ಹಣೆಗೆ ತಿಲಕ ಇಡಲು ತಿರಸ್ಕರಿಸಿದ ಟೀಂ ಇಂಡಿಯಾದ ಸಿರಾಜ್, ಉಮ್ರಾನ್ ಮಲಿಕ್ – ಪರ ವಿರೋಧ ಚರ್ಚೆಗೆ ಕಾರಣವಾಯ್ತು ವೈರಲ್ ವಿಡಿಯೋ…!!

ನ್ಯೂಸ್ ಆ್ಯರೋ : ಟೀಂ ಇಂಡಿಯಾದ ಆಟಗಾರರಾದ ಮೊಹಮ್ಮದ್ ಸಿರಾಜ್ ಹಾಗೂ ಉಮ್ರಾನ್‌ ಮಲಿಕ್‌ ತಮ್ಮ ಹಣೆಗೆ ತಿಲಕ ಇಡುವುದನ್ನು ತಿರಸ್ಕರಿಸಿದ್ದಾರೆ ಎಂಬ ಕಾರಣಕ್ಕೆ ಭಾರೀ ಚರ್ಚೆಗೆ ಕಾರಣವಾಗಿದ್ದಾರೆ. ಸದ್ಯ, ಈ ಇಬ್ಬರು ಆಟಗಾರರಿಗೆ ಸ್ವಾಗತ ಕೋರುವವರು ಕುಂಕುಮ‌ ಇಡುತ್ತಿದ್ದಂತೆ ಬೇಡ ಎಂದು ತಿರಸ್ಕರಿಸಿರುವ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಸಕ್ಕತ್ ವೈರಲ್ ಆಗಿದೆ.

ಟೀಂ ಇಂಡಿಯಾದ ಆಟಗಾರರು ಹೋಟೆಲ್‌ಗೆ ತೆರಳುತ್ತಿದ್ದ ವಿಡಿಯೋ ವೈರಲ್ ಆಗಿದೆ. ಈ ಸಂದರ್ಭದಲ್ಲಿ ಆಟಗಾರರಿಗೆ ಸ್ವಾಗತ ಏರ್ಪಡಿಸಲಾಗಿತ್ತು. ಭಾರತೀಯ ಬೌಲರ್‌ಗಳಾದ ಸಿರಾಜ್ ಹಾಗೂ ಉಮ್ರಾನ್ ಮಲಿಕ್ ಈ ವೇಳೆ ತಮ್ಮ ಹಣೆಗೆ ತಿಲಕ ಇಡದಂತೆ ಹೊಟೇಲ್ ಸಿಬ್ಬಂದಿಗಳನ್ನು‌ ತಡೆದಿದ್ದಾರೆ. ಈ ವಿಡಿಯೋವನ್ನು ನೋಡಿದ ನೆಟ್ಟಿಗರಲ್ಲಿ ಕೆಲವರು ‘ಹಾಗೆ ಮಾಡಬಾರದಿತ್ತು, ಅದು ಭಾರತೀಯ ಸಂಸ್ಕೃತಿಯ ಪ್ರಕಾರ ಸ್ವಾಗತಿಸುವುದಲ್ಲವೇ’ ಎಂದರೆ, ಮತ್ತೆ ಕೆಲವರು ‘ಆಟಗಾರರು ಮಾಡಿದ್ದು‌ ಸರಿ, ಅವರು ಅವರ ಧರ್ಮದ‌ ಪ್ರಕಾರ ನಡೆದುಕೊಂಡಿದ್ದಾರೆ ಅದರಲ್ಲೇನು ತಪ್ಪದೆ’ ಎಂದು ಪ್ರಶ್ನಿಸಿದ್ದಾರೆ.

ಆದರೆ ಇದೇ ವೇಳೆ ತಿಲಕವನ್ನು ತಿರಸ್ಕರಿಸಿದ ಟೀಂ ಇಂಡಿಯಾದ ಬ್ಯಾಟಿಂಗ್‌ ಕೋಚ್ ವಿಕ್ರಮ್ ರಾಥೋರ್ ಅವರನ್ನು‌ ನೆಟ್ಟಿಗರು ತೀವ್ರವಾಗಿ ತರಾಟೆಗೆ ತೆಗೆದುಕೊಂಡಿದ್ದಾರೆ.

ಆದರೆ ಕೆಲವರ ಪ್ರಕಾರ, ಇದು ಹಳೆಯ ವಿಡಿಯೋ. ಏಕೆಂದರೆ ಆಸ್ಟ್ರೇಲಿಯಾ ಪರ ಟೆಸ್ಟ್ ಸರಣಿಗೆ ಆಯ್ಕೆಯಾಗಿಲ್ಲ. ಆದರೂ ವಿಡಿಯೋದಲ್ಲಿ ಅವರಿದ್ದಾರೆ. ಇದು ಶ್ರೀಲಂಕಾ ಅಥವಾ ನ್ಯೂಜಿಲೆಂಡ್ ವಿರುದ್ಧ ನಡೆದ ಪಂದ್ಯದ ವೇಳೆ ನಡೆದಿರುವ ಘಟನೆಯಾಗಿರಬಹುದು ಎಂದು ಕೆಲವರು ಅಭಿಪ್ರಾಯಪಟ್ಟಿದ್ದಾರೆ. ಆದರೆ ವಿಡಿಯೋ ಮಾತ್ರ ಪರ – ವಿರೋಧ ಚರ್ಚೆಗೆ ಆಹಾರವಾಗಿದೆ.