲ್ಲಿಆಫ್ರಿಕನ್ ಹಂದಿಜ್ವರ ಪತ್ತೆ – ಫಾರ್ಮ್ ನಲ್ಲಿರುವ ಹಂದಿಗಳನ್ನು ಕೊಲ್ಲಲು ಆದೇಶ..!
- ರಾಷ್ಟ್ರೀಯ ಸುದ್ದಿ
- August 19, 2023
- No Comment
- 100
ನ್ಯೂಸ್ ಆ್ಯರೋ : ಕೇರಳದ ಕಣ್ಣೂರು ಜಿಲ್ಲೆಯ ಕಣಿಚಾರ್ ಪ್ರದೇಶದಲ್ಲಿ ಆಫ್ರಿಕನ್ ಹಂದಿಜ್ವರ ಪತ್ತೆಯಾಗಿದ್ದು, ಆತಂಕ ಮೂಡಿಸಿದೆ. ಈ ಹಿನ್ನೆಲೆಯಲ್ಲಿ 2 ಫಾರ್ಮ್ ಗಳಲ್ಲಿರುವ ಹಂದಿಗಳನ್ನು ಕೊಲ್ಲಲು ಜಿಲ್ಲಾಧಿಕಾರಿ ಆದೇಶ ಹೊರಡಿಸಿದ್ದಾರೆ.
ದೃಢಪಡಿಸಿದ ಅಧಿಕಾರಿಗಳು
ಶುಕ್ರವಾರ ಜಿಲ್ಲೆಯ ಮಲಯಂಪಾಡಿಯಲ್ಲಿರುವ ಫಾರ್ಮ್ ಒಂದರಲ್ಲಿ ಹಂದಿ ಜ್ವರ ಪತ್ತೆಯಾಗಿದ್ದನ್ನು ಪಶು ಸಂಗೋಪನೆ ಅಧಿಕಾರಿಗಳು ದೃಢಪಡಿಸಿದ್ದರು. ಇದಾದ ಬಳಿಕ 10 ಕಿ.ಮೀ. ದೂರದಲ್ಲಿರುವ ಇನ್ನೊಂದು ಫಾರ್ಮ್ ನಲ್ಲಿರುವ ಹಂದಿಗಳನ್ನೂ ಸಂಶಯದ ಹಿನ್ನಲೆಯಲ್ಲಿ ಕೊಲ್ಲಲು ಸೂಚಿಸಲಾಗಿದೆ.
ಹಂದಿ ಸಾಕಾಣಿಕೆ ಕೇಂದ್ರದ ಸುತ್ತಲಿನ 1 ಕಿ.ಮೀ. ಅನ್ನು ಸೋಂಕು ಪತ್ತೆಯಾದ ಪ್ರದೇಶವೆಂದೂ, 10 ಕಿ.ಮೀ.ಯನ್ನು ರೋಗ ಕಣ್ಗಾವಲು ವಲಯ ಎಂದೂ ಘೋಷಿಸಲಾಗಿದೆ. ಇಲ್ಲಿ ಹಂದಿ ಮಾಂಸ ಮಾರಾಟ, ವಿತರಣೆ ನಿಷೇಧಿಸಲಾಗಿದೆ.
ಈ ನಿಷೇಧ 3 ತಿಂಗಳವರೆಗೆ ಮುಂದುವರಿಯಲಿದೆ. ಸೋಂಕಿಗೆ ಒಳಗಾಗಿರುವ ಹಂದಿಗಳನ್ನು ಬೇರೆ ಫಾರ್ಮ್ ಗಳಿಂದ ಖರೀದಿಸಲಾಗಿತ್ತೇ ಎನ್ನುವುದನ್ನು ಪರಿಶೀಲಿಸಲು ಜಿಲ್ಲಾಧಿಕಾರಿ ಸೂಚಿಸಿದ್ದಾರೆ.