ಬೆಂಗಳೂರಿನಲ್ಲಿ ಯುಪಿಐ ಮೂಲಕ ಹಣ ಪಾವತಿಸಿದ ಜರ್ಮನ್ ಸಚಿವ – ವೈರಲ್ ಆಯ್ತು ವಿಡಿಯೋ

ನ್ಯೂಸ್ ಆ್ಯರೋ‌ : ಭಾರತ ಡಿಜಿಟಲ್ ವ್ಯವಸ್ಥೆಗೆ ತನ್ನನ್ನು ತಾನು ತೆರದುಕೊಳ್ಳುತ್ತಿದೆ. ಅದರಲ್ಲೂ ಯುಪಿಐ ಮೂಲಕ ಹಣ ಪಾವತಿಸುವ ವಿಧಾನ ಜನಪ್ರಿಯವಾಗಿದೆ. ದೇಶದ ಹಳ್ಳಿ, ಹಳ್ಳಿಯಲ್ಲೂ, ಮೂಲೆ ಮೂಲೆಯಲ್ಲೂ ಈ ಡಿಜಿಟಲ್ ಪೇಮೆಂಟ್ ವಿಧಾನ ಕಂಡು ಬರುತ್ತಿದೆ.

ಯುಪಿಐ ಮೂಲಕ ಹಣ ಪಾವತಿಸಿದ ಜರ್ಮನ್ ಸಚಿವ

ಬೆಂಗಳೂರಿನಲ್ಲಿ ನಡೆದ ಜಿ-20 ಸಭೆಗೆ ಆಗಮಿಸಿದ್ದ ಜರ್ಮನಿಯ ಡಿಜಿಟಲ್ ಮತ್ತು ಟ್ರಾನ್ಸ್ ಪೊರ್ಟ್ ಸಚಿವ ವೋಕರ್ ವಿಸ್ಸಿಂಗ್ ತರಕಾರಿ ಅಂಗಡಿಯೊಂದರಲ್ಲಿ ಮೊದಲ ಬಾರಿಗೆ ಯುಪಿಐ ಮೂಲಕ ಹಣ ಪಾವತಿಸಿ ಅಚ್ಚರಿ ಜೊತೆಗೆ ಶ್ಲಾಘನೆಯನ್ನೂ ವ್ಯಕ್ತಪಡಿಸಿದರು.

ವೀಡಿಯೋ ವೈರಲ್

ವಿಸ್ಸಿಂಗ್ ಯುಪಿಐ ಮೂಲಕ ಹಣ ಪಾವತಿಸುವ ಫೋಟೋ ಮತ್ತು ವೀಡಿಯೋ ವೈರಲ್ ಆಗಿದೆ. ಜರ್ಮನಿಯ ರಾಯಭಾರ ಕಚೇರಿ ಇದನ್ನು ಎಕ್ಸ್ (ಟ್ವಿಟರ್) ಖಾತೆಯಲ್ಲಿ ಪೋಸ್ಟ್ ಮಾಡಿದೆ. ಭಾರತದ ಯಶೋಗಾಥೆಗಳಲ್ಲಿ ಡಿಜಿಟಲ್ ಪಾವತಿಯೂ ಒಂದಾಗಿದೆ. ಯುಪಿಐ ಮೂಲಕ ಪ್ರತಿಯೊಬ್ಬರು ಕೆಲವೇ ಸೆಕೆಂಡ್ ಗಳಲ್ಲಿ ವಹಿವಾಟು ನಡೆಸಬಹುದು. ಡಿಜಿಟಲ್ ಮತ್ತು ಟ್ರಾನ್ಸ್ ಪೋರ್ಟ್ ಸಚಿವರು ಯುಪಿಐ ಮೂಲಕ ಖುದ್ದಾಗಿ ಹಣ ಪಾವತಿಸಿ ಅಚ್ಚರಿಪಟ್ಟರು ಎಂದು ಬರೆದುಕೊಂಡಿದೆ.

ಭಾರತದಲ್ಲಿ ಯುಪಿಐ ಯಶಸ್ವಿಯಾಗಿ ಜಾರಿಯಾಗಿದೆ. ಇತ್ತ ಶ್ರೀಲಂಕಾ, ಫ್ರಾನ್ಸ್, ಸಿಂಗಾಪುರ, ಯುಎಐ ಮುಂತಾದ ದೇಶಗಳು ಯುಪಿಐ ಬಳಕೆಗೆ ಭಾರತದ ಜೊತೆ ಒಪ್ಪಂದ ಮಾಡಿಕೊಂಡಿವೆ. ಇದರಿಂದ ಅನಿವಾಸಿ ಭಾರತೀಯರು ತಮ್ಮ ಊರಿಗೆ ಸುಲಭವಾಗಿ ಹಣ ಪಾವತಿಸಬಹುದಾಗಿದೆ.

ಇತ್ತೀಚೆಗೆ ಫ್ರಾನ್ಸ್ ಗೆ ಭೇಟಿ ನೀಡಿದ್ದ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಮಾತನಾಡಿ, ಭಾರತದ ಯುಪಿಐ ಮತ್ತು ಇತರ ಡಿಜಿಟಲ್ ಫ್ಲಾಟ್ ಫಾರ್ಮ್‍ಗಳು ದೇಶದಲ್ಲಿ ದೊಡ್ಡ ಸಾಮಾಜಿಕ ಪರಿವರ್ತನೆ ತಂದಿವೆ ಮತ್ತು ಭಾರತ, ಫ್ರಾನ್ಸ್ ಇದೇ ಮಾರ್ಗದಲ್ಲಿ ಒಟ್ಟಿಗೆ ಕೆಲಸ ಮಾಡುತ್ತಿರುವುದಕ್ಕೆ ಸಂತೋಷವಾಗುತ್ತಿದೆ. ಫ್ರಾನ್ಸ್ ಯುಪಿಐ ಬಳಸಲು ಒಪ್ಪಿಕೊಂಡಿದೆ ಎಂದಿದ್ದರು.