ಮಾ.ಆನಂದ್ ಪುತ್ರಿ ವಂಶಿಕಾ ಹೆಸರಲ್ಲಿ ಭಾರೀ ಮೋಸ – ಹಲವು ಮಕ್ಕಳ ಪಾಲಕರಿಂದ 40 ಲಕ್ಷ ರೂ. ಧೋಖಾ..!! ಏನಿದು ಪ್ರಕರಣ?

ನ್ಯೂಸ್ ಆ್ಯರೋ‌ : ನಟ, ನಿರೂಪಕ ಮಾಸ್ಟರ್ ಆನಂದ್ ಪುತ್ರಿ ವಂಶಿಕಾ (Vanishika Anjani Kashyapa) ಯಾರಿಗೆ ಗೊತ್ತಿಲ್ಲ ಹೇಳಿ? ಪಟ ಪಟ ಮಾತು, ಮನೋಜ್ಞ ಅಭಿನಯದ ಮೂಲಕ ಕನ್ನಡಿಗರ ಮನಸ್ಸು ಗೆದ್ದ ಪುಟಾಣಿ ಈಕೆ. ಇದೀಗ ಈಕೆಯ ಹೆಸರು ಹೇಳಿಕೊಂಡು ಹಣ ದೋಚುತ್ತಿದ್ದ ನಿಶಾ ನರಸಪ್ಪ ಎನ್ನುವವರನ್ನು ಪೊಲೀಸರು ಬಂಧಿಸಿದ್ದಾರೆ.

ಏನಿದು ಮೋಸದ ಜಾಲ?

ವಂಶಿಕಾಗೆ ಅವಕಾಶ ಕೊಡಿಸಿದ ರೀತಿಯಲ್ಲಿಯೇ ನಿಮ್ಮ ಮಕ್ಕಳಿಗೂ ಅವಕಾಶ ಕೊಡಿಸುತ್ತೇವೆ. ನಿಮ್ಮ ಮಕ್ಕಳೂ ಟಿವಿ ಕಾರ್ಯಕ್ರಮಗಳಲ್ಲಿ ಕಾಣಿಸಿಕೊಳ್ಳುವಂತೆ ಮಾಡುತ್ತೇವೆ ಎಂದು ಹೇಳಿ ಪಾಲಕರಿಂದ ನಿಶಾ ಹಣ ದೋಚುತ್ತಿದ್ದರು ಎಂದು ಆರೋಪಿಸಲಾಗಿದೆ. ಈ ಬಗ್ಗೆ ವಂಶಿಕಾ ತಾಯಿ ಯಶಸ್ವಿನಿ ಆನಂದ್ ಮತ್ತು ಮೋಸ ಹೋದ ಪಾಲಕರು ಸದಾಶಿವನಗರ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.

40 ಲಕ್ಷ ರೂ. ವಂಚನೆ

ಮಕ್ಕಳ ಟ್ಯಾಲೆಂಟ್ ಶೋ, ಮಾಡೆಲಿಂಗ್, ಇವೆಂಟ್ ಮ್ಯಾನೇಜ್‍ಮೆಂಟ್, ಮಕ್ಕಳ ಗ್ರೋಮಿಂಗ್ ತರಗತಿ ಇತ್ಯಾದಿ ನಡೆಸುವುದಾಗಿ ಹೇಳಿ ನಿಶಾ ಸುಮಾರು 40 ಲಕ್ಷ ರೂ. ವಸೂಲಿ ಮಾಡಿದ್ದಾರೆ ಎನ್ನಲಾಗಿದೆ. ಈ ಬಗ್ಗೆ ಮೋಸ ಹೋದವರು ಫೇಸ್ ಬುಕ್ ನಲ್ಲಿಯೂ ಬರೆದುಕೊಂಡಿದ್ದಾರೆ.

ನಿಶಾಗೆ ವಂಚನೆಯೇ ಉದ್ಯೋಗವಾಗಿತ್ತು. ವಂಶಿಕಾ ಮಾತ್ರವಲ್ಲ ಚಿತ್ರರಂಗದ ಹಲವರ ಹೆಸರಿನಲ್ಲಿ ಈಕೆ ಹಣ ಪಡೆಯುತ್ತಿದ್ದರು ಎನ್ನಲಾಗಿದೆ. ಇದೀಗ ಆಕೆಯನ್ನು ವಶಕ್ಕೆ ಪಡೆದು ಸದಾಶಿವನಗರ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.