ಶತಮಾನದ ಬಳಿಕ ಬೂದು ತೋಳ ಪತ್ತೆ – ಅಳಿವಿನಂಚಿನಲ್ಲಿರುವ ತೋಳದ ಬಗ್ಗೆ ಮೂಡಿದೆ ಕುತೂಹಲ

ನ್ಯೂಸ್ ಆ್ಯರೋ : ಸುಮಾರು 100 ವರ್ಷಗಳ ಬಳಿಕ ದಕ್ಷಿಣ ಕ್ಯಾಲಿಫೋರ್ನಿಯಾದಲ್ಲಿ ಅಳಿವಿನಂಚಿನಲ್ಲಿರುವ ಬೂದು ತೋಳ ಪತ್ತೆಯಾಗಿದೆ.

ಜೈಂಟ್ ಸಿಕ್ವೊಯಾ ರಾಷ್ಟ್ರೀಯ ಸ್ಮಾರಕದ ಬಳಿ ಪತ್ತೆಯಾದ ಈ ತೋಳವನ್ನು ಗುರುತಿಸುವಲ್ಲಿ ಮೊದಲು ಗೊಂದಲವಾಗಿತ್ತು. ಯಾಕೆಂದರೆ ಇದು ಬೂದು ಬಣ್ಣದಲ್ಲಿತ್ತು ಹಾಗೂ ತೋಳಕ್ಕಿಂತ ಚಿಕ್ಕದಾಗಿತ್ತು. ಅಲ್ಲದೇ ಅದು ತನ್ನ ತಲೆಯನ್ನು ಹಿಂದಕ್ಕೆ ತಿರುಗಿಸಿ ವಿಚಿತ್ರವಾಗಿ ಕೂಗಿದೆ ಎಂದು ಪ್ರತ್ಯಕ್ಷದರ್ಶಿಯೊಬ್ಬರು ತಿಳಿಸಿದ್ದು, ಉತ್ತರ ಅಮೆರಿಕದ ಸ್ಥಳೀಯ ಕೊಯೊಟೆ ಜಾತಿಗೆ ಸೇರಿದ ತೋಳವಾಗಿರಬಹುದು ಎಂದು ಅವರು ಊಹಿಸಿದ್ದರು.

ಅಳಿವಿನಂಚಿನಲ್ಲಿರುವ ಈ ಪ್ರಾಣಿಯ ಕುರಿತು ಸಂಶೋಧನೆ ನಡೆಸಲು ಪ್ರಾರಂಭಿಸಿದ ಸಂಶೋಧಕರು, ಮೊದಲು ಈ ಪ್ರಾಣಿಯ ಕೂದಲು ಮತ್ತು ಮಲವನ್ನು ಸಂಶೋಧನೆಗೆ ಒಳಪಡಿಸಿದರು. ಇದರಿಂದ ಇದು ಹೆಣ್ಣು ಬೂದು ತೋಳ ಎಂಬುದು ಖಚಿತವಾಯಿತು. ಅಲ್ಲದೇ ಎರಡು ಗಂಡು ಹಾಗೂ ಎರಡು ಹೆಣ್ಣು ಮರಿಗಳೊಂದಿಗೆ ಇದು ಪತ್ತೆಯಾಗಿದೆ ಎಂದು ಸಂಶೋಧಕರು ಹೇಳಿದ್ದಾರೆ.

ಬಳಿಕ ಇದಕ್ಕೆ ಡಿಎನ್‌ಎ ಪರೀಕ್ಷೆ ನಡೆಸಲಾಗಿದೆ. ಇದರಲ್ಲಿ ಈ ತೋಳವು 90 ವರ್ಷಗಳ ಅನಂತರ ಇದು ಪತ್ತೆಯಾಗಿದೆ. ಕ್ಯಾಲಿಫೋರ್ನಿಯಾದಲ್ಲಿ 2011 ರಲ್ಲಿ ಕಂಡುಬಂದಿದ್ದ ಮೊದಲ ತೋಳ ಎಂಬ ಹೆಗ್ಗಳಿಕೆ ಹೊಂದಿರುವ ಒಆರ್-7 ತೋಳದ ವಂಶಸ್ಥ ಈ ತೋಳಗಳು ಎನ್ನುವುದು ದೃಢಪಟ್ಟಿದೆ. ಈ ತೋಳಕ್ಕೆ ರೇಡಿಯೋ ಕಾಲರ್ ಅಳವಡಿಸಿ ಸಂಶೋಧನೆ ನಡೆಸಲಾಯಿತು.

ಬೂದು ತೋಳದ ಸಂತತಿ ರಕ್ಷಣೆಗೆ ಪಣ ತೊಟ್ಟಿರುವ ಪರಿಸರವಾದಿಗಳು, ಅದು ಓಡಾಡುವ ಪ್ರದೇಶಗಳಲ್ಲಿ ಯಾವುದೇ ಚಟುವಟಿಕೆಗಳನ್ನು ನಡೆಸದಂತೆ ಅರಣ್ಯ ಅಧಿಕಾರಿಗಳಿಗೆ ಮನವಿ ಮಾಡಿದ್ದಾರೆ.

ಯಾಕೆಂದರೆ ಈ ಹಿಂದೆ ಅಂದರೆ 19 ಹಾಗೂ 20 ನೇ ಶತಮಾನಗಳಲ್ಲಿ ಕೆಲವೊಂದು ಕಾನೂನು ಬಾಹಿರ ಚಟುವಟಿಕೆಗಳು ಅಮೆರಿಕದಾದ್ಯಂತ ತೋಳಗಳ ಸಂತತಿ ಅಳಿವಿಗೆ ಕಾರಣವಾಗಿತ್ತು.

ಈಗಾಗಲೇ ಈ ಪ್ರದೇಶಗಳಲ್ಲಿ ತೋಳಗಳನ್ನು ಕೊಲ್ಲುವಂತಿಲ್ಲ ಎನ್ನುವ ಆದೇಶವಿದೆ. ಒಂದು ವೇಳೆ ಕೊಂದರೆ ಭಾರೀ ದಂಡ ಪಾವತಿಸಬೇಕಾಗುತ್ತದೆ.