ರೆಡ್‌ಲೈಟ್‌ ಏರಿಯಾಕ್ಕೆ ಕಾಲಿಟ್ಟ ನೆನಪನ್ನು ಹಂಚಿಕೊಂಡ ದಿವ್ಯಾ ದತ್ತಾ – ಅಂದಿನ ಘಟನೆ ನೆನೆದು ಈಗಲೂ ನಡುಗುತ್ತಾರಂತೆ ಹಿರಿಯ‌ ನಟಿ..!!

ನ್ಯೂಸ್‌ ಆ್ಯರೋ : ಹಲವು ಚಿತ್ರಗಳಲ್ಲಿ ನಟಿಸಿರುವ ಬಾಲಿವುಡ್​ ನಟಿ ದಿವ್ಯಾ ದತ್ತಾ 2005ರಲ್ಲಿ ಗೊತ್ತಿಲ್ಲದೇ ರೆಡ್​ಲೈಟ್​ ಏರಿಯಾಗೆ ಹೋಗಿ ಸಿಕ್ಕಿಕೊಂಡಿದ್ದರು. ಅಲ್ಲಿಂದ ಹೇಗೆ ಹೊರ ಬಂದರು? ಅಲ್ಲಿ ಏನು ನಡೆಯಿತು ಎಂಬುದನ್ನು 18 ವರ್ಷಗಳ ನಂತರ ಬಹಿರಂಗ ಪಡಿಸಿದ್ದಾರೆ.

ಚಿತ್ರರಂಗದಲ್ಲಿ ತಮ್ಮದೇ ಆದ ಐಡೆಂಟಿಟಿ ಹೊಂದಿರುವ ದಿವ್ಯಾ ದತ್ತಾ ಅವರು ಮಾಡೆಲಿಂಗ್ ಲೋಕದಿಂದ ನಟನೆಯ ಜಗತ್ತಿಗೆ ಬಂದವರು. 1994ರಲ್ಲಿ, ಅವರು ಇಷ್ಕ್ ಮೇ ಜೀನಾ ಇಷ್ಕ್ ಮೇ ಮರ್ನಾ ಚಿತ್ರದ ಮೂಲಕ ಪದಾರ್ಪಣೆ ಮಾಡಿದರು. 1995ರಲ್ಲಿ ಅವರು ಸುರಕ್ಷಾ ಚಿತ್ರದಲ್ಲಿ ಕಾಣಿಸಿಕೊಂಡರು. ಸುನಿಲ್ ಶೆಟ್ಟಿ, ಆದಿತ್ಯ ಪಾಂಚೋಲಿ ಮತ್ತು ಸೈಫ್ ಅಲಿ ಖಾನ್ ನಟಿಸಿದ ಈ ಚಿತ್ರದಲ್ಲಿ ಅವರು ಬಿಂದಿಯಾ ಪಾತ್ರದಲ್ಲಿ ಗಮನ ಸೆಳೆದಿದ್ದರು.

46ವರ್ಷ ವಯಸ್ಸಿನ ದಿವ್ಯಾ ದತ್ತಾ ಫನ್ನೆ ಖಾನ್, ಇದಾಸಾ, ಬ್ಲ್ಯಾಕ್‌ಮೇಲ್, ಬದ್ಲಾಪುರ್, ಭಾಗ್ ಮಿಲ್ಕಾ ಭಾಗ್, ಸ್ಪೆಷಲ್ 26, ಹೀರೋಯಿನ್, ದೆಹಲಿ 6, ಉಮ್ರಾವ್ ಜಾನ್‌ನಂತಹ ಅನೇಕ ಹಿಟ್ ಚಿತ್ರಗಳಲ್ಲಿ ಕೆಲಸ ಮಾಡಿದ್ದಾರೆ. ಅಷ್ಟೇ ಅಲ್ಲ, ಶಾರುಖ್ ಖಾನ್ ಅವರ ವೀರ್ ಜರಾ, ರಣವೀರ್ ಸಿಂಗ್ ಅವರ ಲೂಟೆರಾ, ಇರ್ಫಾನ್ ಖಾನ್ ಅವರ ಬ್ಲಾಕ್ ಮೇಲ್ ಚಿತ್ರಗಳಲ್ಲಿಯೂ ಕಾಣಿಸಿಕೊಂಡಿದ್ದಾರೆ. ಸಲ್ಮಾನ್ ಖಾನ್, ಅಮಿತಾಭ್​ ಬಚ್ಚನ್, ಇರ್ಫಾನ್ ಖಾನ್, ರಿಷಿ ಕಪೂರ್ ಮುಂತಾದ ಶ್ರೇಷ್ಠ ನಟರೊಂದಿಗೆ ತೆರೆ ಹಂಚಿಕೊಂಡಿದ್ದಾರೆ.

