Arun Kathare : ಶೋಕಿ ಮಾಡಲು ಹೋಗಿ ಪೋಲಿಸರ ಕೈಗೆ ತಗ್ಲಾಕ್ಕೊಂಡ ಅರುಣ್ ಕಠಾರೆ ಬಂಧನ – ತಿರ್ಪೆ ಶೋಕಿ ಬೇಕಿತ್ತಾ ಅಂದ ಟ್ರೋಲರ್ಸ್…!!
ನ್ಯೂಸ್ ಆ್ಯರೋ : ಬಿಟ್ಟಿ ಶೋಕಿ ಮೂಲಕವೇ ಸಾಮಾಜಿಕ ಜಾಲತಾಣಗಳ ರೀಲ್ಸ್ ಗಳಲ್ಲಿ ಮಿಂಚುತ್ತಿದ್ದ ರೀಲ್ಸ್ ಶೋಕಿಲಾಲ ಅರುಣ್ ಕಠಾರೆಯನ್ನು ಕೊತ್ತನೂರು ಪೋಲಿಸರು ಬಂಧಿಸಿದ್ದಾರೆ. ಈ ಶೋಕಿಲಾಲ ಶೋಕಿ ಮಾಡಲು ಹೋಗಿನೇ ಪೋಲಿಸರ ಕೈಗೆ ತಗ್ಲಾಕ್ಕೊಂಡಿರೋದು ಕಾಕತಾಳೀಯ.
ಚಿತ್ರದುರ್ಗ ಮೂಲದವನಾಗಿರುವ ಈತ ಅರುಣ್ ಕಠಾರೆ (26) ಬೆಂಗಳೂರಿನ ಜೆ.ಪಿ. ನಗರ ನಿವಾಸಿಯಾಗಿದ್ದಾನೆ. ಕಳೆದ ಜೂ.9ರಂದು ಈತ ಎ.ಕೆ. 47 ಗನ್‌ ಹಿಡಿದ ಬಾಡಿಗಾರ್ಡ್‌ಗಳ ಜತೆ ಚೊಕ್ಕನಹಳ್ಳಿಯ ಭಾರತೀಯ ಸಿಟಿಯ ಲೀಲಾ ಹೋಟೆಲ್‌ ಬಳಿ ಬಂದಿದ್ದು, ಕೆಲವರಿಗೆ ಗನ್‌ ತೋರಿಸಿ ಹೆದರಿಸಿದ್ದ. ಈ ಘಟನೆಯಿಂದ ಸಾರ್ವಜನಿಕರು ಆತಂಕಗೊಂಡು ಗಸ್ತು ಪೊಲೀಸರಿಗೆ ಮಾಹಿತಿ ನೀಡಿದ್ದರು.
ಜತೆಗೆ ಆರೋಪಿಯು ಗನ್‌ ಹಿಡಿದ ಬಾಡಿ ಗಾರ್ಡ್‌ಗಳ ಜತೆಗೆ ಕಾರಿನಲ್ಲಿ ತೆರಳುವ ಇನ್‌ಸ್ಟ್ರಾಗ್ರಾಮ್‌ ರೀಲ್ಸ್ ವಿಡಿಯೋ ತೋರಿಸಿದ್ದನು. ಈ ಮಾಹಿತಿ ಮೇರೆಗೆ ಕೊತ್ತನೂರು ಠಾಣೆ ಪೊಲೀಸರು ಶಸ್ತ್ರಾಸ್ತ್ರ ಕಾಯ್ದೆ ಮತ್ತು ಸಾರ್ವಜನಿಕ ಸ್ಥಳದಲ್ಲಿ ಉಪದ್ರವ ಉಂಟು ಮಾಡಿದ ಆರೋಪದಡಿ ಪ್ರಕರಣ ದಾಖಲಿಸಿ ಆರೋಪಿ ಅರುಣ್ ಕಠಾರೆಯನ್ನು ಬಂಧಿಸಿ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದಾರೆ.
ಚಿತ್ರದುರ್ಗ ಮೂಲದ ಅರುಣ್ ಕಠಾರೆ, ಈತ ಮೈ ತುಂಬಾ ನಕಲಿ ಚಿನ್ನಾಭರಣ ತೊಟ್ಟು, ನಕಲಿ ಗನ್‌ ಹಿಡಿದ ಬಾಡಿಗಾರ್ಡ್‌ಗಳು, ಸುಂದರ ಯುವತಿಯರು, ಐಷಾರಾಮಿ ಕಾರುಗಳು, ಬೈಕ್‌ಗಳ ಜತೆಗೆ ಐಷಾರಾಮಿ ಜೀವನ ಪ್ರದರ್ಶಿಸುವ ರೀಲ್ಸ್ ಮಾಡಿ ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೋ ಹಾಕುತ್ತಿದ್ದ.
ಈತನಿಗೆ ಸಾಮಾಜಿಕ ಜಾಲತಾಣದಲ್ಲಿ ಸಾಕಷ್ಟು ಹಿಂಬಾಲಕರು ಇದ್ದು, ಶೋಕಿ ಮಾಡಿಯೇ ಪ್ರಸಿದ್ಧಿಯಾಗಿದ್ದಲ್ಲದೇ ಇತ್ತೀಚೆಗೆ ಖಾಸಗಿ ನ್ಯೂಸ್ ಚಾನೆಲ್ ನಲ್ಲೂ ಸಂದರ್ಶನ ನೀಡಿದ್ದ. ಸದ್ಯ ಈತ ಬೆಂಗಳೂರಿನ ಜೆ.ಪಿ.ನಗರದಲ್ಲಿ ನೆಲೆಸಿದ್ದ ಎಂದು ಪೊಲೀಸರು ಹೇಳಿದ್ದಾರೆ. ಈತನ ಬಂಧನವಾಗುತ್ತಲೇ ಯೂಟ್ಯೂಬ್ ಟ್ರೋಲರ್ಸ್ ತರಹೇವಾರಿ ಟ್ರೋಲ್ ವಿಡಿಯೋ ಮಾಡಿದ್ದು ನಿನಗೆ ಇದೆಲ್ಲ ಬೇಕಿತ್ತಾ ಎಂದು ಕಿಚಾಯಿಸಿದ್ದಾರೆ.
Leave a Comment