ಬಾಳೆಹಣ್ಣಿಗೆ ಹೆಚ್ಚಿದ ಬೇಡಿಕೆ – ಐದು ಲಕ್ಷ ಬಂಡವಾಳ ಹೂಡಿ 15 ಲಕ್ಷ ಗಳಿಸಿದ ರೈತ..!
- ಕರ್ನಾಟಕ
- August 12, 2023
- No Comment
- 129
ನ್ಯೂಸ್ ಆ್ಯರೋ : ಟೊಮ್ಯಾಟೋ ಬೆಲೆ ಏರಿಕೆಯಿಂದ ಕಂಗಾಲಾಗಿದ್ದ ಗ್ರಾಹಕರು ಇನ್ನೇನು ನಿಟ್ಟುಸಿರು ಬಿಡಬೇಕು ಎಂದುಕೊಳ್ಳುವಷ್ಟರಲ್ಲಿ ಇದೀಗ ಬಾಳೆಹಣ್ಣಿನ ಸರದಿ. ಇನ್ನೇನು ಸಾಲು ಸಾಲು ಹಬ್ಬ ಆರಂಭವಾಗಲಿದ್ದು, ಟೊಮ್ಯಾಟೋ ಸ್ಥಾನವನ್ನು ಬಾಳೆಹಣ್ಣು ತುಂಬಲಿದೆ.
ಬಾಳೆಹಣ್ಣಿಗೆ ಹೆಚ್ಚಿನ ಬೇಡಿಕೆ
ಕೆಲವು ತಿಂಗಳಿನಿಂದ ಏರಿಕೆಯಲ್ಲಿದ್ದ ಟೊಮ್ಯಾಟೋ ಬೆಲೆ ಇಳಿಮುಖವಾಗತೊಡಗಿದೆ. ಇತ್ತ ಬಾಳೆಹಣ್ಣಿಗೆ ಬೇಡಿಕೆ ಹೆಚ್ಚಾಗುತ್ತಿದ್ದು, ಬೆಲೆಯೂ ಏರಿಕೆಯ ಹಾದಿಯಲ್ಲಿದೆ. ಟೊಮ್ಯಾಟೋ ಬೆಳೆಗಾರರಂತೆ ಬಾಳೆಹಣ್ಣು ಕೃಷಿಕರೂ ಲಾಭ ಗಳಿಸಲಿದ್ದಾರೆ ಎನ್ನುವ ಮಾತು ಜೋರಾಗಿ ಕೇಳಿ ಬಂದಿದೆ.
ಇದಕ್ಕೆ ಉದಾಹರಣೆ ಎಂಬಂತೆ ಎರಡೂವರೆ ಎಕ್ರೆಯಲ್ಲಿ ಏಲಕ್ಕಿ ತಳಿಯ ಬಾಳೆಹಣ್ಣು ಬೆಳೆದಿರುವ ಕೋಲಾರ ಜಿಲ್ಲೆಯ ಕೆಜಿಎಫ್ ತಾಲೂಕಿನ ದೊಡ್ಡಕಾರಿ ಗ್ರಾಮದ ಪ್ರಭಾಕರ್ 5 ಲಕ್ಷ ರೂ. ಬಂಡವಾಳ ಹೂಡಿ 15 ಲಕ್ಷ ರೂ. ಆದಾಯ ಗಳಿಸಿದ್ದಾರೆ.
ರೈತರು ಈಗ ತಮ್ಮ ತೋಟದಲ್ಲೇ ಕೆಜಿ ಬಾಳೆಹಣ್ಣನ್ನು 75-80 ರೂ.ಗೆ ಮಾರಾಟ ಮಾಡುತ್ತಿದ್ದಾರೆ. ಸದ್ಯ ಮಾರುಕಟ್ಟೆಯಲ್ಲಿ ಕೆಜಿ ಬಾಳೆಹಣ್ಣಿಗೆ 100 ರೂ. ಇದ್ದು, ಹಬ್ಬಗಳು ಆರಂಭವಾದರೆ ಬೆಲೆ ಇನ್ನಷ್ಟು ಹೆಚ್ಚಾಗುವ ಸಾಧ್ಯತೆ ಇದೆ.
ಕಾರಣವೇನು?
ಬಾಳೆ ಬೆಳೆಯುವ ರೈತರ ಸಂಖ್ಯೆ ಕಡಿಮೆ. ಅಲ್ಲದೆ ಹಬ್ಬದ ಸಂದರ್ಭದಲ್ಲಿ ಪೂಜೆ ಸೇರಿದಂತೆ ಧಾರ್ಮಿಕ ಕಾರ್ಯಗಳಿಗೆ ಬಾಳೆಹಣ್ಣು ಬೇಕೆ ಬೇಕು. ಹೀಗಾಗಿ ಬೇಡಿಕೆ ಸೃಷ್ಟಿಯಾಗಿದೆ.