ಬರಲಿದೆ ಭಾರತದ ಮೊದಲ ಸೋಲಾರ್ ಕಾರು; 45 ನಿಮಿಷ ಚಾರ್ಚ್ ಮಾಡಿದ್ರೆ 250 ಕಿ.ಮೀ. ಓಡುತ್ತೆ.

ನ್ಯೂಸ್ ಆ್ಯರೋ : ದಿನ ಕಳೆದಂತೆ ವಾಹನೋದ್ಯಮ ನೂರಾರು ಹೊಸ ಆವಿಷ್ಕಾರಗಳನ್ನು, ಅತ್ಯಾಧುನಿಕ ತಂತ್ರಜ್ಞಾನಗಳನ್ನು‌ ಕಾಣುತ್ತಿದೆ. ವೈವಿಧ್ಯಮಯ ವಾಹನಗಳು ಮಾರುಕಟ್ಟೆಯನ್ನು ತನ್ನದಾಗಿಸಲು‌ ಹವಣಿಸುತ್ತಿವೆ. ಅದೇ ಸಾಲಿಗೆ ಈಗ ಭಾರತದ ಸೋಲಾರ್ ಕಾರೊಂದು ಸೇರುವ ಸಾಧ್ಯತೆ‌ ಇದೆ. 2023ರ ಗ್ರೇಟ್ ನೋಯ್ಡಾ ಆಟೋ ಎಕ್ಸಪೋದಲ್ಲಿ ಇಂತಹದ್ದೊಂದು ಅತ್ಯಾಧುನಿಕ ಭಾರತೀಯ ಸೋಲಾರ್ ಕಾರು ಬಿಡುಗಡೆಗೆ ಸಜ್ಜಾಗಿ ಪ್ರದರ್ಶಿಸಲ್ಪಡುತ್ತಿದೆ‌.

ಈ ಕಾರು ‘ನ್ಯಾನೋ’ ಕಾರಿನ ಆಕಾರದಲ್ಲಿದ್ದು, ಇದರಲ್ಲಿ ಇಬ್ಬರು ವಯಸ್ಕರು ಹಾಗೂ ಒಂದು ಮಗು ಕುಳಿತುಳ್ಳಲು ಅವಕಾಶವಿದೆ‌. ಇದು ಬ್ಯಾಟರಿ ಚಾಲಿತ ಸಿಂಗಲ್ ಡೋರ್ ಕಾರು. ಟಾಟಾ ನ್ಯಾನೋ ಮಾದರಿಯ ಈ ಕಾರು ಕೇವಲ 45 ನಿಮಿಷದ ಚರ್ಜಿಂಗ್ ಮೂಲಕ ಬರೋಬ್ಬರಿ 250 ಕಿ.ಮೀ. ಚಲಿಸುವ ಸಾಮರ್ಥ್ಯವನ್ನು ಹೊಂದಿದೆ.ಇದನ್ನು ಎಲೆಕ್ಟ್ರಿಕ್ ಕಾರೆಂದರೂ ತಪ್ಪಿಲ್ಲ. ಈ‌ ಕಾರಿನ‌ ಮೇಲೆ ರೂಫ್ ಫ್ಯಾನೆಲ್ ಗಳ ಆಯ್ಕೆಯೂ ಇದೆ. ಈ ಕಾರನ್ನು ತೆರೆದ ಪ್ರದೇಶದಲ್ಲಿ ನಿಲ್ಲಿಸಿದರೆ ರೂಫ್ ಪ್ಯಾನಲ್ ಸೂರ್ಯನ‌ ಕಿರಣಗಳಿಂದ ಚಾರ್ಜ್ ಆಗಲಿದೆ.

ಸದ್ಯ, ಆಟೋ ಎಕ್ಸಪೋದಲ್ಲಿ ಈ ಕಾರಿನ‌ ಮಾದರಿಯಷ್ಟೇ ಪ್ರದರ್ಶನವಾಗಿತ್ತಿದ್ದು, ಸೋಲಾರ್ ಕಾರಿನ ಪರೀಕ್ಷೆಗಳು ನಡೆಯುತ್ತಿವೆ. ಬಹುಶಃ ಈ ಕಾರು ಮುಂದಿನ ವರ್ಷ ಅಂದರೆ 2024ರಲ್ಲಿ ಗ್ರಾಹಕರ ಬಳಕೆಗೆ ಬರುವ ಸಾಧ್ಯತೆ ಇದೆ. ಜೊತೆಗೆ ಈ‌ ವಾಹನ 6 kW ಲಿಕ್ವಿಡ್-ಕೂಲ್ಡ್ ಎಲೆಕ್ಟ್ರಿಕ್ ಮೋಟರ್‌ನಿಂದ ಚಾಲಿತವಾಗುತ್ತದೆ.

ಇನ್ನುಳಿದಂತೆ, ಈ ಕಾರಿನ‌ ಬ್ಯಾಟರಿ ಸಾಮರ್ಥ್ಯ 14 KWh ಇದ್ದು, ಒಮ್ಮೆ ಚಾರ್ಜ್ ಮಾಡಿದರೆ 250 ಕಿ.ಮೀ. ಓಡಬಲ್ಲದು. ಮನೆಯಲ್ಲಿರುವ ಸಾಮಾನ್ಯ ಸಾಕೆಟ್ ಮೂಲಕವೆ ಇದನ್ನು ಚಾರ್ಜ್ ಮಾಡಬಹುದಾಗಿದ್ದು, 45 ನಿಮಿಷಗಳಲ್ಲಿ 80% ಚಾರ್ಜ್ ಆಗುತ್ತದೆ. ಈ ಕಾರಿನ ಮುಂಭಾಗದಲ್ಲಿ ಒಂದು ಸೀಟ್ ಹಾಗೂ ಹಿಂದೆ ಸ್ವಲ್ಪ ದೊಡ್ಡದಾದ ಸೀಟ್ ಅಳವಡಿಸಲಾಗಿದೆ. ಕಾರು ತಯಾರಕ ಕಂಪೆನಿಯು ಮುಂದಿನ ವರ್ಷ ಈ ಸೋಲಾರ್ ಕಾರನ್ನು ಬೆಂಗಳೂರು ಹಾಗೂ ಪುಣೆಯಲ್ಲಿ ಬಿಡುಗಡೆ ಮಾಡುವ ಸಾಧ್ಯತೆ ಇದೆ.‌ಇದರ ಬೆಲೆ‌ ಹಾಗೂ ಇನ್ನುಳಿದ ಮಾಹಿತಿ ಇನ್ನಷ್ಟೆ ತಿಳಿಯಬೇಕಿದೆ.