ಅತಿಯಾಗಿ ನೀರು ಕುಡಿದು ಮೃತಪಟ್ಟ ಮಹಿಳೆ – ಏನಿದು ವಿಚಿತ್ರ ಘಟನೆ?
- ಅಂತಾರಾಷ್ಟ್ರೀಯ ಸುದ್ದಿ
- August 5, 2023
- No Comment
- 153
ನ್ಯೂಸ್ ಆ್ಯರೋ : ಅತಿಯಾದರೆ ಅಮೃತವೂ ವಿಷ ಎನ್ನಲಾಗುತ್ತದೆ. ನೀರು ಕೂಡ ಇದಕ್ಕೆ ಹೊರತಲ್ಲ. ಅತಿಯಾಗಿ ನೀರು ಕುಡಿದು ಅಮೆರಿಕದ ಇಂಡಿಯಾನಾ ರಾಜ್ಯದ ಮೊಂಟಿಚೆಲ್ಲೋದ ಮಹಿಳೆಯೊಬ್ಬರು ಮೃತಪಟ್ಟಿದ್ದಾರೆ. 35 ವರ್ಷದ ಎರಡು ಮಕ್ಕಳ ತಾಯಿ ಆಶ್ಲೇ ಸಮ್ಮರ್ಸ್ ಮೃತ ಮಹಿಳೆ.
ಘಟನೆ ವಿವರ
ಆಶ್ಲೇ ಸಮ್ಮರ್ಸ್ ತನ್ನ ಪತಿ ಮತ್ತು ಇಬ್ಬರು ಮಕ್ಕಳ ಜೊತೆ ಪ್ರವಾಸ ಕೈಗೊಂಡಿದ್ದರು. ಪ್ರವಾಸದ ಕೊನೆಯ ದಿನದಂದು ಸಾಕಷ್ಟು ನೀರು ಕುಡಿಯಲು ಸಾದ್ಯವಾಗಲಿಲ್ಲವೆಂದುಕೊಂಡ ಆಶ್ಲೇ ಕೇವಲ 20 ನಿಮಿಷದಲ್ಲಿ 2 ಲೀಟರ್ ನೀರು ಕುಡಿದಿದ್ದರು.
ಬಳಿಕ ಅವರು ಅಸ್ವಸ್ಥರಾದರು. ತಲೆನೋವು, ಸುಸ್ತು ಕಂಡು ಬಂದಿದ್ದರಿಂದ ಕೂಡಲೇ ಮನೆಗೆ ಹಿಂದಿರುಗಿದರು. ಕಾರಿನಿಂದ ಇಳಿಯುವಾಗ ಕುಸಿದು ಬಿದ್ದ ಅವರನ್ನು ಕೂಡಲೇ ಆಸ್ಪತ್ರೆಗೆ ಕರೆದೊಯ್ಯಲಾಯಿತು. ಆದರೆ ಅಷ್ಟರಲ್ಲೇ ಅವರು ಮೃತಪಟ್ಟಿದ್ದರು.
ಕಾರಣವೇನು?
ಒಂದು ದಿನದಲ್ಲಿ ಕುಡಿಯುವ ನೀರನ್ನು ಆಶ್ಲೇ ಕೇವಲ 20 ನಿಮಿಷಗಳಲ್ಲಿ ಕುಡಿದದ್ದು ಸಾವಿಗೆ ಕಾರಣ. ಅಲ್ಪ ಅವಧಿಯಲ್ಲಿ ಹೆಚ್ಚು ನೀರು ಕುಡಿದರೆ ಆರೋಗ್ಯ ಕೆಡುತ್ತದೆ. ಇದು ಮೂತ್ರಪಿಂಡಗಳ ಮೇಲೆ ಪರಿಣಾಮ ಬೀರುತ್ತದೆ ಎಂದು ವೈದ್ಯರು ಹೇಳುತ್ತಾರೆ.
ಆಶ್ಲೇ ಸಾವಿಗೆ ನೀರಿನ ವಿಷತ್ವವೇ ಕಾರಣ ಎನ್ನುವುದು ಸಾಬೀತಾಗಿದೆ. ಹೆಚ್ಚಿನ ಪ್ರಮಾಣದ ನೀರನ್ನು ಕುಡಿದಾಗ ಈ ಸ್ಥಿತಿ ಸಂಭವಿಸುತ್ತದೆ. ಇದು ಜೀವಕ್ಕೆ ಮಾರಕವಾಗುತ್ತದೆ.