ಬರೋಬ್ಬರಿ 8.97 ಕೆಜಿ ತೂಕದ ಈರುಳ್ಳಿ ಬೆಳೆದ ರೈತ – ಗಿನ್ನಿಸ್ ದಾಖಲೆ ಸೇರಿತು ದೈತ್ಯ ಈರುಳ್ಳಿ‌.‌.!!

ನ್ಯೂಸ್ ಆ್ಯರೋ : ನೀವು ನೋಡಿರೋ ಒಂದು ಈರುಳ್ಳಿ ಅಬ್ಬಬ್ಬಾ ಎಂದರೆ ನಮ್ಮ ಒಂದು ಹಿಡಿ ಗಾತ್ರದಷ್ಟು ದೊಡ್ಡದಿರಬಹುದು. ಆದರೆ ಇಲ್ಲಿ ಬೆಳೆದಿರೋ ಈರುಳ್ಳಿ ಗಾತ್ರದಲ್ಲಿ ಗಿನ್ನಿಸ್ ದಾಖಲೆ ಬರೆದಿದೆ.

ಸೇಂಟ್ ಪೀಟರ್ ಬರ್ಗ್ ನ ಗರೆಥ್ ಗ್ರಿಫಿನ್ ಎನ್ನುವವರು ಬೆಳೆದಿರುವ ಈರುಳ್ಳಿ ಈಗ ವಿಶ್ವದ ಗಮನ ಸೆಳೆದಿದೆ.

ಇವರ ತೋಟದಲ್ಲಿ ಬರೋಬ್ಬರಿ 8.97 ಕೆ.ಜಿ. ತೂಕದ ಈರುಳ್ಳಿ ಬೆಳೆದಿದೆ. ಸೆಪ್ಟೆಂಬರ್ 15 ರಂದು ಉತ್ತರ ಯಾರ್ಕ್ ಶೇರ್ ನ ಹಾರೋಗೇಟ್ ಶರತ್ ಕಾಲದ ಹೂವಿನ ಪ್ರದರ್ಶನದಲ್ಲಿ ಕಂಡ ಈ ಈರುಳ್ಳಿಯನ್ನು ನೋಡಿ ಎಲ್ಲರೂ ಆಶ್ಚರ್ಯ ವ್ಯಕ್ತಪಡಿಸಿದರು. ಇದೀಗ ಗಿನ್ನೆಸ್ ವಿಶ್ವ ದಾಖಲೆ ಪಟ್ಟಿಗೆ ಸೇರಿದೆ.

ಇದೇ ಜಾಗದಲ್ಲಿ 2014ರಲ್ಲಿ ಗರೆಥ್ ಗ್ರಿಫಿನ್ ಅವರ ತಂದೆ ಗರೆಥ್ ಅವರು ಬೆಳೆದ 8.5 ಕೆ.ಜಿ. ತೂಕದ ಈರುಳ್ಳಿ ದಾಖಲೆ ಬರೆದಿತ್ತು. ಇದೀಗ ಮತ್ತೆ ಅವರೇ ಬೆಳೆದಿರುವ ಈರುಳ್ಳಿ ಈ ದಾಖಲೆಯನ್ನು ಮುರಿದಿದೆ.

ಗಿನ್ನೆಸ್ ವರ್ಲ್ಡ್ ರೆಕಾರ್ಡ್ ಸಂಸ್ಥೆ ಸಾಮಾಜಿಕ ಜಾಲತಾಣದಲ್ಲಿ ಈ ಬಗ್ಗೆ ಸಂತೋಷ ಹಂಚಿಕೊಂಡು ಈ ಈರುಳ್ಳಿಯು ಬೌಲಿಂಗ್ ಬಾಲ್ ಗಿಂತ ಹೆಚ್ಚು ಭಾರವಿದೆ ಎನ್ನುವ ಕ್ಯಾಪ್ಶನ್ ನೀಡಿದ್ದಾರೆ.

ಈ ಕುರಿತು ಮಾತನಾಡಿರುವ ಗ್ರಿಫಿನ್, ಪ್ರಪಂಚದ ಅತೀ ದೊಡ್ಡ ಈರುಳ್ಳಿ ಬೆಳೆದಿರುವುದಕ್ಕೆ ಸಂತೋಷ ವ್ಯಕ್ತ ಪಡಿಸಿದರು. ತಂದೆಯವರು ಅನೇಕ ವರ್ಷಗಳವರೆಗೆ ದೈತ್ಯ ಈರುಳ್ಳಿ ಬೆಳೆದಿದ್ದರು. ಅವರ ದಾಖಲೆಯನ್ನು ಮುರಿದಿರುವುದು ಖುಷಿ ಕೊಟ್ಟಿದೆ ಎಂದರು.