ಕೇಳಿ ಪ್ರೇಮಿಗಳೇ…ಪ್ರೇಮ ವಿವಾಹಕ್ಕೆ ಇನ್ನು ಮುಂದೆ ಪಾಲಕರ ಒಪ್ಪಿಗೆ ಅಗತ್ಯ – ಏನಿದು ಹೊಸ ಕಾನೂನು?

ನ್ಯೂಸ್ ಆ್ಯರೋ‌ : ವಿವಾಹ ವಯಸ್ಸಿಗೆ ಬಂದವರು ತಾವು ಇಷ್ಟ ಪಡುವವರೊಂದಿಗೆ ಮದುವೆಯಾಗಬಹುದು ಎಂದು ಕಾನೂನು ಹೇಳುತ್ತದೆ. ಆದರೆ ಕೆಲವೊಂದು ಪ್ರೇಮ ವಿವಾಹಕ್ಕೆ ಪೋಷಕರ ಒಪ್ಪಿಗೆ ಇರುವುದಿಲ್ಲ. ಅವರಿಗೆ ಇಂತಹ ಮದುವೆ ಆಘಾತವನ್ನುಂಟು ಮಾಡುತ್ತದೆ. ಇಂತಹ ಘಟನೆಯನ್ನು ತಪ್ಪಿಸಲು ಗುಜರಾತ್ ಸರಕಾರ ಹೊಸದೊಂದು ಯೋಜನೆ ರೂಪಿಸಲು ನಿರ್ಧರಿಸಿದೆ.

ಏನಿದು ಹೊಸ ಚಿಂತನೆ?
ಪ್ರೇಮ ವಿವಾಹದಿಂದ ಉಂಟಾಗುವ ಅನಗತ್ಯ ಗೊಂದಲ ನಿವಾರಣೆಗೆ ಕ್ರಮ ಕೈಗೊಳ್ಳಲು ಚಿಂತಿಸಿರುವುದಾಗಿ ಮುಖ್ಯಮಂತ್ರಿ ಭೂಪೇಂದ್ರ ಪಟೇಲ್ ತಿಳಿಸಿದ್ದಾರೆ. ಪ್ರೇಮ ವಿವಾಹಗಳಿಗೆ ಪಾಲಕರ ಅನುಮತಿಯನ್ನು ಕಡ್ಡಾಯಗೊಳಿಸುವ ವ್ಯವಸ್ಥೆ ಜಾರಿಗೆ ತರುವ ಬಗ್ಗೆ ಪರಿಶೀಲನೆ ನಡೆಸಲಾಗುತ್ತಿದೆ ಎಂದಿದ್ದಾರೆ.

ಪಾಲಕರ ಅನುಮತಿಯ ಮೇರೆಗೆ ಪ್ರೇಮ ವಿವಾಹ ನಡೆಯುವಂತೆ ಪಾಟಿದಾರ್ ಸಮುದಾಯದಿಂದ ಆಗ್ರಹ ಕೇಳಿ ಬಂದ ಹಿನ್ನೆಲೆಯಲ್ಲಿ ಸಿಎಂ ಈ ಪ್ರತಿಕ್ರಿಯೆ ನೀಡಿದ್ದು, ಸಾಂವಿಧಾನಿಕವಾಗಿ ಇದು ಸಾಧ್ಯವೇ ಎನ್ನುವುದರ ಬಗ್ಗೆ ಅಧ್ಯಯನ ನಡೆಸಲಾಗುವುದು ಎಂದು ತಿಳಿಸಿದ್ದಾರೆ.

ವಿಪಕ್ಷದಿಂದಲೂ ಬೆಂಬಲ
ಅಚ್ಚರಿಯ ಬೆಳವಣೆಗೆಯೊಂದರಲ್ಲಿ ಈ ಪ್ರಸ್ತಾವಕ್ಕೆ ವಿಪಕ್ಷ ಕಾಂಗ್ರೆಸ್ ನಿಂದಲೂ ಬೆಂಬಲ ಲಭಿಸಿದೆ. ಇಂತಹ ಮಸೂದೆಯನ್ನು ಸರಕಾರ ವಿಧಾನಸಭೆಯಲ್ಲಿ ಮಂಡಿಸಿದರೆ ಬೆಂಬಲಿಸುವುದಾಗಿ ಕಾಂಗ್ರೆಸ್ ತಿಳಿಸಿದೆ.

ಸದ್ಯ ಬಲವಂತದ ಧಾರ್ಮಿಕ ಮತಾಂತರವನ್ನು ನಿಯಂತ್ರಿಸಲು ಗುಜರಾತ್ ಸರಕಾರ ಹಲವು ಕ್ರಮಗಳನ್ನು ಜಾರಿಗೊಳಿಸಿದೆ. ಗುಜರಾತ್ ಧರ್ಮ ಸ್ವಾತಂತ್ರ್ಯ ಕಾಯ್ದೆಗೆ ಹಲವು ಬದಲಾವಣೆ ತಂದಿದ್ದು ಇದು ಸುಪ್ರೀಂ ಕೋರ್ಟ್ ನಲ್ಲಿ ವಿಚಾರಣೆ ಹಂತದಲ್ಲಿದೆ.