ಟ್ರೋಲ್ ಗೆ ಗುರಿಯಾದ ಚಾರ್ಟರ್ ವಿಮಾನದಲ್ಲಿ ಭಾರತಕ್ಕೆ ಬಂದಿಳಿದ ಕ್ರಿಕೆಟಿಗ ವಿರಾಟ್ ಕೊಹ್ಲಿ ನಡೆ – ಟ್ರೋಲ್ ಗೆ ಕಾರಣವೇನು?
- ಕ್ರೀಡಾ ಸುದ್ದಿ
- August 5, 2023
- No Comment
- 380
ನ್ಯೂಸ್ ಆ್ಯರೋ : ಭಾರತ ಕ್ರಿಕೆಟ್ ತಂಡದ ಸ್ಟಾರ್ ಆಟಗಾರ ವಿರಾಟ್ ಕೊಹ್ಲಿ ಯಶಸ್ವಿಯಾಗಿ ತಮ್ಮ ವೆಸ್ಟ್ ಇಂಡೀಸ್ ಪ್ರವಾಸ ಮುಗಿಸಿ ವಾಪಸಾಗಿದ್ದಾರೆ. 500ನೇ ಅಂತಾರಾಷ್ಟ್ರೀಯ ಪಂದ್ಯದಲ್ಲಿ ಶತಕ ಸಿಡಿಸಿ ಕೂಟವನ್ನು ಸ್ಮರಣೀಯವಾಗಿಸಿದರು.
ಚಾರ್ಟರ್ ವಿಮಾನದ ಮೂಲಕ ಬಂದಿಳಿದ ಕೊಹ್ಲಿ
ಸದ್ಯ ಕೊಹ್ಲಿ ಭಾರತಕ್ಕೆ ಮರಳಿರುವ ರೀತಿಯೇ ಚರ್ಚೆಗೊಳಗಾಗುತ್ತಿದೆ. ಅವರು ಚಾರ್ಟರ್ ವಿಮಾನದಲ್ಲಿ ಭಾರತಕ್ಕೆ ಮರಳಿದ್ದು ಈ ವಿಚಾರವನ್ನು ಮುಂದಿಟ್ಟು ಟ್ರೋಲ್ ಮಾಡಲಾಗುತ್ತಿದೆ. ಕೊಹ್ಲಿ ತಾವು ಚಾರ್ಟರ್ ವಿಮಾನದಲ್ಲಿ ಕುಳಿತಿರುವ ಫೋಟೋವನ್ನು ಹಂಚಿಕೊಳ್ಳುತ್ತಿದ್ದಂತೆ ಕಮೆಂಟ್ ಗಳ ಸುರಿಮಳೆಯೇ ಆಗಿದೆ.
ಟೀಕೆಗೆ ಕಾರಣವೇನು?
ಟೀಮ್ ಇಂಡಿಯಾದ ಮಾಜಿ ನಾಯಕ ಹೀಗೆ ಟೀಕೆಗೆ ಗುರಿಯಾಗಲೂ ಕಾರಣವಿದೆ. ಹಿಂದೆ ಅವರು ನೀಡಿದ್ದ ಉಪದೇಶವೇ ಇಂದು ಅವರಿಗೆ ಮುಳುವಾಗಿದೆ. 2021ರ ದೀಪಾವಳಿ ಹಬ್ಬದ ಸಮಯದಲ್ಲಿ ಟ್ವೀಟ್ ಮಾಡಿದ್ದ ಕೊಹ್ಲಿ, ಜಾಗತಿಕ ತಾಪಮಾನ ಮತ್ತು ಪರಿಸರ ಸಂರಕ್ಷಣೆ ಬಗ್ಗೆ ಮಾತನಾಡಿದ್ದರು. ಪಟಾಕಿ ಸುಡದೆ ಅರ್ಥಪೂರ್ಣವಾಗಿ ಹಬ್ಬ ಆಚರಿಸುವಂತೆ ಕರೆ ನೀಡಿದ್ದರು.
ಅಲ್ಲದೆ ಸಾರ್ವಜನಿಕ ಸಂಪರ್ಕ ಸಾರಿಗೆಗಳಾದ ಬಸ್ ಮತ್ತು ಪರಿಸರಕ್ಕೆ ಹಾನಿಯಾಗದ ಮೋಟಾರ್ ವಾಹನಗಳನ್ನು ಬಳಸಿ ಎಂದು ಕೊಹ್ಲಿ ಹೇಳಿದ್ದರು.
ಹೀಗೆ ಹೇಳಿದ್ದ ಕೊಹ್ಲಿಯೇ ಇದೀಗ ಚಾರ್ಟರ್ ವಿಮಾನದಲ್ಲಿ ಪ್ರಯಾಣಿಸಿದ್ದು ಎಷ್ಟು ಸರಿ ? ಎಂದು ಕೆಲವರು ಪ್ರಶ್ನಿಸಿದ್ದಾರೆ. ಅಲ್ಲದೆ ಚಾರ್ಟರ್ ವಿಮಾನವು ಹೆಚ್ಚಿನ ಪ್ರಮಾಣದಲ್ಲಿ ಪರಿಸರಕ್ಕೆ ಇಂಗಾಲದ ಡೈ ಆಕ್ಸೈಡ್ ಬಿಡುಗಡೆ ಮಾಡುತ್ತದೆ. ಇದು ಪರಿಸರಕ್ಕೆ ಹೆಚ್ಚಿನ ಹಾನಿ ಉಂಟು ಮಾಡುತ್ತದೆ ಎನ್ನುವುದು ನೆಟ್ಟಿಗರ ವಾದ.
ಒಬ್ಬ ಮಾದರಿ ವ್ಯಕ್ತಿಯಾಗಿ ಸಾವಿರಾರು ಜನರಿಗೆ ಮಾರ್ಗದರ್ಶನ ನೀಡಬೇಕಾದವರೇ ಹೀಗೆ ನಡೆದುಕೊಂಡಿದ್ದು ಸರಿಯಲ್ಲ ಎಂದು ನೆಟ್ಟಿಗರು ಅಬಿಪ್ರಾಯಪಟ್ಟಿದ್ದಾರೆ. ನಿಮಗೆ ನಿಜವಾಗಿಯೂ ಚಾರ್ಟರ್ ವಿಮಾನದ ಅಗತ್ಯವಿತ್ತೇ? ನಿಮ್ಮ ಬಳಿ ಸಾಕಷ್ಟು ಹಣ ಇರಬಹುದು. ಅದನ್ನು ವ್ಯರ್ಥ ಮಾಡದೆ ಯಾರಿಗಾದರೂ ಸಹಾಯ ಹಸ್ತ ಚಾಚಬಹುದಲ್ಲವೇ? ಎಂದು ಹಲವರು ಸಲಹೆ ನೀಡಿದ್ದಾರೆ.