ಚಂದ್ರಯಾನ 3 ನೌಕೆಯನ್ನು ಕಂಟ್ರೋಲ್ ಮಾಡುತ್ತೆ ಬೆಂಗಳೂರಿನ ಬ್ಯಾಲಾಳು ಕೇಂದ್ರ – ಹಲವರಿಗೆ ಗೊತ್ತಿಲ್ಲದ ಆಸಕ್ತಿಕರ ಸುದ್ದಿ ಇಲ್ಲಿದೆ..

ನ್ಯೂಸ್ ಆ್ಯರೋ‌ : ಚಂದ್ರನ ಅಂಗಳದಲ್ಲಿ ಇಳಿಯುವ ಉದ್ದೇಶದೊಂದಿಗೆ ನಭಕ್ಕೆ ಜುಲೈ 14ರಂದು ನೆಗೆದಿದ್ದ ಚಂದ್ರಯಾನ-3 ಯಶಸ್ವಿಯಾಗಿ ತನ್ನ ಯಾತ್ರೆ ಮುಂದುವರಿಸಿದೆ. ಆಗಸ್ಟ್ 23ರಂದು ನೌಕೆ ಸುರಕ್ಷಿತವಾಗಿ ಚಂದ್ರನ ಅಂಗಳದಲ್ಲಿ ಇಳಿಯಲಿದೆ.

ಗ್ರೌಂಡ್ ಫೆಸಿಲಿಟೀಸ್

ಗಗನಕ್ಕೆ ಚಿಮ್ಮಿದ ರಾಕೆಟ್ ಜೊತೆಗೆ ಚಂದ್ರಯಾನ-3 ಯಶಸ್ಸಿಗೆ ಅದರ ಭೂ ಸೌಲಭ್ಯಗಳು (ಗ್ರೌಂಡ್ ಫೆಸಿಲಿಟೀಸ್) ಕೂಡ ಕಾರಣ. ಅಂದರೆ ಭೂಮಿಯ ಸುತ್ತಲಿನ ಮತ್ತು ಚಂದ್ರನ ಸುತ್ತಲಿನ ಕಕ್ಷೆಯಿಂದ ಇಲ್ಲವೆ ಚಂದ್ರನ ಮೇಲ್ಮೈಯಿಂದ ಆ ನೌಕೆ ರೇಡಿಯೋ ತರಂಗದ ರೂಪದಲ್ಲಿ ಹೊರ ಸೂಸುವ ಪ್ರಮುಖ ವೈಜ್ಞಾನಿಕ ಮಾಹಿತಿ ಕಲೆ ಹಾಕುವುದು, ಅಗತ್ಯ ರೇಡಿಯೋ ಆಜ್ಞೆಗಳನ್ನು ನೌಕೆಗೆ ರವಾನಿಸುವುದು ಭೂ ಸೌಲಭ್ಯಗಳ ಮುಖ್ಯ ಕೆಲಸ.

ಈ ಸೌಲಭ್ಯಗಳ ಪೈಕಿ ಬೆಂಗಳೂರು ಸಮೀಪದ ಬ್ಯಾಲಾಳುವಿನಲ್ಲಿರುವ ಇಂಡಿಯನ್ ಡೀಪ್ ಸ್ಪೇಸ್ ನೆಟ್ ವರ್ಕ್ ಮತ್ತು ಚಂದ್ರಯಾನ-3 ಅಭಿಯಾನದ ಕೇಂದ್ರ ಸ್ಥಾನದಂತಿರುವ ಪೀಣ್ಯಾದಲ್ಲಿನ ಅದರ ನಿಯಂತ್ರಣ ಕೇಂದ್ರ ಮಾಕ್ಸ್-ಇವುಗಳ ಸಮರ್ಥ ಕಾರ್ಯ ನಿರ್ವಹಣೆ ಚಂದ್ರಯಾನ-3 ಯಶಸ್ಸಿಗೆ ಕಾರಣವಾಗುತ್ತದೆ.

