ಕಬ್ಬಿಣದ ಕಾವಲಿಯನ್ನೂ ನಾನ್ ಸ್ಟಿಕ್ ತವಾ ಮಾಡಬಹುದು – ಹೇಗೆ ಗೊತ್ತಾ? ಮಾಹಿತಿ ಇಲ್ಲಿದೆ..

ನ್ಯೂಸ್ ಆ್ಯರೋ‌ : ಗರಿಗರಿಯಾದ ದೋಸೆ ಮಾಡಬಹುದು ಎನ್ನುವ ಕಾರಣಕ್ಕೆ ನಾನ್ ಸ್ಟಿಕ್ ತವಾಗಳು ಭಾರೀ ಜನಪ್ರಿಯವಾಗಿದ್ದವು. ಆದರೆ ಇದರಲ್ಲಿನ ಟೆಫ್ಲಾನ್ ಪದರ ಆರೋಗ್ಯಕ್ಕೆ ಹಾನಿಕಾರ ಎಂಬ ಕಾರಣಕ್ಕೆ ಈಗ ಹಲವರು ಸಾಂಪ್ರದಾಯಿಕ ಕಬ್ಬಿಣದ ಕಾವಲಿಯೆಡೆಗೆ ಮುಖ ಮಾಡಿದ್ದಾರೆ. ಆದರೆ ಕಬ್ಬಿಣದ ಕಾವಲಿಯಲ್ಲಿ ನಾನ್ ಸ್ಟಿಕ್ ನಂತೆ ಗರಿಗರಿ ದೋಸೆ ಮಾಡಲು ಆಗುವುದಿಲ್ಲ ಎನ್ನುವುದು ಬಹುತೇಕರ ದೂರು. ಇದಕ್ಕೂ ಪರಿಹಾರವಿದೆ. ಕೆಲವೊಂದು ಮಾರ್ಗಗಳ ಮೂಲಕ ಕಬ್ಬಿಣದ ಕಾವಲಿಯನ್ನೂ ನಾನ್ ಸ್ಟಿಕ್ ತವಾದಂತೆ ಪರಿವರ್ತಿಸಬಹುದು. ಅದು ಹೇಗೆ ಎನ್ನುವುದರ ಮಾಹಿತಿ ಇಲ್ಲಿದೆ.

ಬಿಸಿ ಕಾವಲಿಯ ಮೇಲೆ ನೀರು ಹಾಕಬೇಡಿ

ಬಹುತೇಕರು ದೋಸೆ ಎಲ್ಲಾ ಹೊಯ್ದ ಮೇಲೆ ಕಾವಲಿ ಬಿಸಿ ಇರುವಂತೆಯೇ ತೊಳೆಯಲು ನಲ್ಲಿಯ ಕೆಳಗೆ ಇಡುತ್ತಾರೆ. ಇದು ತಪ್ಪು. ಕಾವಲಿ ತಣ್ಣಗಾಗಲು ಬಿಡಿ. ಬಳಿಕ ಸ್ವಲ್ಪ ಬಿಸಿ ನೀರನ್ನು ಅದರ ಮೇಲೆ ಹಾಕಿ ಸ್ವಲ್ಪ ಹೊತ್ತು ನೆನೆಸಿ. ಆಮೇಲೆ ಗರಗರ ಉಜ್ಜದೆ ಸ್ವಲ್ಪ ಸೋಪು ಹಾಕಿ ಮೆದುವಾಗಿ ಉಜ್ಜಿ ತೊಳೆಯಿರಿ.

ನೀರಿನ ಪಸೆ ಇಲ್ಲದಿರಲಿ

ತೊಳೆದ ಕಬ್ಬಿಣದ ಕಾವಲಿಯನ್ನು ಹಾಗೇ ಇಟ್ಟರೆ ಬೇಗ ತುಕ್ಕು ಹಿಡಿಯುವ ಸಾಧ್ಯತೆ ಇದೆ. ಹೀಗಾಗಿ ನೀರ ಪಸೆ ಎಲ್ಲವನ್ನೂ ಬಟ್ಟೆಯಿಂದ ಒರೆಸಿ ಇಡಿ.

ಸೀಸನ್ ಮಾಡಿ

ಕಬ್ಬಿಣದ ಕಾವಲಿ ನಾನ್ ಸ್ಟಿಕ್ ನಂತೆ ವರ್ತಿಸಲು ಅದನ್ನು ಸೀಸನ್ ಮಾಡಿಡುವುದು ತುಂಬಾ ಅಗತ್ಯ.

ಸೀಸನ್ ಮಾಡುವ ವಿಧಾನ:

ನೀರ ಪಸೆ ಇಲ್ಲದ ಕಾವಲಿ ಮೇಲೆ ಒಂದೆರಡು ಬಿಂದು ಎಳ್ಳೆಣ್ಣೆಯನ್ನು ಹಾಕಿ ಎಲ್ಲಾ ಭಾಗಗಳಿಗೂ ಹರಡುವಂತೆ ಉಜ್ಜಿ. ನಂತರ ಒಲೆಯ ಮೇಲೆ ಹದ ಉರಿಯಲ್ಲಿ ಸ್ವಲ್ಪ ಬಿಸಿ ಮಾಡಿ ಇನ್ನೇನು ಹೊಗೆ ಎಳುತ್ತದೆ ಎನ್ನುವಾಗ ಉರಿ ಬಂದ್ ಮಾಡಿ.

ಎಣ್ಣೆಯ ತೆಳುವಾದ ಪದರ ಇರಲಿ.

ಸೀಸನ್ ಮಾಡಿದ ಕಾವಲಿಯನ್ನು ಹಾಗೆಯೇ ತಣ್ಣಗಾಗಲು ಬಿಡಿ. ಬಳಿಕ ಹೆಚ್ಚುವರಿ ಎಣ್ಣೆಯನ್ನು ಟಿಶ್ಯೂ ಅಥವಾ ಬಟ್ಟೆಯಲ್ಲಿ ಒರೆಸಿ ತೆಗೆಯಿರಿ. ಎಣ್ಣೆಯ ತೆಳುವಾದ ಪದರ ಹಾಗೆಯೇ ಇರಲಿ.

ಜತನ ಮಾಡಿ

ಹೀಗೆ ಕಬ್ಬಿಣದ ಕಾವಲಿಗೆ ತುಕ್ಕು ಹಿಡಿಯದಂತೆ ಸೀಸನ್ ಮಾಡುತ್ತಾ ಜತನದಿಂದ ಕಾಪಾಡುತ್ತಾ ಬಂದರೆ ಯಾವ ನಾನ್ ಸ್ಟಿಕ್ ಗೂ ಕಡಿಮೆ ಇಲ್ಲದಂತೆ ಬಳಸಬಹುದು, ಗರಿಗರಿಯಾದ ದೋಸೆಯನ್ನೂ ಮಾಡಬಹುದು.