ಜಪಾನ್ ರಾಯಭಾರಿಯನ್ನೂ ಕುಣಿಸಿದ ‘ಕಾವಾಲಯ್ಯ’ ಹಾಡು – ಮಿಲ್ಕಿ ಬ್ಯೂಟಿ ತಮನ್ನಾಗಿಂತಲೂ ಸೂಪರ್ ಕುಣಿದ ರಾಯಭಾರಿಯ ವಿಡಿಯೋ ವೈರಲ್..!
- ಅಂತಾರಾಷ್ಟ್ರೀಯ ಸುದ್ದಿ
- August 18, 2023
- No Comment
- 228
ನ್ಯೂಸ್ ಆ್ಯರೋ : ರಜನಿಕಾಂತ್ ಅಭಿನಯದ ‘ಜೈಲರ್’ ಚಿತ್ರ ಬಾಕ್ಸ್ ಆಫೀಸ್ ಅನ್ನು ಅಕ್ಷರಶಃ ಧೂಳೆಬ್ಬಿಸಿದೆ. ಈ ಚಿತ್ರ ಸದ್ಯ ವಿಶ್ವಾದ್ಯಂತ 400 ಕೋಟಿ ರೂ.ಗೂ ಹೆಚ್ಚಿನ ಗಳಿಕೆ ಕಂಡು ಮುನ್ನುಗ್ಗುತ್ತಿದೆ. ಭಾರತದಲ್ಲಿ ಮಾತ್ರ 226 ಕೋಟಿ ರೂ.ಗೂ ಹೆಚ್ಚು ಕಲೆಕ್ಷನ್ ಮಾಡಿದೆ. ಆ ಮೂಲಕ ರಜನಿಕಾಂತ್ ಹವಾ ಇನ್ನೂ ತಣ್ಣಗಾಗಿಲ್ಲ ಎನ್ನುವುದನ್ನು ಸಾಬೀತು ಪಡಿಸಿದೆ.
‘ಕಾವಾಲಯ್ಯ’ ಮೋಡಿ
ಬಿಡುಗಡೆಗೂ ಮುನ್ನ ‘ಜೈಲರ್’ ಚಿತ್ರ ನಿರೀಕ್ಷೆ ಮೂಡಿಸಲು ರಜನಿಕಾಂತ್ ಜೊತೆಗೆ ‘ಕಾವಾಲಯ್ಯ’ ಹಾಡು ಕೂಡ ಕಾರಣವಾಗಿತ್ತು. ಅನಿರುದ್ಧ್ ರವಿಚಂದರ್ ಸಂಗೀತ ನೀಡಿದ್ದ ಈ ಹಾಡಿಗೆ ಮಿಲ್ಕ್ ಬ್ಯೂಟಿ ತಮನ್ನಾ ಹೆಜ್ಜೆ ಹಾಕಿದ ರೀತಿಗೆ ಪ್ರೇಕ್ಷಕರು ಮನ ಸೋತಿದ್ದರು.
ಯೂ ಟ್ಯೂಬ್ ನಲ್ಲಿ ಬಿಡುಗಡೆಯಾದ ದಿನವೇ ಈ ಹಾಡು 80 ದಶಲಕ್ಷ ವೀಕ್ಷಣೆ ಕಂಡು ದಾಖಲೆ ನಿರ್ಮಿಸಿತ್ತು. ಅಲ್ಲಿಂದ ಬಳಿಕ ಅದರ ಮೋಡಿ ಇನ್ನೂ ನಿಂತಿಲ್ಲ. ಸೆಲೆಬ್ರಿಟಿಗಳಿಂದ ಹಿಡಿದು ಜನ ಸಾಮಾನ್ಯರವರೆಗೆ ಬಹುತೇಕರು ಈ ಹಾಡಿಗೆ ರೀಲ್ಸ್ ಮಾಡುತ್ತಿದ್ದಾರೆ.
ಇದೀಗ ಭಾರತದಲ್ಲಿರುವ ಜಪಾನ್ ರಾಯಭಾರಿ ಹಿರೋಶಿ ಸುಜುಕಿ ಈ ಹಾಡಿಗೆ ಸ್ಟೆಪ್ ಹಾಕಿ ಗಮನ ಸೆಳೆದಿದ್ದಾರೆ. ಹಿರೋಶಿ ಜಪಾನ್ ನ ಜನಪ್ರಿಯ ಯೂಟ್ಯೂಬರ್ ಮೇಯೊ ಸ್ಯಾನ್ ಜೊತೆ ಹೆಜ್ಜೆ ಹಾಕಿದ್ದು, ವೀಡಿಯೋ ವೈರಲ್ ಆಗಿದೆ. ಆದರೆ ಕೆಲವರು ಇದು ಆರ್ಟಿಫಿಶಿಯಲ್ ಇಂಟಲಿಜೆನ್ಸ್ (ಎ.ಐ.) ಮಾಡಿರುವ ವೀಡಿಯೋದಂತಿದೆ ಎಂದಿದ್ದಾರೆ.
ಟ್ರೈಬಲ್ ಥೀಮ್ ನಲ್ಲಿ ಈ ಹಾಡು ತಯಾರಾಗಿದೆ. ‘ಕಾವಾಲಯ್ಯ’ ಹಾಡಿಗೆ ಬಾಲಿವುಡ್ ಗಾಯಕಿ ಶಿಲ್ಪಾ ರಾವ್ ಧ್ವನಿ ನೀಡಿದ್ದು, ಜಾನಿ ಮಾಸ್ಟರ್ ನೃತ್ಯ ಸಂಯೋಜಿಸಿದ್ದಾರೆ. ಇನ್ನು ಚಿತ್ರದಲ್ಲಿ ಕನ್ನಡದ ಹ್ಯಾಟ್ರಿಕ್ ಹೀರೋ ಶಿವರಾಜ್ ಕುಮಾರ್, ಮಲೆಯಾಳಂ ಸೂಪರ್ ಸ್ಟಾರ್ ಮೋಹನ್ ಲಾಲ್ ಅತಿಥಿ ಪಾತ್ರದಲ್ಲಿ ಮೋಡಿ ಮಾಡಿದ್ದಾರೆ.