ಬಂಟ್ವಾಳ : ಎಣ್ಮೂರು ಗರಡಿ ಕೋಟಿ ದರ್ಶನ ಪಾತ್ರಿ ಗಿರೀಶ್ ನಾಪತ್ತೆ ಪ್ರಕರಣ – ಮೃತದೇಹ ಪತ್ತೆ, ಆತ್ಮಹತ್ಯೆ ಶಂಕೆ..!

ನ್ಯೂಸ್ ಆ್ಯರೋ : ಕುಕ್ಕಿಪಾಡಿಯ ರಿಕ್ಷಾ ಚಾಲಕ, ಎಣ್ಮೂರು ನಾಗಬ್ರಹ್ಮ ದೈವಸ್ಥಾನದ ಗರಡಿಯ ಕೋಟಿ‌ ದರ್ಶನ ಪಾತ್ರಿ ಗಿರೀಶ್ ನಾಪತ್ತೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಗಿರೀಶ್ ಅವರ ಮೃತದೇಹವು ಬಂಟ್ವಾಳ ಸಮೀಪ ಪತ್ತೆಯಾಗಿದೆ.

ಆಟೋ ಚಾಲಕರಾಗಿರುವ ಗಿರೀಶ್ ಅವರು ಕಳೆದ ಬುಧವಾರ ತಡರಾತ್ರಿ 2 ಗಂಟೆ ವೇಳೆಗೆ ಮನೆಯಿಂದ ಆಟೋ ಸಹಿತ ತೆರಳಿದವರು ಬಳಿಕ ನಾಪತ್ತೆಯಾಗಿದ್ದರು.

ಪೂಂಜಾಲಕಟ್ಟೆ ಪೋಲಿಸ್ ಠಾಣೆಯಲ್ಲಿ ಈ ಬಗ್ಗೆ ನಾಪತ್ತೆ ಪ್ರಕರಣ ದಾಖಲಾಗಿದ್ದು, ಗುರುಪುರ ಸೇತುವೆ ಮೇಲೆ ಗಿರೀಶ್ ಅವರ ಆಟೋ ರಿಕ್ಷಾ ಪತ್ತೆಯಾಗಿತ್ತು.‌ ಹಾಗಾಗಿ ಅವರು ನದಿಗೆ ಹಾರಿ ಆತ್ಮಹತ್ಯೆ ಮಾಡಿಕೊಂಡಿರುವ ಅನುಮಾನ ಮೂಡಿತ್ತು.

ಈ ಹಿನ್ನೆಲೆಯಲ್ಲಿ ಅಗ್ನಿಶಾಮಕ ಸಿಬ್ಬಂದಿ ಹಾಗೂ ಮುಳುಗುತಜ್ಞರು ಹುಡುಕಾಟ ಆರಂಭಿಸಿದ್ದು, ಇಂದು ಮಧ್ಯಾಹ್ನ ಗಿರೀಶ್ ಅವರ ಮೃತದೇಹ ಪತ್ತೆಯಾಗಿದೆ. ಗಿರೀಶ್ ಅವರಿಗೆ ವಿವಾಹವಾಗಿದ್ದು, ಇಬ್ಬರು ಮಕ್ಕಳಿದ್ದಾರೆ.