Sooryayan : ಸೂರ್ಯನ ಅಧ್ಯಯನಕ್ಕೆ ಹೊರಟ ಆದಿತ್ಯ ಎಲ್-1 – 4ನೇ ಹಂತದ ಕಕ್ಷೆ ಬದಲಾವಣೆ ಯಶಸ್ವಿ

ನ್ಯೂಸ್ ಆ್ಯರೋ‌ : ಚಂದ್ರಯಾನ-3 ಯಶಸ್ವಿಯಾದ ಬೆನ್ನಲ್ಲೇ ಇಸ್ರೋ ಸೂರ್ಯ ಮಿಷನ್ ಅಡಿಯಲ್ಲಿ ಸೂರ್ಯನ ಅಧ್ಯಯನಕ್ಕೆ ಕಳುಹಿಸಿದ ಬಾಹ್ಯಾಕಾಶ ನೌಕೆ ಆದಿತ್ಯ ಎಲ್-1 ತನ್ನ 4ನೇ ಕಕ್ಷೆಯ ಬದಲಾವಣೆಯನ್ನು ಪೂರೈಸಿದೆ. ಈ ಕುರಿತು ಇಸ್ರೋ ಎಕ್ಸ್ (ಟ್ವಿಟರ್)ನಲ್ಲಿ ಮಾಹಿತಿ ಹಂಚಿಕೊಂಡಿದೆ.

ಸೂರ್ಯನ ಅಧ್ಯಯನದ ಗುರಿ

ಸೂರ್ಯನನ್ನು ಅಧ್ಯಯನ ಮಾಡಲು ಲಗ್ರೇಂಜ್ ಪಾಯಿಂಟ್ 1(ಎಲ್ 1)ಗೆ ಹೊರಟಿರುವ ಆದಿತ್ಯ ಎಲ್-1 ಸೆಪ್ಟೆಂಬರ್ 19ರ ಮುಂಜಾನೆ 2 ಗಂಟೆ ಸುಮಾರಿಗೆ ನಿರ್ಣಾಯಕ ಟ್ರಾನ್ಸ್-ಲಗ್ರಾಂಜಿಯನ್ ಪಾಯಿಂಟ್ 1 ಅಳವಟಿಕೆಗೆ ಒಳಗಾಗಲಿದೆ ಎಂದು ಇಸ್ರೋ ಮಾಹಿತಿ ನೀಡಿದೆ.

ಯಾವುದೇ ಗ್ರಹಣ ಅಥವಾ ಅಡೆತಡೆ ಇಲ್ಲದೆ ಸೂರ್ಯನನ್ನು ನೊಡಬಹುದಾದ ಸ್ಥಳಕ್ಕೆ ಲಗ್ರೇಂಜ್ ಪಾಯಿಂಟ್ ಎಂದು ಹೆಸರು. ಹೀಗಾಗಿ ಆದಿತ್ಯ ಎಲ್-1 ಬಾಹ್ಯಾಕಾಶ ನೌಕೆಯನ್ನು ಲಗ್ರೇಂಜ್ ಪಾಯಿಂಟ್ 1ಕ್ಕೆ ಕಳುಹಿಸಲಾಗಿದೆ. ಸೆಪ್ಟಂಬರ್ 2ರಂದು ಇದನ್ನು ಶ್ರೀಹರಿ ಕೋಟಾದಿಂದ ಉಡಾವಣೆ ಮಾಡಲಾಗಿತ್ತು.

ಲಗ್ರೇಂಜ್ ಪಾಯಿಂಟ್ 1 ತಲುಪಲು ಬಾಹ್ಯಾಕಾಶ ನೌಕೆಗೆ ಸುಮಾರು 125 ದಿನ ತಗುಲಲಿದೆ. ಸೌರ ಜ್ವಾಲೆ, ಸೂರ್ಯನಿಂದ ಹೊರ ಹೊಮ್ಮುವ ಕರೋನಲ್ ಮಾಸ್ ಎಜೆಕ್ಷನ್ ಮುಂತಾದ ವಿಷಯಗಳನ್ನು ಅಧ್ಯಯನ ಮಾಡುವುದು ಇಸ್ರೋ ವಿಜ್ಞಾನಿಗಳ ಗುರಿ. ಸೂರ್ಯನನ್ನು ಅಧ್ಯಯನ ಮಾಡುವ ಭಾರತದ ಮೊದಲ ಯೋಜನೆ ಇದಾಗಿದೆ.