ಬಾಹ್ಯಾಕಾಶದಲ್ಲಿ ಹೊಸ ಮೈಲಿಗಲ್ಲು ನೆಡಲು ಇಸ್ರೋ ಸಜ್ಜು – ಚಂದ್ರಯಾನ-3 ಉಡಾವಣೆಗೆ ಭಾರತೀಯರ ಕ್ಷಣಗಣನೆ

ನ್ಯೂಸ್ ಆ್ಯರೋ‌ : ಭಾರತ ಸದ್ಯದಲ್ಲೇ ಬಾಹ್ಯಾಕಾಶದಲ್ಲಿ ಹೊಸ ಮೈಲಿಗಲ್ಲು ನೆಡಲಿದೆ. ಯಾಕೆಂದರೆ ಚಂದ್ರಯಾನ-3 ಉಡಾವಣೆಗೆ ಕ್ಷಣಗಣನೆ ಆರಂಭವಾಗಿದೆ. ಬಾಹ್ಯಾಕಾಶ ನೌಕೆ ಹೊಂದಿರುವ ಪೇಲೊಡ್ ಫೇರಿಂಗ್ ಜಿಯೋಸಿಂಕ್ರೂನಸ್ ಲಾಂಚ್ ವೆಹಿಕಲ್ ಮಾರ್ಕ್ III (GSLV Mk-III) ಜೊತೆಗೆ ಜೋಡಣೆ ಮಾಡಲಿದ್ದು, ಉಡಾವಣೆಗೆ ಸಿದ್ದತೆ ಆರಂಭವಾಗಿದೆ.

ಎಲ್ಲಿಂದ ಲಾಂಚ್?

ಚಂದ್ರಯಾನ -3 ಶ್ರೀಹರಿ ಕೋಟಾದ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದಿಂದ ಜು. 14ರಂದು ಇಸ್ರೋ ಲಾಂಚ್ ಮಾಡಲಿದೆ. ಈ ಹಿಂದೆ ಜು. 13ರಂದು ಉಡಾವಣೆ ಮಾಡುವುದಾಗಿ ತಿಳಿಸಲಾಗಿತ್ತು. ಚಂದ್ರನ ದಕ್ಷಿಣ ಧ್ರುವದ ಅಧ್ಯಯನ ನಡೆಸುವುದೇ ಈ ಯೋಜನೆಯ ಉದ್ದೇಶ.

ಯುಆರ್ ರಾವ್ ಉಪಗ್ರಹ ಕೇಂದ್ರದಲ್ಲಿ 3,900 ಕೆಜಿ ತೂಕವಿರುವ ಬಾಹ್ಯಾಕಾಶ ನೌಕೆಯನ್ನು ರಾಕೆಟ್ ನ ಪೇಲೋಡ್ ಫೇರಿಂಗ್ ನಲ್ಲಿ ಅಳವಡಿಸಲಾಗಿದೆ. ಈ ರಾಕೆಟ್ ಭೂಮಿಯಿಂದ ಸುಮಾರು 3,84,000 ಕಿ.ಮೀ. ದೂರಕ್ಕೆ ಸಂಚರಿಸಲಿರುವುದರಿಂದ ಇಸ್ರೋ ಅಗತ್ಯ ಸಿದ್ದತೆ ಕೈಗೊಂಡಿದೆ.

ಬೇರೆ ಬೇರೆ ದಿನಾಂಕ

ಹವಾಮಾನ ವೈಪರೀತ್ಯ ಕಾಣಿಸಿಕೊಳ್ಳುವ ಕಾರಣ ಇಸ್ರೋ ಉಡಾವಣೆಗೆ ಬೇರೆ ಬೇರೆ 6 ದಿನಗಳ ದಿನಾಂಕ ಇಟ್ಟುಕೊಂಡಿದೆ. ಈ ಬಗ್ಗೆ ಇಸ್ರೋ ಅಧ್ಯಕ್ಷ ಎಸ್.ಸೋಮನಾಥ್ ಮಾತನಾಡಿ, ”ಚಂದ್ರಯಾನ-3 ಉಡಾವಣೆಗೆ ಜು. 19ರ ವರೆಗಿನ ದಿನಾಂಕಗಳನ್ನು ಪರಿಗಣಿಸಲಾಗಿದೆ” ಎಂದು ತಿಳಿಸಿದ್ದಾರೆ.

ಏನೆಲ್ಲ ಅಧ್ಯಯನ?

ಚಂದ್ರಯಾನ-3ರ ಮೂಲಕ ಚಂದ್ರನ ಸುತ್ತಲೂ ಆವರಿಸಿರುವ ಶಿಲಾ ಪದರದ ಮೇಲಿನ ಗಟ್ಟಿಗೊಂಡಿಲ್ಲದ ಘನ ಪದಾರ್ಥದ ಅಧ್ಯಯನ ನಡೆಸುವ ಲೂನಾರ್ ರಿಗೊಲಿತ್, ಭೂಕಂಪನ ಅಧ್ಯಯನ ನಡೆಸುವ ಲೂನಾರ್ ಸೆಸಿಮಿಸಿಟಿ, ಹೊರ ಆವರಣದ ಪ್ಲಾಸ್ಮಾ, ಬಾಹ್ಯಾಕಾಶ ನೌಕೆ ಇಳಿದ ಪ್ರದೇಶದಲ್ಲಿ ಧಾತುರೂಪದ ಸಂಯೋಜನೆ ಮೊದಲಾದ ಅಧ್ಯಯನ ನಡೆಸುವ ಯೋಜನೆ ಇದೆ. ಜೊತೆಗೆ ರೋವರ್ ಕೂಡ ಚಂದ್ರನ ಅಂಗಳಕ್ಕೆ ಕಾಲಿಡಲಿದೆ.