ಬ್ಯಾಲಾಳುವಿನಲ್ಲಿರುವ ಇಂಡಿಯನ್ ಡೀಪ್ ಸ್ಪೇಸ್ ನೆಟ್ ವರ್ಕ್ ನೆಲೆಯಲ್ಲಿ 32 ಮೀಟರ್ ಮತ್ತು 18 ಮೀಟರ್ ಅಗಲವಿರುವ ಎರಡು ಬೃಹತ್ ಸಂಪರ್ಕ ಆಂಟೇನಾಗಳಿವೆ.

350 ಟನ್ ತೂಕದ 32 ಮೀಟರ್ ಅಗಲದ ಆಂಟೇನಾ ಚಂದ್ರಯಾನ-1, 2 ಮತ್ತು 3, ಮಂಗಳಯಾನ ನೌಕೆಗಳ ಯೋಜನೆಯಲ್ಲಿ ಉತ್ತಮ ಸೇವೆ ನೀಡಿದೆ. ಈ ತಾಂತ್ರಿಕ ವಿಸ್ಮಯದ ನಿರ್ಮಾಣದ ನೇತೃತ್ವವನ್ನು ಕನ್ನಡಿಗರಾದ ಎಸ್.ಕೆ. ಶಿವಕುಮಾರ್ ವಹಿಸಿದ್ದರು.

ಕಾರ್ಯ ವಿಧಾನ

ಲಕ್ಷಾಂತರ, ಕೋಟ್ಯಾಂತರ ಕಿ.ಮೀ. ದೂರದಲ್ಲಿರುವ ಅಂತರಿಕ್ಷ ನೌಕೆಗಳು ಹೊರಡಿಸುವ ಮಾಹಿತಿಯನ್ನು ಹೊತ್ತ ರೇಡಿಯೋ ತರಂಗಗಳು ಭೂಮಿಗೆ ತಲುಪುವಾಗ ಬಹಳಷ್ಟು ಕ್ಷೀಣವಾಗಿರುತ್ತವೆ. ಈ ಬೃಹತ್ ಆಂಟೇನಾ ಮಾಹಿತಿಗಳನ್ನು ಸಂಗ್ರಹಿಸುವ ಕೆಲಸ ಮಾಡುತ್ತದೆ. ಈ ಆಂಟೇನಾದಲ್ಲಿರುವ 7 ಕನ್ನಡಿಗಳನ್ನು ಹೊಂದಿರುವ ವಿಶೇಷ ವ್ಯವಸ್ಥೆ ನೌಕೆಯಿಂದ ಬರುವ ಕ್ಷೀಣ ರೇಡಿಯೋ ತರಂಗಗಳ ಶಕ್ತಿಯನ್ನು ವೃದ್ದಿಸುತ್ತದೆ. ಬಳಿಕ ಈ ವೈಜ್ಞಾನಿಕ ಮಾಹಿತಿಗಳನ್ನು ಬ್ಯಾಲಾಳುವಿನಲ್ಲಿರುವ ದತ್ತಾಂಶಗಳ ಕೇಂದ್ರದಲ್ಲಿ ಕ್ರಮಬದ್ದವಾಗಿ ಸಂಗ್ರಹಿಸಲಾಗುತ್ತದೆ. ನೌಕೆಯ ಸ್ಥಿತಿಯನ್ನು ಮತ್ತು ಯಾನದ ವಿವರಗಳನ್ನು ಪೀಣ್ಯಾದ ಮಾಕ್ಸ್ ಗೆ ರವಾನಿಸಲಾಗುತ್ತದೆ.

ಅದೇ ರೀತಿ ವಿಜ್ಞಾನಿಗಳು ನೌಕೆ ಮಾಡಬೇಕಾದ ಕೆಲಸಗಳನ್ನು ಈ ಆಂಟೇನಾಗೆ ರವಾನಿಸುತ್ತಾರೆ. ಅದನ್ನು ಆಂಟೇನಾ ರೇಡಿಯೋ ತರಂಗ ರೂಪದಲ್ಲಿ ಚಂದ್ರಯಾನ-3ಗೆ ತಿಳಿಸುತ್ತದೆ. ಹೀಗೆ ಆಂಟೇನಾ ಪ್ರಮುಖ ಕೊಂಡಿಯಾಗಿ ಕಾರ್ಯ ನಿರ್ವಹಿಸುತ್ತದೆ.