ಹೊಸ ವರ್ಷದಂದೇ ಭೀಕರ ಕೊಲೆ: ತಾಯಿ, ನಾಲ್ವರು ಸಹೋದರಿಯರನ್ನು ಕೊಂದ ಯುವಕ

ನ್ಯೂಸ್ ಆ್ಯರೋ: ಹೊಸ ವರ್ಷದ ದಿನವೇ ಆಘಾತಕಾರಿ ಘಟನೆಯೊಂದು ಉತ್ತರ ಪ್ರದೇಶದಲ್ಲಿ ವರದಿಯಾಗಿದ್ದು, ಯುವಕನೋರ್ವ ತನ್ನ ತಾಯಿ ಮತ್ತು ನಾಲ್ವರು ಸಹೋದರಿಯರನ್ನು ದಾರುಣವಾಗಿ ಹತ್ಯೆ ಮಾಡಿರುವ ಘಟನೆ ಲಕ್ನೋದಲ್ಲಿ ವರದಿಯಾಗಿದೆ. ಪ್ರಕರಣ ಸಂಬಂಧ ಆರೋಪಿಯನ್ನು ಪೊಲೀಸರು ಬಂಧಿಸಿದ್ದಾರೆ.

ಲಕ್ನೋದ ನಾಕಾ ಪ್ರದೇಶದಲ್ಲಿನ ಹೋಟೆಲ್​ ಶರಂಜೀತ್​ನಲ್ಲಿ ಈ ಘಟನೆ ನಡೆದಿದ್ದು, ಈ ಭೀಕರ ಹತ್ಯೆಗೆ ಕೌಟುಂಬಿಕ ಕಲಹ ಕಾರಣ ಎಂದು ಲಕ್ನೋ ಸೆಂಟ್ರಲ್​ ಡಿಸಿಪಿ ರವೀನಾ ತ್ಯಾಗಿ ತಿಳಿಸಿದ್ದಾರೆ.

ಕೊಲೆ ಮಾಡಿದ ಆರೋಪಿಯನ್ನು 24 ವರ್ಷದ ಅರ್ಶದ್​ ಎಂದು ಗುರುತಿಸಲಾಗಿದೆ. ಕೊಲೆಗೀಡಾದ ನಾಲ್ವರು ಸಹೋದರಿಯರು 9 ವರ್ಷದ ಬಾಲಕಿ, 19 ವರ್ಷದ ಅಲ್ಶಿಯಾ, 18 ವರ್ಷದ ಅಕ್ಸಾ, ಮತ್ತು 18 ವರ್ಷದ ರಹ್ಮೀನ್​ ಆಗಿದ್ದು, ತಾಯಿ ಅಸ್ಮಾ ಕೂಡ ಸಾವನ್ನಪ್ಪಿದ್ದಾರೆ. ಮೃತರ ದೇಹಗಳನ್ನು ಮರಣೋತ್ತರ ಪರೀಕ್ಷೆಗೆ ರವಾನಿಸಲಾಗಿದೆ.

ಅರ್ಶದ್​ ಮೊದಲಿಗೆ ಮಲಗಿದ್ದ ತಾಯಿಯನ್ನು ಬ್ಲೇಡ್​ ಸಹಾಯದಿಂದ ಹತ್ಯೆ ಮಾಡಿದ್ದು, ಬಳಿಕ ನಿದ್ರೆಗೆ ಜಾರಿದ್ದ ಸಹೋದರಿಯರನ್ನು ಕೊಲೆಗೈದಿದ್ದಾನೆ. ಇವರೆಲ್ಲರೂ ಹೊಸ ವರ್ಷದ ಸಂಭ್ರಮಾಚರಣೆಗೆ ಲಕ್ನೋಗೆ ಬಂದಿದ್ದರು. ಸಂಭ್ರಮಾಚರಣೆ ಬಳಿಕ ಹೋಟೆಲ್​ಗೆ ತೆರಳಿ ಮಲಗಿದ್ದಾಗ ಅರ್ಶದ್​ ಈ ಕೃತ್ಯ ಎಸಗಿದ್ದಾನೆ. ಕೌಟುಂಬಿಕ ಕಲಹ ಹಿನ್ನೆಲೆ ಆಗ್ರಾ ಮೂಲದ ಅರ್ಶದ್​ ಈ ಘೋರ ಕೃತ್ಯ ನಡೆಸಿದ್ದಾನೆ ಎಂಬುದು ಪ್ರಾಥಮಿಕ ತನಿಖೆಯಲ್ಲಿ ಬಯಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.