ಈ ಬಾರಿ ನಿಜವಾಯ್ತು ಜಿಂಬಾಬ್ವೆ ಕ್ರಿಕೆಟಿಗ ಹೀತ್ ಸ್ಟ್ರೀಕ್ ನಿಧನ ಸುದ್ದಿ – ಜಿಂಬಾಬ್ವೆ ತಂಡಕ್ಕೆ ಹೊಸರೂಪ ಕೊಟ್ಟಿದ್ದ ನಾಯಕ ಇನ್ನಿಲ್ಲ

ನ್ಯೂಸ್ ಆ್ಯರೋ‌ : ಆಗಸ್ಟ್ 23ರಂದು ಸಾವನ್ನಪ್ಪಿದ್ದಾರೆ ಎಂಬ ವದಂತಿಯಿಂದ ಸಾಕಷ್ಟು ಸುದ್ದಿಯಾಗಿದ್ದ ಜಿಂಬಾಬ್ವೆ ತಂಡದ ನಾಯಕ, ಮಾಜಿ ಕ್ರಿಕೆಟಿಗ ಹೀತ್ ಸ್ಟ್ರೀಕ್ ಇಂದು (ಸೆಪ್ಟೆಂಬರ್ 3) ಮುಂಜಾನೆ ಮೃತಪಟ್ಟಿದ್ದಾರೆ. ಹೀತ್ ಸ್ಟ್ರೀಕ್ ಅವರ ಕುಟುಂಬ ಸದಸ್ಯರು ಇದನ್ನು ಖಚಿತಪಡಿಸಿದ್ದಾರೆ.

ಹಿಂದೆ ವದಂತಿ ಹಬ್ಬಿತ್ತು..!!

ಆಗಸ್ಟ್ 23ರ ಮುಂಜಾನೆಯಂದು ಹೀತ್ ಸ್ಟ್ರೀಕ್ ಆಪ್ತ ಹೆನ್ರಿ ಒಲಂಗಾ ಎಕ್ಸ್ (ಟ್ವಿಟರ್​) ನಲ್ಲಿ, ಸ್ಟ್ರೀಕ್ ನಿಧನರಾಗಿದ್ದಾರೆ ಎಂದು ಮಾಹಿತಿ ನೀಡಿದ್ದರು. ಆ ಬಳಿಕ ಸ್ಪಷ್ಟನೆ ನೀಡಿದ್ದ ಸ್ಟ್ರೀಕ್, ನಾನು ಇನ್ನು ಜೀವಂತವಾಗಿದ್ದೇನೆ ಮತ್ತು ಆರೋಗ್ಯವಾಗಿದ್ದೇನೆ ಎಂದು ಹೇಳಿಕೊಂಡಿದ್ದರು.

ಬಹಳ ದಿನಗಳಿಂದ ಕ್ಯಾನ್ಸರ್ ಕಾಯಿಲೆಯಿಂದ ಬಳಲುತ್ತಿದ್ದ ಹೀತ್ ಸ್ಟ್ರೀಕ್ ಇದೀಗ ನಿಜವಾಗಿಯೂ ಸಾವನ್ನಪ್ಪಿದ್ದು, ಈ ಮಾಹಿತಿಯನ್ನು ಸ್ವತಃ ಅವರ ಪತ್ನಿ ನಾಡಿನ್ ಸ್ಟ್ರೀಕ್ ಖಚಿತ ಪಡಿಸಿದ್ದಾರೆ. “ಈ ಮುಂಜಾನೆ ನನ್ನ ಜೀವನದ ಅತ್ಯಂತ ದೊಡ್ಡ ಪ್ರೀತಿ ಮತ್ತು ನನ್ನ ಸುಂದರ ಮಕ್ಕಳ ತಂದೆ, ದೇವತೆಗಳೊಂದಿಗೆ ಇರಲು ಇಹಲೋಕ ತ್ಯಜಿಸಿದ್ದಾರೆ” ಎಂದು ಫೇಸ್ ಬುಕ್ ನಲ್ಲಿ ಬರೆದುಕೊಂಡಿದ್ದಾರೆ.

49ರ ಹರೆಯದ ಹೀತ್ ಸ್ಟ್ರೀಕ್ ಜಿಂಬಾಬ್ವೆ ಪರ 65 ಟೆಸ್ಟ್ ಮತ್ತು 189 ಏಕದಿನ ಪಂದ್ಯಗಳನ್ನಾಡಿ, ಕ್ರಮವಾಗಿ 1,990 ಮತ್ತು 2,943 ರನ್ ಕಲೆಹಾಕಿದ್ದರು. ಬೌಲಿಂಗ್​ನಲ್ಲಿ ತಮ್ಮ ಪರಾಕ್ರಮ ತೋರಿದ್ದ ಅವರು, ಟೆಸ್ಟ್ ಕ್ರಿಕೆಟ್‌ನಲ್ಲಿ 216 ಮತ್ತು ಏಕದಿನದಲ್ಲಿ 239 ವಿಕೆಟ್‌ಗಳನ್ನು ಕಬಳಿಸಿದ್ದರು.