ಆಸ್ಪತ್ರೆಗೆ ದಾಖಲಾಗಿದ್ದ ಮಿಲಿಟರಿ ಪತಿಯನ್ನು ನೋಡಲು ಬಾರದ ಶಿಕ್ಷಕಿ ಪತ್ನಿ – ವಿಚ್ಛೇದನಕ್ಕೆ ಅರ್ಜಿ ಹಾಕಿದ್ದ 89 ವರ್ಷದ ಪತಿಗೆ ಸೋಲು, ನ್ಯಾಯಾಲಯ ಹೇಳಿದ್ದೇನು?

ನ್ಯೂಸ್ ಆ್ಯರೋ : 82 ವರ್ಷದ ಪತ್ನಿಗೆ ವಿಚ್ಛೇದನ ನೀಡುವಂತೆ 89 ವರ್ಷದ ವ್ಯಕ್ತಿಯೊಬ್ಬ ಸಲ್ಲಿಸಿದ್ದ ಮನವಿಯನ್ನು ಸುಪ್ರೀಂ ಕೋರ್ಟ್ ತಿರಸ್ಕರಿಸಿರುವುದು ಮತ್ತು ಅದಕ್ಕೆ ಕೋರ್ಟ್ ನೀಡಿರುವ‌ ಕಾರಣ ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆಗೆ ಕಾರಣವಾಗಿದೆ.

ಮಾಜಿ ಸಶಸ್ತ್ರ ಪಡೆ ಅಧಿಕಾರಿಯೊಬ್ಬರು ತಮ್ಮ ಪತ್ನಿಗೆ ವಿಚ್ಛೇದನ ನೀಡಲು ನ್ಯಾಯಾಲಯಕ್ಕೆ ಮೊರೆ ಹೋದ ಇಪ್ಪತ್ತೇಳು ವರ್ಷಗಳ ಅನಂತರ ಸುಪ್ರೀಂ ಕೋರ್ಟ್ ಅವರ ಅರ್ಜಿಯನ್ನು ವಜಾಗೊಳಿಸಿದೆ.

1963 ರ ಮಾರ್ಚ್ ನಲ್ಲಿ ವಿವಾಹವಾಗಿದ್ದ ಈ ದಂಪತಿಗೆ ಇಬ್ಬರು ಹೆಣ್ಣುಮಕ್ಕಳು ಒಬ್ಬ ಮಗ ಇದ್ದಾನೆ.

1984ರ ಜನವರಿಯಲ್ಲಿ ಸಶಸ್ತ್ರ ಪಡೆ ಅಧಿಕಾರಿಗೆ ಅಮೃತಸರದಿಂದ ಮದ್ರಾಸ್‌ಗೆ ವರ್ಗಾವಣೆ ಮಾಡಲಾಯಿತು. ಬಳಿಕ ಇವರ ದಾಂಪತ್ಯದಲ್ಲಿ ಸಮಸ್ಯೆಗಳು ಪ್ರಾರಂಭವಾದವು. ಶಿಕ್ಷಕಿಯಾಗಿದ್ದ ಅವರ ಪತ್ನಿ ಗಂಡನೊಂದಿಗೆ ಹೋಗಲು ನಿರಾಕರಿಸಿದರು. ಅವರು ಅತ್ತೆ ಹಾಗೂ ಮಗನೊಂದಿಗೆ ಇರಲು ನಿರ್ಧರಿಸಿದರು.

ಪತ್ನಿಯ ಮನವೊಲಿಸಲು ಸಾಕಷ್ಟು ಪ್ರಯತ್ನ ನಡೆಸಿದ ಪತಿ ಇದರಲ್ಲಿ ವಿಫಲವಾದಾಗ ಅವರು ಪತ್ನಿಯನ್ನು ತೊರೆಯಲು ನಿರ್ಧರಿಸಿದರು ಹಾಗೂ ವಿಚ್ಛೇದನ ಕೋರಿ ಕೋರ್ಟ್ ಗೆ ಅರ್ಜಿ ಸಲ್ಲಿಸಿದರು.

ತಾನು ಹೃದಯಾಘಾತದಿಂದ ಸೇನಾ ಆಸ್ಪತ್ರೆಗೆ ದಾಖಲಾದಾಗ ಪತ್ನಿ ತನ್ನನ್ನು ಕಾಣಲು ಬಂದಿಲ್ಲ ಹಾಗೂ ತನ್ನನ್ನು ಕರೆಯಲೂ ಇಲ್ಲ. ನನ್ನ ಗೌರವಕ್ಕೆ ಧಕ್ಕೆ ಉಂಟು ಮಾಡಲು ತನ್ನ ವಿರುದ್ಧ ಮೇಲಧಿಕಾರಿಗಳಿಗೆ ದೂರು ನೀಡಿದ್ದಳು ಎಂದು ಅಧಿಕಾರಿ ಕೋರ್ಟ್ ನಲ್ಲಿ ಪತ್ನಿಯ ವಿರುದ್ಧ ದೂರು ದಾಖಲಿಸಿದರು.

ಮಾರ್ಚ್ 1997 ರಿಂದ ಅವರು ಜಿಲ್ಲಾ ನ್ಯಾಯಾಲಯದಲ್ಲಿ ವಿಚ್ಛೇದನ ಅರ್ಜಿ ಸಲ್ಲಿಸಿದ್ದು, ಬಳಿಕ ಅವರಿಬ್ಬರೂ ಬೇರೆಬೇರೆಯೇ ವಾಸವಾಗಿದ್ದಾರೆ. ತನಗೆ ಈಗ ವಯಸ್ಸಾಗಿದೆ. ತಾನು ವಿಚ್ಛೇದಿತಳಾಗಿ ಸಾಯಲು ಬಯಸುವುದಿಲ್ಲ ಎಂದು ಮಹಿಳೆ ಕೋರ್ಟ್ ಗೆ ತಿಳಿಸಿದ್ದರು.

ಚಂಡೀಗಢ ಜಿಲ್ಲಾ ನ್ಯಾಯಾಲಯವು 2000ರ ಫೆಬ್ರವರಿಯಲ್ಲಿ ಅವರಿಗೆ ವಿಚ್ಛೇದನವನ್ನು ನೀಡಿತು. ಆದರೆ ಪತ್ನಿಯ ಮನವಿಯ ಮೇರೆಗೆ ಪಂಜಾಬ್ ಮತ್ತು ಹರಿಯಾಣ ಹೈಕೋರ್ಟ್‌ನ ಏಕಸದಸ್ಯ ಪೀಠವು 2000ರ ಡಿಸೆಂಬರ್ ನಲ್ಲಿ ಈ ಆದೇಶವನ್ನು ರದ್ದುಗೊಳಿಸಿತು. ಬಳಿಕ ಏಕಸದಸ್ಯ ಪೀಠದ ಆದೇಶವನ್ನು ಅನುಸರಿಸಿ ಪತಿ ಸುಪ್ರೀಂ ಕೋರ್ಟ್ ಮೆಟ್ಟಿಲೇರಿದ್ದರು. ಈಗ ಸುಪ್ರೀಂ ಕೋರ್ಟ್ ಕೂಡ ಅವರಿಬ್ಬರನ್ನು ಬೇರೆ ಬೇರೆ ಮಾಡಲು ನಿರಾಕರಿಸಿದೆ.