ಸೈಟ್ ಖರೀದಿಯಲ್ಲಿ ಮಾಸ್ಟರ್ ಆನಂದ್ ಅವರಿಗೆ 18.50 ಲಕ್ಷ ವಂಚನೆ – ರಿಯಲ್ ಎಸ್ಟೇಟ್ ಸಂಸ್ಥೆ ವಿರುದ್ಧ ದೂರು ದಾಖಲು

ನ್ಯೂಸ್ ಆ್ಯರೋ‌ : ಸ್ಯಾಂಡಲ್ ವುಡ್ ಜನಪ್ರಿಯ ನಟ, ನಿರೂಪಕ ಮಾಸ್ಟರ್ ಆನಂದ್ ಅವರಿಗೆ 18.5 ಲಕ್ಷ ರೂ. ವಂಚಿಸಿರುವ ಪ್ರಕರಣ ಬೆಳಕಿಗೆ ಬಂದಿದೆ. ನಿವೇಶನ ಕೊಡಿಸುವುದಾಗಿ ನಂಬಿಸಿ ಮೋಸ ಮಾಡಲಾಗಿದೆ ಎಂದು ಮಲ್ಟಿ ಲೀಪ್ ವೆಂಚರ್ಸ್ ಕಂಪೆನಿ ವಿರುದ್ಧ ಚಂದ್ರ ಲೇಔಟ್ ಠಾಣೆಯಲ್ಲಿ ಆನಂದ್ ದೂರು ನೀಡಿದ್ದಾರೆ.

ಪ್ರಕರಣದ ಹಿನ್ನೆಲೆ

ಬೆಂಗಳೂರಿನ ಕೊಮ್ಮಘಟ್ಟದ ರಾಮಸಂದ್ರ ಹಳ್ಳಿಯಲ್ಲಿ ರಿಯಲ್ ಎಸ್ಟೇಟ್ ಕಂಪೆನಿ ಮಲ್ಟಿ ವೆಂಚರ್ಸ್ ಲೀಪ್ ಲೇಔಟ್ ನಿರ್ಮಿಸಿತ್ತು. 2021ರಲ್ಲಿ ಆನಂದ್ 200 ಚ.ಮೀ. ಅಳತೆಯ ಸೈಟ್ ಖರೀದಿಸಿದ್ದರು. 70 ಲಕ್ಷ ರೂ.ಗೆ ಒಪ್ಪಂದವಾಗಿತ್ತು. 18.50 ಲಕ್ಷ ರೂ. ಮುಂಗಡ ಪಡೆದು ಕಂಪೆನಿ ಆನಂದ್ ಮತ್ತು ಅವರ ಪತ್ನಿ ಯಶಸ್ವಿನಿ ಹೆಸರಿನಲ್ಲಿ ಖರೀದಿ ಕರಾರು ಪತ್ರ ಮಾಡಿಕೊಟ್ಟಿತ್ತು.

ಈ ನಡುವೆ ಕಂಪೆನಿ ನಿವೇಶನವನ್ನು ಬೇರೆಯವರಿಗೆ ಮಾರಾಟ ಮಾಡಿದೆ. ಈ ಬಗ್ಗೆ ಆನಂದ್ ವಿಚಾರಿಸಿದಾಗ ಸೂಕ್ತವಾಗಿ ಸ್ಪಂದಿಸದ ಕಂಪೆನಿ ಎರಡು ವರ್ಷ ಕಳೆದರೂ ಮುಂಗಡ ಹಣವನ್ನೂ ಪಾವತಿಸಲಿಲ್ಲ. ಹೀಗಾಗಿ ಆನಂದ್ ಠಾಣೆ ಮೆಟ್ಟಿಲೇರಿದ್ದಾರೆ. ಚಂದ್ರ ಲೇಔಟ್ ಪೊಲೀಸರು ಎಫ್.ಐ.ಆರ್. ದಾಖಲಿಸಿದ್ದಾರೆ.

ಸೈಟ್ ಖರೀದಿ ವ್ಯವಹಾರಕ್ಕೆ ಸಂಬಂಧಿಸಿ ಮುಂಗಡ ಹಣ ನೀಡಿ ರಿಜಿಸ್ಟ್ರೇಷನ್ ವೇಳೆ ಪೂರ್ತಿ ಹಣ ಕೊಡುವುದಾಗಿ ಮಾತುಕತೆ ನಡೆದಿದ್ದು, ಆ ಬಗ್ಗೆ ಕರಾರು ಪತ್ರ ಸಹ ಆಗಿತ್ತು ಎಂದು ಆನಂದ್ ಆಪ್ತರು ಹೇಳಿದ್ದಾರೆ.