500 ವಿಮಾನ ಖರೀದಿಗೆ ಒಪ್ಪಂದ ಮಾಡಿಕೊಂಡ ಇಂಡಿಗೋ – ವಾಯುಯಾನ ಇತಿಹಾಸದಲ್ಲಿ ಹೊಸ ದಾಖಲೆ

ನ್ಯೂಸ್ ಆ್ಯರೋ‌ : ವಿಶ್ವದ ವಾಯುಯಾನ ಕ್ಷೇತ್ರದಲ್ಲಿ ಭಾರತೀಯರು ಹೊಸದೊಂದು ದಾಖಲೆ ನಿರ್ಮಿಸಿದ್ದಾರೆ. ಭಾರತದ ಅತೀ ದೊಡ್ಡ ವಿಮಾನಯಾನ ಸಂಸ್ಥೆ ಇಂಡಿಗೋ ಫ್ರಾನ್ಸ್ ನ ಏರ್ ಬಸ್ ಕಂಪೆನಿ ಜೊತೆಗೆ ಬರೋಬ್ಬರಿ 500 ವಿಮಾನ ಖರೀದಿಗೆ ಒಪ್ಪಂದ ಮಾಡಿಕೊಂಡಿದೆ.

ಇದೇ ಮೊದಲು..!!

ಅಂದಾಜು 55 ಶತಕೋಟಿ ಡಾಲರ್ ಮೊತ್ತದ ಇಂತಹ ಒಪ್ಪಂದ ವಾಯುಯಾನ ಇತಿಹಾಸದಲ್ಲೇ ಮೊದಲು ಎನ್ನುವುದು ವಿಶೇಷ. ಫ್ರಾನ್ಸ್ ನಲ್ಲಿ ನಡೆಯುತ್ತಿರುವ ಏರ್ ಶೋದಲ್ಲಿ ಈ ಒಪ್ಪಂದ ಏರ್ಪಟ್ಟಿದೆ. ಏರ್ ಬಸ್ 500 A320 ವಿಮಾನಗಳನ್ನು ರಿಯಾಯಿತಿ ದರದಲ್ಲಿ ಇಂಡಿಗೋ ಸಂಸ್ಥೆಗೆ ಪೂರೈಸಲಿದೆ.

ಇಂಡಿಗೋ ಸಂಸ್ಥೆಯ ಎಂಡಿ ರಾಹುಲ್ ಭಾಟಿಯಾ ನೇತೃತ್ವದ ತಂಡ ಮತ್ತು ಏರ್ ಬಸ್ ನ ಗುಯಿಲೌಮ್ ಫೌರಿ ಅವರನ್ನೊಳಗೊಂಡ ತಂಡ ಈ ಐತಿಹಾಸಿಕ ಒಪ್ಪಂದಕ್ಕೆ ಸಹಿ ಹಾಕಿವೆ. ಇಂಡಿಗೋ 2006ರಲ್ಲಿ ಕಾರ್ಯಾಚರಣೆ ಆರಂಭಿಸಿತ್ತು. ಅಂದಿನಿಂದ ಈವರೆಗೆ ಏರ್ ಬಸ್ ನಿಂದ ಒಟ್ಟು 1,330 ವಿಮಾನಗಳ ಖರೀದಿಗೆ ಒಪ್ಪಂದ ಮಾಡಿಕೊಂಡಂತಾಗಿದೆ.

ಏರ್ ಇಂಡಿಯಾ ದಾಖಲೆ ಮುರಿದ ಇಂಡಿಗೋ

ಫೆಬ್ರವರಿಯಲ್ಲಿ ಟಾಟಾ ಗ್ರೂಪ್ ಒಡೆತನದ ಏರ್ ಇಂಡಿಯಾ 470 ವಿಮಾನಗಳ ಖರೀದಿಗೆ ಒಪ್ಪಂದ ಮಾಡಿಕೊಂಡಿತ್ತು. ಇದು ಇಲ್ಲಿಯವರೆಗಿನ ಅತಿ ದೊಡ್ಡ ಡೀಲ್ ಎನಿಸಿಕೊಂಡಿತ್ತು. ಇದೀಗ ಇಂಡಿಗೋ ಇದನ್ನು ಮೀರಿಸಿದೆ.