ಸರಕಾರಿ ಕೆಲಸಕ್ಕೆ ಐಫೋನ್ ಬಳಸುವಂತಿಲ್ಲ – ಎಲ್ಲಿ ಈ ನಿಯಮ? ಯಾಕಾಗಿ?
- ಅಂತಾರಾಷ್ಟ್ರೀಯ ಸುದ್ದಿ
- August 12, 2023
- No Comment
- 162
ನ್ಯೂಸ್ ಆ್ಯರೋ : ಸರಕಾರಿ ಉದ್ಯೋಗಿಗಳು ಇನ್ನು ಮುಂದೆ ಕೆಲಸದ ಉದ್ದೇಶಗಳಿಗೆ ಐಫೋನ್ ಅಥವಾ ಐಪ್ಯಾಡ್ ಬಳಸುವಂತಿಲ್ಲ. ಅರೇ ಅದ್ಯಾಕೆ ಹಾಗೆ? ಇನ್ನೇನು ಮಾಡೋದು? ಎಂಬ ಚಿಂತೆ ಬೇಡ. ಯಾಕೆಂದರೆ ಈ ನಿಯಮ ಜಾರಿಯಾಗಿರುವುದು ರಷ್ಯಾದಲ್ಲಿ.
ಯಾಕಾಗಿ ಈ ನಿಯಮ?
ರಷ್ಯಾದ ಡಿಜಿಟಲ್ ಅಭಿವೃದ್ದಿ ಸಚಿವಾಲಯ ಇಂತಹ ಆದೇಶ ಹೊರಡಿಸಿದೆ. ಅಮೆರಿಕದ ಬೇಹುಗಾರಿಕೆ ಕಾರ್ಯಾಚರಣೆಯ ಪರಿಣಾಮವಾಗಿ ಆ್ಯಪಲ್ ರಾಜಿ ಮಾಡಿಕೊಂಡಿದೆ ಎಂದು ರಷ್ಯಾದ ಭದ್ರತಾ ಸಂಸ್ಥೆ ಎಫ್.ಎಸ್.ಬಿ. ಹೇಳಿದ 2 ತಿಂಗಳ ಬಳಿಕ ಈ ಆದೇಶ ಹೊರಡಿಸಲಾಗಿದೆ. ಇತ್ತ ಅಮೆರಿಕ ಆರೋಪವನ್ನು ತಳ್ಳಿ ಹಾಕಿದೆ.
ಸರಕಾರಿ ಕೆಲಸದ ಅಪ್ಲಿಕೇಷನ್ ಬಳಸಲು, ಇಮೇಲ್ ವಿನಿಮಯ ಮಾಡಿಕೊಳ್ಳಲು ಐಫೋನ್ ಬಳಸುವಂತಿಲ್ಲ. ವೈಯಕ್ತಿಕ ಅಗತ್ಯಗಳಿಗೆ ಐಫೋನ್ ಬಳಕೆಗೆ ನಿರ್ಬಂಧವಿಲ್ಲ ಎಂದು ಸಚಿವ ಮಕ್ಸುತ್ ಶಾದೇವ್ ತಿಳಿಸಿದ್ದಾರೆ.
ಅಮೆರಿಕ ಬೇಹುಗಾರಿಕೆ ನಡೆಸುತ್ತಿದೆ, ಐಫೋನ್ ಮೂಲಕ ಕದ್ದಾಲಿಕೆ ಮಾಡುತ್ತಿದೆ ಎಂಬ ಸಂಶಯ ರಷ್ಯಾವನ್ನು ಕಾಡುತ್ತಿರುವುದರಿಂದ ಆದೇಶ ಹೊರಡಿಸಿ ಎಚ್ಚರಿಕೆ ನೀಡಿದೆ.