ಮುದ್ದಾಗಿ ಸಾಕಿದ ಗಿಳಿ ಕಾಣೆ – ಹುಡುಕಿ ಕೊಟ್ಟೋರಿಗೆ ₹10 ಸಾವಿರ ಬಹುಮಾನ ಘೋಷಣೆ..!
- ವೈರಲ್ ನ್ಯೂಸ್
- August 5, 2023
- No Comment
- 114
ನ್ಯೂಸ್ ಆ್ಯರೋ : ಕೆಲವರಿಗೆ ಸಾಕು ಪ್ರಾಣಿ-ಪಕ್ಷಿಗಳು ತಮ್ಮ ಕುಟುಂಬದ ಸದಸ್ಯರಲ್ಲಿ ಒಬ್ಬರಾಗಿಬಿಟ್ಟಿರುತ್ತವೆ. ತಮ್ಮಿಷ್ಟದ ಜೀವಿಗಳು ಕಣ್ಣ ಮುಂದೆ ಒಂದು ಕ್ಷಣ ಇಲ್ಲದಿದ್ದರೆ ಏನೋ ಕಳೆದುಕೊಂಡ ಭಾವನೆ ಕಾಡುತ್ತಿರುತ್ತದೆ. ಅಂತಹುದರಲ್ಲಿ ಇದ್ದಕ್ಕಿದ್ದಂತೆ ನಾಪತ್ತೆಯಾದರೆ, ಅದಕ್ಕಿಂತ ದೊಡ್ಡ ನೋವು ಬೇರೊಂದಿಲ್ಲ.
ಇದೀಗ ಅಂತದೇ ಘಟನೆ ನಡೆದಿದ್ದು, ಮನೆಯಲ್ಲಿ ಮುದ್ದಾಗಿ ಗಿಳಿಯೊಂದು ಕಾಣೆಯಾಗಿದೆ. ಈಗ ಆ ಗಿಳಿಯನ್ನು ಹುಡುಕಿಕೊಡುವಂತೆ ಕುಟುಂಬಸ್ಥರು ಸಾರ್ವಜನಿಕವಾಗಿ ಮೊರೆಯಿಟ್ಟಿದ್ದಾರೆ. ಕಳೆದ ಎರಡೂವರೆ ವರ್ಷದಿಂದ ಗಿಳಿಯನ್ನು ಸಾಕಿದ್ದು, ಮನೆಯ ಸದಸ್ಯರಲ್ಲಿ ಅದೂ ಒಂದು ಎಂದು ನೋಡಿಕೊಂಡಿದ್ದರು. ಆದರೆ, ಈಗ ಏಕಾಏಕಿ ಗಿಳಿ ಕಾಣೆಯಾಗಿದ್ದು, ಹುಡುಕಿ ಕೊಟ್ಟವರಿಗೆ 10 ಸಾವಿರ ರೂಪಾಯಿ ಬಹುಮಾನವನ್ನು ಘೋಷಣೆ ಮಾಡಲಾಗಿದೆ.
ದಾಮೋಹ್ ನ ಸಿಟಿ ಕೊತ್ವಾಲಿ ಹಿಂಭಾಗದ ಇಂದ್ರ ಕಾಲೋನಿಯಲ್ಲಿ ವಾಸಿಸುತ್ತಿರುವ ಸೋನಿ ಕುಟುಂಬವೇ ಈಗ ಗಿಳಿಯನ್ನು ಹುಡುಕಿ ಕೊಡುವಂತೆ ಸಾರ್ವಜನಿಕವಾಗಿ ಮನವಿ ಮಾಡಿದ್ದು, ಎಲ್ಲೆಡೆ ಬ್ಯಾನರ್ ಮತ್ತು ಫೋಟೋಗಳನ್ನು ಹರಿಬಿಟ್ಟಿದ್ದಾರೆ.
ಮನೆಯ ಯಜಮಾನ ವಾಕಿಂಗ್ ಗೆ ಹೋಗುವಾಗ ಗಿಳಿಯನ್ನು ಕರೆದುಕೊಂಡು ಹೋಗಿದ್ದು, ಬೀದಿ ನಾಯಿಗಳು ಗಿಳಿಯನ್ನು ನೋಡಿ ಬೊಗಳಲು ಪ್ರಾರಂಭ ಮಾಡಿತು. ಹೆದರಿದ ಗಿಳಿ ಮರದ ಮೇಲೆ ಹೋಗಿ ಕುಳಿತಿದ್ದು, ಸಂಜೆಯಾದರೂ ಮನೆಗೆ ಹಿಂದಿರುಗಿ ಬಂದಿಲ್ಲ. ಊರೆಲ್ಲಾ ಹುಡುಕಿದರೂ ಗಿಳಿ ಪತ್ತೆಯಾಗಲಿಲ್ಲ.
ಇತ್ತ ಕಾಣೆಯಾಗಿರುವ ಗಿಳಿಗಾಗಿ ಹಗಲು ರಾತ್ರಿ ಎನ್ನದೇ ಸೋನಿ ಕುಟುಂಬ ಹುಡುಕಾಟ ನಡೆಸುತ್ತಿದೆ. ಆದರೆ, ಇನ್ನೂ ಸಿಗದ ಹಿನ್ನೆಲೆಯಲ್ಲಿ ಗಿಳಿ ಕಾಣಿಸಿದರೆ ಮಾಹಿತಿ ನೀಡುವಂತೆ ನಗರದಲ್ಲಿ ಬ್ಯಾನರ್ ಹಾಕಿದ್ದಾರೆ. ಜತೆಗೆ ಸಾಮಾಜಿಕ ಜಾಲತಾಣಗಳಲ್ಲಿ ಗಿಳಿ ಕಾಣೆ ಬಗ್ಗೆ ಮಾಹಿತಿ ಹಂಚಿಕೊಂಡಿದ್ದಾರೆ. ಗಿಳಿಯನ್ನು ಹುಡುಕಿ ಕೊಟ್ಟರೆ ತಕ್ಷಣವೇ 10 ಸಾವಿರ ರೂಪಾಯಿ ಬಹುಮಾನ ನೀಡುವುದಾಗಿ ಘೋಷಣೆ ಮಾಡಿದ್ದಾರೆ.
ಇದೇ ಬೇಸರದಲ್ಲಿ ಕಾಣೆಯಾಗಿರುವ ಗಿಳಿಯನ್ನು ಹುಡುಕಿ ಕೊಡುವಂತೆ ನಗರದ ಎಲ್ಲಾ ಕಡೆ ಪೋಸ್ಟರ್ ಅಂಟಿಸಿ 10 ಸಾವಿರ ಬಹುಮಾನ ನೀಡುವುದಾಗಿ ಹೇಳಿದ್ದಾರೆ.