ರಾಜ್ಯದಲ್ಲಿ ರಾಜಕೀಯ ತರಬೇತಿ ಕಾಲೇಜು ಆರಂಭ : ಯು‌.ಟಿ. ಖಾದರ್ – ಉಪನ್ಯಾಸಕರ ಜೊತೆ ರಾಜಕಾರಣಿಗಳೂ ನೀಡಲಿದ್ದಾರಂತೆ ತರಬೇತಿ…!!

ನ್ಯೂಸ್ ಆ್ಯರೋ : ಇಂಜಿನಿಯರಿಂಗ್, ಡಾಕ್ಟರ್, ವಕೀಲಿ ವೃತ್ತಿ ಹೀಗೆ ಎಲ್ಲಾ ವಿಷಯಗಳಿಗೂ ಪ್ರತ್ಯೇಕ ಕಾಲೇಜುಗಳಿವೆ. ಆದರೆ ಪದವಿಯ ನಂತರ ಯುವ ಜನರಿಗೆ ರಾಜಕೀಯ ಕ್ಷೇತ್ರದಲ್ಲಿ ಕೆಲಸ ಮಾಡಲು ಮತ್ತು ಸರ್ಕಾರಿ ಕೆಲಸಗಳ ಬಗ್ಗೆ ಮಾಹಿತಿ ಪಡೆಯಲು ತರಬೇತಿ ಕೇಂದ್ರಗಳಿಲ್ಲ. ಈ ನಿಟ್ಟಿನಲ್ಲಿ ರಾಜಕೀಯ ತರಬೇತಿ ಸಂಸ್ಥೆ ಆರಂಭಿಸುವ ಯೋಜನೆ ಇದೆ’ ಎಂದು ನೂತನ ಸ್ಪೀಕರ್ ಯು.ಟಿ ಖಾದರ್ ಅಭಿಪ್ರಾಯಪಟ್ಟಿದ್ದಾರೆ.

ಕಾಲೇಜು ಎಲ್ಲಿ ಆರಂಭವಾಗಲಿದೆ?
ಇತ್ತೀಚೆಗೆ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ‘ಈ ಮಹತ್ವದ ಯೋಜನೆಗೆ ನಮ್ಮ ಸರ್ಕಾರ ಶೀಘ್ರದಲ್ಲೇ ಹಸಿರು ನಿಶಾನೆ ತೋರಿಸಲಿದೆ. ಸದ್ಯ ಪುಣೆಯಲ್ಲಿ ಈ ರೀತಿಯ ತರಬೇತಿ ಸಂಸ್ಥೆ ಜಾರಿಯಲ್ಲಿದ್ದು, ಅವರ ಜೊತೆ ಚರ್ಚಿಸಿ ನಮ್ಮ ರಾಜ್ಯದಲ್ಲೂ ಒಂದು ವರ್ಷದ ಕೋರ್ಸ್ ಆರಂಭಿಸಲಾಗುವುದು. ರಾಜ್ಯದ ಪ್ರಮುಖ ಕೇಂದ್ರದಲ್ಲಿ ಈ ಕಾಲೇಜು ಸ್ಥಾಪನೆಯಾಗಲಿದ್ದು, ನುರಿತ ಉಪನ್ಯಾಸಕರನ್ನೂ ನೇಮಿಸಲಾಗುವುದು’ ಎಂದಿದ್ದಾರೆ.

ತರಗತಿಗಳು ಹೇಗೆ ನಡೆಯಲಿದೆ?
ಈ ರಾಜಕೀಯ ತರಬೇತಿ ಸಂಸ್ಥೆ ರಾಜ್ಯದಲ್ಲಿ ಆದಷ್ಟು ಬೇಗ ತಲೆ ಎತ್ತಲಿದೆ ಎಂಬ ವಿಚಾರವನ್ನು ಸ್ಪೀಕರ್ ಪ್ರಸ್ತಾಪಿಸಿದ್ದಾರೆ. ಅಲ್ಲದೇ ಈ ಕೋರ್ಸ್ ಒಂದು ವರ್ಷದ ಅವಧಿಗೆ ಸೀಮಿತವಾಗಿದ್ದು, 6ತಿಂಗಳು ಥಿಯರಿ ಹಾಗೂ 6 ತಿಂಗಳು ಪ್ರಾಕ್ಟಿಕಲ್ ತರಗತಿಗಳು ನಡೆಯಲಿದೆ. ಸಂವಿಧಾನದಲ್ಲಿರುವ ಕಾನೂನುಗಳು, ಪತ್ರಕೋದ್ಯಮ, ಸಾಮಾನ್ಯ ಜ್ಞಾನ ಹಾಗೂ ರಾಜ್ಯಕೀಯ ಶಾಸ್ತ್ರದ ವಿವಿಧ ಭಾಗಗಳನ್ನು ಇಲ್ಲಿ ಅಭ್ಯರ್ಥಿಗಳಿಗೆ ಕಲಿಸಲಾಗುವುದು ಎಂದು ಸ್ಪೀಕರ್ ಯು.ಟಿ‌ ಖಾದರ್ ತಿಳಿಸಿದ್ದಾರೆ.

ರಾಜಕಾರಣಿಗಳಿಂದಲೂ ಕ್ಲಾಸ್!
ಸದ್ಯದಲ್ಲೇ ರಾಜ್ಯದಲ್ಲಿ ತಲೆ ಎತ್ತಲಿರುವ ರಾಜಕೀಯ ತರಬೇತಿ ಸಂಸ್ಥೆಯಲ್ಲಿ ಒಂದು ವರ್ಷದ ಅವಧಿಗೆ ಕೋರ್ಸ್ ಇರಲಿದ್ದು, 6 ನುರಿತ ಉಪನ್ಯಾಸಕರನ್ನೂ ಕೂಡ ನೇಮಿಸಲಾಗುತ್ತದೆ. ಇದರೊಂದಿಗೆ ರಾಜ್ಯದ ಹಿರಿಯ ರಾಜಕೀಯ ನಾಯಕರು, ಮುತ್ಸದ್ದಿಗಳು ತರಗತಿಗಳಿಗೆ ಭೇಟಿ ನೀಡಿ ತರಬೇತಿ ನೀಡುತ್ತಾರೆ. ಕೋರ್ಸ್ ಮುಗಿದ ಬಳಿಕ ಯುವಕರು ರಾಜಕೀಯಕ್ಕೂ ಪ್ರವೇಶ ಮಾಡಬಹುದು ಇಲ್ಲವೇ ಶಾಸಕರ ಜೊತೆಗೆ ಕೆಲಸ ಮಾಡಬಹುದಾಗಿದೆ’ ಎಂದು ಯು.ಟಿ ಖಾದರ್ ಅವರು ತಿಳಿಸಿದ್ದಾರೆ.