ಆನ್‌ಲೈನ್ ನಲ್ಲೇ ಪಾಕ್ ವಧುವನ್ನು ವರಿಸಿದ ರಾಜಸ್ತಾನದ ವರ – ಅಚ್ಚರಿಯ ಮದುವೆಗೆ ಕಾರಣವೇನು ಗೊತ್ತಾ?

ನ್ಯೂಸ್ ಆ್ಯರೋ‌ : ಇತ್ತೀಚಿನ ದಿನಗಳಲ್ಲಿ ಭಾರತ – ಪಾಕಿಸ್ತಾನ ಗಡಿ ಮೀರಿ ಸಂಬಂಧ ಕುದುರುತ್ತಿವೆ. ಅದಕ್ಕೆ ಉದಾಹರಣೆ ಎಂಬಂತೆ ಸೀಮಾ ಪ್ರಿಯತಮನನ್ನು ಹುಡುಕಿಕೊಂಡು ಪಾಕ್ ನಿಂದ ಭಾರತಕ್ಕೆ ಬಂದರೆ ರಾಜಸ್ತಾನದ ಅಂಜು ಗೆಳೆಯನನ್ನು ಅರಸಿ ಪಾಕಿಸ್ತಾನಕ್ಕೆ ತೆರಳಿದ್ದಾಳೆ. ಇದರ ಜೊತೆಗೆ ಇನ್ನೊಂದು ಪ್ರಕರಣವೂ ಸೇರಿದ್ದು ಭಾರತದ ವ್ಯಕ್ತಿಯೊಬ್ಬ ಪಾಕಿಸ್ತಾನದ ಯುವತಿಯನ್ನು ಆನ್ ಲೈನ್ ನಲ್ಲಿ ವರಿಸಿದ್ದಾನೆ.

ವೀಸಾ ಸಿಗದೆ ಹಿನ್ನೆಲೆ

ರಾಜಸ್ತಾನದ ಜೋಧ್ ಪುರದ ನಿವಾಸಿ ಅರ್ಬಾನ್ ಪಾಕಿಸ್ತಾನದ ಅಮೀನಾಳನ್ನು ಮದುವೆಯಾಗಿದ್ದಾನೆ. ಅಮೀನಾಗೆ ಭಾರತಕ್ಕೆ ಬರಲು ವೀಸಾ ಸಿಗದ ಹಿನ್ನಲೆಯಲ್ಲಿ ಈ ಜೋಡಿ ವೀಡಿಯೋ ಕಾನ್ಫರೆನ್ಸ್ ಮೂಲಕ ವೈವಾಹಿಕ ಜೀವನಕ್ಕೆ ಕಾಲಿಟ್ಟಿತು.

ಎರಡೂ ಕಡೆಯ ಕುಟುಂಬದ ಸದಸ್ಯರು ವೀಡಿಯೋ ಕಾನ್ಫರೆನ್ಸ್ ಮೂಲಕ ನವ ಜೋಡಿಗೆ ಶುಭ ಹಾರೈಸಿದ್ದಾರೆ. ಇಡೀ ಸಮಾರಂಭದ ಪ್ರದರ್ಶನಕ್ಕೆ ಹುಡುಗನ ಮನೆಯ ಕಡೆಯವರು ಎಲ್.ಇ.ಡಿ. ಪರದೆ ವ್ಯವಸ್ಥೆ ಮಾಡಿದ್ದರು.

ಪ್ರಸ್ತುತ ಉಭಯ ದೇಶಗಳ ನಡುವೆ ಸಂಬಂಧ ಹದಗೆಟ್ಟಿರುವುದರಿಂದ ವೀಸಾ ಪಡೆಯಲು ಸಮಯ ತೆಗೆದುಕೊಳ್ಳುತ್ತದೆ. ಅದಕ್ಕಾಗಿಯೇ ನಾವು ವೀಡಿಯೋ ಕಾನ್ಫರೆನ್ಸ್ ಮೂಲಕ ವಿವಾಹಿತರಾಗಲು ನಿರ್ಧರಿಸಿದ್ದೆವು ಎಂದು ವರ ಅರ್ಬಾಜ್ ತಿಳಿಸಿದ್ದಾರೆ.