ಶೀಘ್ರ ಮದುವೆಯಾಗುತ್ತಾರಂತೆ ರಾಹುಲ್ ಗಾಂಧಿ – ಲಾಲು ಪ್ರಸಾದ್ ಯಾದವ್ ಹೇಳಿದ್ದೇನು?

ನ್ಯೂಸ್ ಆ್ಯರೋ‌‌ : ಪಾಟ್ನಾದಲ್ಲಿ ನಡೆದ ಎಲ್ಲಾ ವಿಪಕ್ಷಗಳ ಸಭೆಯಲ್ಲಿ ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಅವರ ಮದುವೆ ವಿಚಾರ ಪ್ರಸ್ತಾವವಾಯಿತು. ಆರ್.ಜೆ.ಡಿ. ನಾಯಕ, ಮಾಜಿ ಮುಖ್ಯಮಂತ್ರಿ ಲಾಲು ಪ್ರಸಾದ್ ಯಾದವ್ ರಾಹುಲ್ ಗಾಂಧಿ ಅವರಿಗೆ ಮದುವೆಯಾಗಿ ಎಂದು ಸಲಹೆ ನೀಡಿದರು.

ರಾಹುಲ್ ಗಾಂಧಿ ಕೊಟ್ಟ ಉತ್ತರವೇನು?

ಇದಕ್ಕೆ ನಗುತ್ತಲೇ ಉತ್ತರ ಕೊಟ್ಟ ರಾಹುಲ್ ಗಾಂದಿ, ”ನೀವು ಹೇಳಿದ ಮೇಲೆ ಮದುವೆಯಾಗುತ್ತೇನೆ” ಎಂದರು. ಮುಂದಿನ ಲೋಕಸಭೆ ಚುನಾವಣೆಯಲ್ಲಿ ಬಿಜೆಪಿಯನ್ನು ಹೇಗೆ ಸೋಲಿಸಬೇಕು ಎಂಬ ಬಗ್ಗೆ ವಿಪಕ್ಷಗಳು ಒಟ್ಟಾಗಿ ಸಭೆ ನಡೆಸಿದ್ದವು. ಈ ಸಂದರ್ಭದಲ್ಲಿ ಲಾಲು ಪ್ರಸಾದ್ ಯಾದವ್ ಮತ್ತು ರಾಹುಲ್ ಗಾಂಧಿ ಮದುವೆ ಬಗ್ಗೆ ಮಾತನಾಡುವ ದೃಶ್ಯ ಕ್ಯಾಮರಾ ಕಣ್ಣಲ್ಲಿ ಸೆರೆಯಾಗಿದೆ.

”ನೀವು ಲೋಕಸಭೆಯಲ್ಲಿ ಉತ್ತಮ ಕೆಲಸ ಮಾಡಿದ್ದೀರಿ. ಅದಾನಿ ವಿರುದ್ಧ ಹೋರಾಡಿದ್ದೀರಿ. ದೇಶಾದ್ಯಂತ ಓಡಾಡಿದ್ದೀರಿ. ಕರ್ನಾಟಕದಲ್ಲೂ ನಿಮ್ಮ ಪಕ್ಷ ಅಧಿಕಾರಕ್ಕೆ ಬಂದಿದೆ. ನಿಮಗೆ ಇನ್ನೂ ವಯಸ್ಸಿದೆ. ಹೀಗಾಗಿ ಈಗಲೇ ಮದುವೆಯಾಗಿ” ಎಂದು ಲಾಲು ಸಲಹೆ ನೀಡಿದರು.

”ನಿಮ್ಮ ತಾಯಿ ಮಾತನ್ನು ನೀವು ಕೇಳುತ್ತಿಲ್ಲವಂತೆ. ನಮ್ಮ ಸಲಹೆ ಸ್ವೀಕರಿಸಿ. ಈ ಹಿಂದೆಯೂ ಮದುವೆಯಾಗಲು ಸಲಹೆ ನೀಡಿದ್ದೆ. ಈಗಲಾದರೂ ಆಗಿ” ಎಂದು ಒತ್ತಾಯ ಮಾಡಿದರು. ಇದಕ್ಕೆ ರಾಹುಲ್ ಗಾಂಧಿ ಪೂರಕವಾಗಿ ಸ್ಪಂದಿಸಿದ್ದು, ಅದರಂತೆ ಹಸೆಮಣೆಗೇರುತ್ತಾರಾ ಎನ್ನುವುದನ್ನು ಕಾದು ನೋಡಬೇಕಿದೆ.