Heath Streak : ಜಿಂಬಾಬ್ವೆ ಕ್ರಿಕೆಟ್ ತಂಡದ ಮಾಜಿ ನಾಯಕ ಸ್ಟ್ರೀಕ್ ಇನ್ನಿಲ್ಲ – ಆಲ್ ರೌಂಡರ್ ನಿಧನಕ್ಕೆ ಸಹ ಆಟಗಾರರ ಕಂಬನಿ

ನ್ಯೂಸ್ ಆ್ಯರೋ : ಜಿಂಬಾಂಬ್ವೆ ಕ್ರಿಕೆಟ್ ತಂಡದ ಮಾಜಿ ನಾಯಕ ಹೀತ್ ಸ್ಟ್ರೀಕ್ ಕ್ಯಾನ್ಸರ್ ನಿಂದ ನಿಧನ ಹೊಂದಿದ್ದಾರೆ. 49 ವರ್ಷದ ಸ್ಟ್ರೀಕ್ ದಕ್ಷಿಣ ಆಫ್ರಿಕಾದಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರು.

ಜಿಂಬಾಬ್ವೆ ಕ್ರಿಕೆಟ್ ತಂಡದ ಹಾಲಿ ನಾಯಕ ಸೀನ್ ಎರ್ವಿನ್, ಹೆನ್ರಿ ಒಲೊಂಗಾ ಟ್ವಿಟರ್ ನಲ್ಲಿ ತಮ್ಮ ದುಃಖವನ್ನು ವ್ಯಕ್ತಪಡಿಸಿದ್ದಲ್ಲದೆ ಸಂತಾಪ ಸೂಚಿಸಿದ್ದಾರೆ. ಆದಾಗ್ಯೂ, ಸ್ಟ್ರೀಕ್ ಅವರ ಕುಟುಂಬದಿಂದ ಇನ್ನೂ ಯಾವುದೇ ಅಧಿಕೃತ ಹೇಳಿಕೆ ಬಂದಿಲ್ಲ.

ಜಿಂಬಾಬ್ವೆಯ ಮಾಜಿ ನಾಯಕ 65 ಟೆಸ್ಟ್ ಮತ್ತು 189 ಏಕದಿನ ಪಂದ್ಯಗಳಲ್ಲಿ ದೇಶವನ್ನು ಪ್ರತಿನಿಧಿಸಿದ್ದಾರೆ. ಟೆಸ್ಟ್ ಮತ್ತು ಏಕದಿನ ಎರಡರಲ್ಲೂ ಜಿಂಬಾಬ್ವೆಯ ಸಾರ್ವಕಾಲಿಕ ಅತಿ ಹೆಚ್ಚು ವಿಕೆಟ್ ಪಡೆದ ಬೌಲರ್ ಆಗಿ ಅವರು ಮುಂದುವರೆದಿದ್ದಾರೆ. ಮಾಜಿ ಬಲಗೈ ವೇಗಿ ಟೆಸ್ಟ್ನಲ್ಲಿ 216 ಮತ್ತು ಏಕದಿನದಲ್ಲಿ 239 ವಿಕೆಟ್ಗಳನ್ನು ಪಡೆದಿದ್ದಾರೆ.

ಟೆಸ್ಟ್ ಮತ್ತು ಏಕದಿನ ಪಂದ್ಯಗಳಲ್ಲಿ 100 ವಿಕೆಟ್ ಪಡೆದ ಮೊದಲ ಜಿಂಬಾಬ್ವೆ ಕ್ರಿಕೆಟಿಗ ಎಂಬ ಹೆಗ್ಗಳಿಕೆಗೆ ಸ್ಟ್ರೀಕ್ ಪಾತ್ರರಾಗಿದ್ದಾರೆ. ಟೆಸ್ಟ್ ಕ್ರಿಕೆಟ್ ನಲ್ಲಿ 100 ವಿಕೆಟ್ ಮತ್ತು 1000 ಟೆಸ್ಟ್ ರನ್ ಪೂರೈಸಿದ ಏಕೈಕ ಜಿಂಬಾಬ್ವೆ ಕ್ರಿಕೆಟಿಗ ಮತ್ತು ಏಕದಿನ ಪಂದ್ಯಗಳಲ್ಲಿ 2000 ರನ್ ಮತ್ತು 200 ವಿಕೆಟ್ ಪಡೆದ ದೇಶದ ಏಕೈಕ ಆಟಗಾರ.

ಸ್ಟ್ರೀಕ್ 1993 ರಲ್ಲಿ ಟೆಸ್ಟ್ ಮತ್ತು ಏಕದಿನ ಕ್ರಿಕೆಟ್ ಗೆ ಪಾದಾರ್ಪಣೆ ಮಾಡಿದರು ಮತ್ತು ಬ್ಯಾಟ್ ಮತ್ತು ಬಾಲ್ ಎರಡರಲ್ಲೂ ಸ್ಥಿರ ಪ್ರದರ್ಶನದ ನಂತರ, 2000 ರಲ್ಲಿ ತಂಡದ ನಾಯಕರಾಗಿ ನೇಮಕಗೊಂಡಿದ್ದರು. ‌ಅಲಿಸ್ಟರ್ ಕ್ಯಾಂಬೆಲ್, ಆ್ಯಂಡಿ ಫ್ಲವರ್, ಗ್ರ್ಯಾಂಟ್ ಫ್ಲವರ್, ಹೆನ್ರಿ ಒಲೊಂಗಾ, ಡಗ್ಲಾಸ್ ಮಾರಿಲಿಯರ್, ಟಟಿಂಡಾ ಟೈಬು ಇದ್ದ ಕಾಲದಲ್ಲಿ ಹೀತ್ ಸ್ಟ್ರೀಕ್ ನಾಯಕನಾಗಿದ್ದು ಜಿಂಬಾಬ್ವೆ ತಂಡ ಭಾರತ ತಂಡವನ್ನು ಕೂಡ ಮಣಿಸಿತ್ತು.