ದಿವ್ಯಾ ದತ್ತಾ ಅವರ ಅತ್ಯುತ್ತಮ ಅಭಿನಯಕ್ಕಾಗಿ ಹತ್ತಾರು ಪ್ರಶಸ್ತಿಗಳನ್ನು ಪಡೆದಿದ್ದಾರೆ. 2018 ರಲ್ಲಿ ಇದಾಸಾ ಚಿತ್ರಕ್ಕಾಗಿ ಅವರು ಅತ್ಯುತ್ತಮ ಪೋಷಕ ನಟಿಗಾಗಿ ರಾಷ್ಟ್ರೀಯ ಪ್ರಶಸ್ತಿಯನ್ನು ಪಡೆದರು. ಇದಕ್ಕೂ ಮೊದಲು, ಅವರು ತಮ್ಮ ಹೆಸರನ್ನು ಜೀ ಸಿನಿ ಪ್ರಶಸ್ತಿಗೆ ಎರಡು ಬಾರಿ ಐಫಾ ಪ್ರಶಸ್ತಿಗೆ ಎರಡು ಬಾರಿ ನೋಂದಾಯಿಸಿದ್ದಾರೆ. ಈ ಸುದೀರ್ಘ ವೃತ್ತಿ ಜೀವನದಲ್ಲಿ ದಿವ್ಯಾ ದತ್ತಾ ಕೂಡ ಹಲವು ಬಾರಿ ಕಷ್ಟಗಳನ್ನು ಎದುರಿಸಿದ್ದಾರೆ.

ಈ ಘಟನೆ ನಡೆದದ್ದು 2005ರಲ್ಲಿ..!!

ನೆದರ್ಲೆಂಡ್​ನಲ್ಲಿ ಇದ್ದ ದಿವ್ಯಾ, ಆಮ್ಸ್ಟರ್‌ಡ್ಯಾಮ್‌ನಲ್ಲಿ ನಡೆದ ಐಫಾ ಪ್ರಶಸ್ತಿ ಸಮಾರಂಭದಲ್ಲಿ ಭಾಗವಹಿಸಲು ತನ್ನ ತಾಯಿಯೊಂದಿಗೆ ಹೋದಾಗ ಘಟನೆ ನಡೆದಿದೆ. ಕಾರ್ಯಕ್ರಮ ಮುಗಿದ ಮೇಲೆ ಅಮ್ಮನ ಜೊತೆ ಊರು ನೋಡಲು ಹೋಗಿದ್ದರಂತೆ. ಆಗ ಅರಿವಿಲ್ಲದೇ ಅವರು ರೆಡ್​ ಲೈಟ್​ ಏರಿಯಾಗೆ ಹೋಗಿಬಿಟ್ಟಿದ್ದಾರೆ. ರಸ್ತೆ ಚೆನ್ನಾಗಿದ್ದ ಕಾರಣ, ರಸ್ತೆಯ ಮೇಲೆ ನಿಂತು ತಮ್ಮ ತಾಯಿಯೊಂದಿಗೆ ಫೋಟೋಗಳನ್ನು ಕ್ಲಿಕ್ಕಿಸಲು ಪ್ರಾರಂಭಿಸಿದ್ದಾರೆ. ಆದರೆ, ಆ ಪ್ರದೇಶದಲ್ಲಿ ಫೋಟೋಗ್ರಫಿಯನ್ನು ನಿಷೇಧಿಸಲಾಗಿತ್ತು.

ರೆಡ್​ಲೈಟ್​ ಏರಿಯಾದಲ್ಲಿ ಫೋಟೋಗ್ರಫಿ ನಿಷೇಧ ಎಂದು ತಿಳಿದಿದ್ದರೂ ತಾವು ಇರುವುದು ಆ ಪ್ರದೇಶದಲ್ಲಿ ಎಂದು ಅರಿಯದೇ ದಿವ್ಯಾ ಫೋಟೋ ಕ್ಲಿಕ್ಕಿಸಿಕೊಳ್ಳಲು ಪ್ರಾರಂಭಿಸಿದ್ದರಂತೆ.

ಕ್ಷಣ ಮಾತ್ರದಲ್ಲಿ ಅಲ್ಲಿದ್ದ ವೇಶ್ಯೆಯರು ಅವರನ್ನು ಸುತ್ತುವರೆದರಂತೆ. ಏನಾಗುತ್ತಿದೆ ಎಂದು ತಿಳಿಯದ ದಿವ್ಯಾ ಜನರನ್ನು ನೋಡಿ ಸುಸ್ತಾಗಿ ಓಡಲು ಪ್ರಾರಂಭಿಸಿದರಂತೆ. ಆದರೆ, ಅವರ ಹಿಂದೆ ವೇಶ್ಯೆಯರು ಓಡಲು ಪ್ರಾರಂಭಿಸಿದರು. ದಿವ್ಯಾ ಮತ್ತು ಆಕೆಯ ತಾಯಿ ಹೇಗೋ ಅಲ್ಲಿಂದ ತಪ್ಪಿಸಿಕೊಂಡು ಪ್ರಾಣ ಉಳಿಸಿಕೊಂಡರಂತೆ. ಇದನ್ನು ನೆನಪಿಸಿಕೊಂಡು ಈಗಲೂ ನಡುಗುತ್ತಾರೆ ಹಿರಿಯ ನಟಿ.