ಫ್ರಾನ್ಸ್ ಜೊತೆ 90 ಸಾವಿರ ಕೋಟಿ ರೂ. ಒಪ್ಪಂದಕ್ಕೆ ಮುಂದಾದ ಭಾರತ; ರಫೇಲ್, ಜಲಾಂತರ್ಗಾಮಿ ಖರೀದಿಸಲು ಆಸಕ್ತಿ
- ರಾಷ್ಟ್ರೀಯ ಸುದ್ದಿ
- July 11, 2023
- No Comment
- 89
ನ್ಯೂಸ್ ಆ್ಯರೋ: ಈ ಹಿಂದೆ ಫ್ರಾನ್ಸ್ ನಿಂದ 36 ರಫೇಲ್ ಯುದ್ದ ವಿಮಾನಗಳನ್ನು ಖರೀದಿಸಿದ್ದ ಭಾರತ ಇದೀಗ ಇನ್ನೂ 26 ಈ ಮಾದರಿಯ ವಿಮಾನ ಖರೀದಿಸಲು ಮುಂದಾಗಿದೆ.
ಶೀಘ್ರ ಒಪ್ಪಂದ ಸಾಧ್ಯತೆ
ಭಾರತೀಯ ರಕ್ಷಣಾ ಪಡೆಗಳು ಸಚಿವಾಲಯದ ಮುಂದೆ ರಫೇಲ್ ಖರೀದಿಯ ಪ್ರಸ್ತಾವನೆಯನ್ನಿಟ್ಟಿವೆ. ಈ ವಾರ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಫ್ರಾನ್ಸ್ ಗೆ ಭೇಟಿ ನೀಡಲಿದ್ದು, ಈ ವೇಳೆ ರಫೇಲ್ ಖರೀದಿಗೆ ಸಂಬಂಧಿಸಿದ ಒಪ್ಪಂದ ಮಾಡಿಕೊಳ್ಳುವ ಸಾಧ್ಯತೆ ಇದೆ ಎಂದು ಮೂಲಗಳು ತಿಳಿಸಿವೆ.
90 ಸಾವಿರ ಕೋಟಿ ರೂ. ವೆಚ್ಚ
ರಫೇಲ್ ಜೊತೆಗೆ ಭಾರತ ಫ್ರಾನ್ಸ್ ನಿಂದ 3 ಸ್ಕಾರ್ಪೀನ್ ವರ್ಗದ ಜಲಾಂತರ್ಗಾಮಿ ನೌಕೆಗಳನ್ನೂ ಖರೀದಿಸಲಿದೆ. ಇದಕ್ಕೆಲ್ಲ ಒಟ್ಟು 90 ಸಾವಿರ ಕೋಟಿ ರೂ. ವೆಚ್ಚ ತಗುಲಲಿದೆ ಎಂದು ಅಂದಾಜಿಸಲಾಗಿದೆ. ಆದರೆ ಪೂರ್ಣ ಮಾತುಕತೆ ನಡೆದ ಬಳಿಕವೇ ಅಂತಿಮ ವೆಚ್ಚ ಸ್ಪಷ್ಟವಾಗಲಿದೆ. ಭಾರತಕ್ಕೆ ರಿಯಾಯಿತಿ ದೊರೆಯುವ ಸಾಧ್ಯತೆಯೂ ಇದೆ ಎನ್ನಲಾಗಿದೆ.
ದೇಶಾದ್ಯಂತ ಭದ್ರತಾ ಸವಾಲುಗಳ ದೃಷ್ಟಿಯಿಂದ ಭಾರತೀಯ ನೌಕಾಪಡೆಯು ಕೊರತೆ ಎದುರಿಸುತ್ತಿರುವ ಕಾರಣ ಈ ಯುದ್ಧ ವಿಮಾನ ಮತ್ತು ಜಲಾಂತರ್ಗಾಮಿ ನೌಕೆಗಳ ಖರೀದಿಗೆ ರಕ್ಷಣಾ ಪಡೆಗಳು ಪ್ರಸ್ತಾವ ಸಲ್ಲಿಸಿವೆ.