Fact Check : ಮದುವೆ ಸಂದರ್ಭದಲ್ಲಿ ಮಗಳಿಗೆ 70 ಕೆಜಿ ಚಿನ್ನ ನೀಡಿದ ತಂದೆ – ವೈರಲ್ ಸುದ್ದಿಯ ಅಸಲಿಯತ್ತೇನು?

ನ್ಯೂಸ್ ಆ್ಯರೋ‌ : ಕೆಲವೊಂದು ಮದುವೆ ಸಮಾರಂಭಗಳು ಜನರ ಗಮನ ಸೆಳೆಯುತ್ತವೆ. ಅಂತಹ ಅದ್ಧೂರಿ ವಿವಾಹವೊಂದು ಈಗ ವೈರಲ್ ಆಗಿ ಇಂಟರ್ ನೆಟ್ ನಲ್ಲಿ ಧೂಳೆಬ್ಬಿಸಿದೆ. ದುಬೈಯಲ್ಲಿ ನಡೆದ ಪಾಕಿಸ್ತಾನಿ ಕುಟುಂಬದ ಮದುವೆ ಇದಾಗಿದ್ದು, ವಧುವಿನ ತಂದೆ 70 ಕೆಜಿ ಚಿನ್ನವನ್ನು ವಧುವಿಗೆ ಉಡುಗೊರೆಯಾಗಿ ನೀಡಿ ಅಚ್ಚರಿ ಮೂಡಿಸಿದ್ದಾರೆ.

ವೈರಲ್

ಮದುವೆ ಸಂದರ್ಭದಲ್ಲಿ ಮಗಳನ್ನು ತಕ್ಕಡಿಯ ಒಂದು ಕಡೆಯಲ್ಲಿ ಕೂರಿಸಿದ ತಂದೆ ಇನ್ನೊಂದು ಕಡೆ ಆಕೆಯ ಭಾರಕ್ಕೆ ತಕ್ಕಷ್ಟು ಚಿನ್ನವನ್ನು ಇಟ್ಟು ತೂಗಿದ್ದಾರೆ. ಅದರಂತೆ ಮಗಳ ಭಾರಕ್ಕೆ ತಕ್ಕಂತೆ 70 ಕೆಜಿ ಚಿನ್ನವನ್ನು ಆಕೆಗೆ ನೀಡಿದ್ದಾರೆ. ತಕ್ಕಡಿಯಲ್ಲಿ ವಧು ಕುಳಿತಿರುವ ಮತ್ತು ಚಿನ್ನ ಇರುವ ಫೋಟೋ ವೈರಲ್ ಆಗಿದೆ.

ಈ ಅದ್ದೂರಿ ಮದುವೆ ಅನೇಕ ಆಕ್ರೋಶಕ್ಕೂ ಕಾರಣವಾಗಿದೆ. ಮದುವೆ ನೆಪದಲ್ಲಿ ದುಂದುವೆಚ್ಚ ಮಾಡುವ ಬದಲು ಬಡವರಿಗೆ ಹಂಚಬಹುದಿತ್ತು ಎಂದು ಅನೇಕರು ಕಮೆಂಟ್ ಮಾಡಿದ್ದಾರೆ. ಪಾಕಿಸ್ತಾನದಲ್ಲಿ ಜನರು ಹಸಿವಿನಿಂದ ಸಾಯುತ್ತಿದ್ದಾರೆ. ಇಂತಹ ಸಂದರ್ಭದಲ್ಲಿ ಈ ಶೋಕಿ ಬೇಕಿತ್ತಾ ಎಂದು ಪ್ರಶ್ನಿಸುತ್ತಿದ್ದಾರೆ.

ಇತ್ತ ಜನರ ಆಕ್ರೋಶ ವ್ಯಕ್ತವಾಗುತ್ತಿದ್ದಂತೆ ವಧು ಪ್ರತಿಕ್ರಿಯಿಸಿದ್ದಾಳೆ. ಬಾಲಿವುಡ್ ಚಿತ್ರ ಜೋಧಾ ಅಕ್ಬರ್ ನ ಥೀಮ್ ಅಳವಡಿಸಿಕೊಳ್ಳಲು ಚಿನ್ನದ ತೂಕದ ಆಚರಣೆ ಮಾಡಿದ್ದಾರಂತೆ. ಇದು ಚಿನ್ನವೇ ಅಲ್ಲ. ಬರೀ ಚಿನ್ನದ ಲೇಪನವಷ್ಟೇ ಎಂದು ಸಮಜಾಯಿಷಿ ನೀಡಿದ್ದಾಳೆ.