ಹರಕೆಯ ಕುರಿಯಾಗಲಿದೆ 7 ಸ್ಟಾರ್ ಸುಲ್ತಾನ್ ಟಗರು – ಸಿನಿಮಾದಲ್ಲೂ ನಟಿಸಿದ್ದ ಟಗರಿನ ರಕ್ಷಣೆಗೆ ಕ್ಯಾಂಪೇನ್
- ಕರ್ನಾಟಕ
- June 26, 2023
- No Comment
- 175
ನ್ಯೂಸ್ ಆ್ಯರೋ : ಸ್ಯಾಂಡಲ್ ವುಡ್ ನಟ ಧನಂಜಯ್ ನಿರ್ಮಾಣದ ‘ಟಗರು ಪಲ್ಯ’ ಚಿತ್ರದಲ್ಲಿ ಕಾಣಿಸಿಕೊಂಡ 7 ಸ್ಟಾರ್ ಸುಲ್ತಾನ್ ಹೆಸರಿನ ಟಗರನ್ನು ಅದರ ಮಾಲಕ ಮೊಹಮ್ಮದ್ ಯೂನಿಸ್ ಗಡೇದ್ ಬಕ್ರೀದ್ ಹಬ್ಬಕ್ಕೆ ಬಲಿ ಕೊಡಲು ತೀರ್ಮಾನಿದ್ದು, ಟಗರಿನ ಅಭಿಮಾನಿಗಳು ಬೇಸರ, ವಿರೋಧ ವ್ಯಕ್ತಪಡಿಸಿದ್ದಾರೆ.
ಜನಪ್ರಿಯ ಟಗರು
ಬಾಗಲಕೋಟೆ ಜಿಲ್ಲೆಯ ಸುತಗುಂಡಾರ ಗ್ರಾಮದಲ್ಲಿರುವ ಈ 7 ಸ್ಟಾರ್ ಸುಲ್ತಾನ್ ಟಗರು ಸಿನಿಮಾದಲ್ಲಿ ಕಾಣಿಸಿಕೊಂಡಿದ್ದು ಮಾತ್ರವಲ್ಲ ಸಾಕಷ್ಟು ಕಾಳಗಗಳಲ್ಲಿ ಭಾಗವಹಿಸಿ ಬಹುಮಾನ ಗಳಿಸಿಕೊಂಡಿದೆ. ಬೈಕ್, ಚಿನ್ನ ಸೇರಿದಂತೆ ಹಲವು ಉಡುಗೊರೆ ತನ್ನದಾಗಿಸಿಕೊಂಡಿದೆ.
ಈ ಟಗರನ್ನು ರಾಂಪುರ ಗ್ರಾಮದ ಬಸು ಎಂಬವರಿಂದ ಗಡೇದ್ ಖರೀದಿಸಿದ್ದರು. ಇದಕ್ಕಾಗಿ ಬರೋಬ್ಬರಿ 1,88,500 ರೂ. ನೀಡಿದ್ದರು. ಇದನ್ನು ಕಡಿಯದಂತೆ ಅಭಿಮಾನಿಗಳು ಕೇಳಿಕೊಂಡಿದ್ದಾರೆ.
34ಕ್ಕೂ ಹೆಚ್ಚು ಕಡೆ ಪ್ರಥಮ ಸ್ಥಾನ
7 ಸ್ಟಾರ್ ಸುಲ್ತಾನ್ ರಾಜ್ಯಾದ್ಯಂತ ನಡೆದ ಸ್ಪರ್ಧೆಗಳಲ್ಲಿ ಭಾಗವಹಿಸಿ 34ಕ್ಕೂ ಹೆಚ್ಚು ಬಾರಿ ಪ್ರಥಮ ಸ್ಥಾನ ಪಡೆದಿದೆ. 20 ಲಕ್ಷ ರೂ.ಗಿಂತ ಹೆಚ್ಚು ಹಣ, 1 ಬುಲೆಟ್ ಬೈಕ್, 1 ಎಚ್.ಎಫ್. ಡಿಲಕ್ಸ್, ಎಚ್.ಎಫ್. 100, 15 ಗ್ರಾಂ ಚಿನ್ನ ಗೆದ್ದುಕೊಂಡಿದೆ.
ಅನೇಕರು ಸಾಮಾಜಿಕ ಜಾಲತಾಣಗಳಲ್ಲಿ ಟಗರನ್ನು ಉಳಿಸಬೇಕು ಎಂದು ಮನವಿ ಮಾಡಿದ್ದಾರೆ. ಆದರೆ ಹರಕೆ ತೀರಿಸಲು ಟಗರು ಬಲಿ ಕೊಡಬೇಕೆಂದು ಮಾಲಕರು ತಿಳಿಸಿದ್ದಾರೆ.