ಪವನ್ ಕಲ್ಯಾಣ್ ದಾಂಪತ್ಯದಲ್ಲಿ ಮತ್ತೆ ಬಿರುಕು.‌.!! – 3ನೇ ಪತ್ನಿಯಿಂದಲೂ ದೂರವಾದರಾ ಟಾಲಿವುಡ್ ಸ್ಟಾರ್?

ನ್ಯೂಸ್ ಆ್ಯರೋ‌ : ಟಾಲಿವುಡ್ ಪವರ್ ಸ್ಟಾರ್ ಪವನ್ ಕಲ್ಯಾಣ್ ಅಪಾರ ಅಭಿಮಾನಿಗಳನ್ನು ಹೊಂದಿರುವ ನಟ. ಇತ್ತೀಚೆಗೆ ಅವರು ಇನ್ಸ್ಟಾಗ್ರಾಮ್ ನಲ್ಲಿ ಖಾತೆ ತೆರೆದ ಕೂಡಲೇ ಲಕ್ಷಾಂತರ ಮಂದಿ ಫಾಲೋ ಮಾಡಿದ್ದು ಇದಕ್ಕೆ ಉದಾಹರಣೆ. ಇದೀಗ ಪವನ್ ಕಲ್ಯಾಣ್ ಮತ್ತೊಮ್ಮೆ ಸುದ್ದಿಯಾಗಿದ್ದಾರೆ. ಅವರ ಮೂರನೇ ಮದುವೆಯೂ ಮುರಿದು ಬಿತ್ತು ಎನ್ನುವ ಗಾಸಿಪ್ ಹರಡಿದೆ.

ಕಾರಣವೇನು?

ಪವನ್ ತಮ್ಮ ಮೂರನೇ ಪತ್ನಿ ಅನ್ನಾ ಲೇಜ್ನೇವಾ ಅವರಿಂದಲೂ ದೂರವಾಗಿದ್ದಾರೆ ಎನ್ನಲಾಗುತ್ತಿದೆ. ಇದಕ್ಕೆ ಕಾರಣವೂ ಇಲ್ಲದಿಲ್ಲ. ಹಿಂದೆಲ್ಲ ಪತಿ ಮತ್ತು ಪತ್ನಿ ಸಮಾರಂಭಗಳಲ್ಲಿ ಜೊತೆಯಾಗಿ ಕಾಣಿಸಿಕೊಳ್ಳುತ್ತಿದ್ದರು. ಆದರೆ ಇತ್ತೀಚೆಗೆ ನಡೆದ ಸಂಬಂಧಿಯೋರ್ವರ ಮದುವೆ ಮತ್ತು ರಾಮ್ ಚರಣ್-ಉಪಾಸನಾ ದಂಪತಿಯ ಮಗುವಿನ ನಾಮಕರಣ ಸಮಾರಂಭಕ್ಕೆ ಪವನ್ ಒಬ್ಬರೇ ಆಗಮಿಸಿದ್ದರು. ಮಾತ್ರವಲ್ಲ ಪವನ್ ಅವರ ರಾಜಕೀಯ ಪ್ರಚಾರ ಕಾರ್ಯಕ್ರಮಕ್ಕೂ ಅನ್ನಾ ಆಗಮಿಸುತ್ತಿಲ್ಲ. ಇದು ಹಲವು ಅನುಮಾನಕ್ಕೆ ಕಾರಣವಾಗಿದೆ.

ಸದ್ಯ ಅನ್ನಾ ಸಿಂಗಾಪೂರ್, ದುಬೈ ಅಥವಾ ರಷ್ಯಾದಲ್ಲಿ ಮಕ್ಕಳೊಂದಿಗೆ ನೆಲೆಸಿದ್ದಾರೆ ಎನ್ನಲಾಗಿದೆ. ಆದರೆ ಈ ಸುದ್ದಿಯನ್ನು ಪವನ್ ಆಪ್ತ ನಿರ್ಮಾಪಕ ಬಂಡ್ಲಾ ಗಣೇಶ್ ನಿರಾಕರಿಸಿದ್ದು, ಇದು ನಿಜವಲ್ಲ ಎಂದಿದ್ದಾರೆ. ಆದರೆ ಇದುವರೆಗೆ ಪವನ್ ಈ ಬಗ್ಗೆ ಮಾತನಾಡದಿರುವುದು ಗುಸುಗುಸು ಹೆಚ್ಚಲು ಕಾರಣವಾಗುತ್ತಿದೆ.

ಪವನ್ ಮೊದಲು ವಿವಾಹವಾಗಿದ್ದು ನಂದಿನಿ ಜೊತೆ. ಕೆಲವು ವರ್ಷಗಳ ಬಳಿಕ ಡಿವೋರ್ಸ್ ನೀಡಿ ನಟಿ ರೇಣು ದೇಸಾಯಿ ಜೊತೆ ಹಸೆಮಣೆಗೇರಿದರು. ಕೆಲವು ವರ್ಷ ಒಟ್ಟಿಗಿದ್ದ ದಂಪತಿಗೆ ಎರಡು ಮಕ್ಕಳು ಹುಟ್ಟಿದವು. ಬಳಿಕ ಇಬ್ಬರು ದೂರವಾದರು. ನಂತರ ರಷ್ಯಾ ಮೂಲದ ಅನ್ನಾ ಲೇಜ್ನೇವಾ ಅವರನ್ನು ವರಿಸಿದರು. ಅವರಿಗೆ ಈಗ ಇಬ್ಬರು ಮಕ್ಕಳಿದ್ದಾರೆ.