ತಲೆ ಕೂದಲು ಬೆಳೆಸಿ ಗಿನ್ನಿಸ್ ದಾಖಲೆ ಬರೆದ ಮಹಿಳೆ – ಈಕೆಯ ತಲೆಗೂದಲು ಎಷ್ಟು ಉದ್ದ ಇದೆ ಗೊತ್ತಾ?

ನ್ಯೂಸ್ ಆ್ಯರೋ : ಕೂದಲಿನ ಮೇಲೆ ಸಾಮಾನ್ಯವಾಗಿ ಎಲ್ಲ ಹೆಣ್ಣು ಮಕ್ಕಳಿಗೆ ಪ್ರೀತಿ ಇದ್ದೇ ಇರುತ್ತದೆ. ಆದರೆ ಉದ್ದ ಕೂದಲನ್ನು ಸಂಭಾಳಿಸೋದು ಕಷ್ಟ ಎಂದು ಕೊಂಡು ಹೆಚ್ಚಿನವರು ಕೂದಲಿಗೆ ಕತ್ತರಿ ಹಾಕುತ್ತಾರೆ.

ಆದರೆ ಇಲ್ಲೊಬ್ಬರು ತಮ್ಮ ಕೂದಲು ಉದ್ದ ಬೆಳೆಯಲು ಬಿಟ್ಟು ಈಗ ವಿಶ್ವ ದಾಖಲೆ ಬರೆದಿದ್ದಾರೆ.

46 ವರ್ಷದ ಉತ್ತರ ಪ್ರದೇಶದ ಸ್ಮಿತಾ ಶ್ರೀವಾಸ್ತವ್ ಉದ್ದನೆಯ ಕೂದಲಿಗಾಗಿ ಗಿನ್ನೆಸ್ ವಿಶ್ವ ದಾಖಲೆ ಪ್ರಶಸ್ತಿಯನ್ನು ಪಡೆದಿದ್ದಾರೆ.

ಸ್ಮಿತಾ ಅವರು 7 ಅಡಿ ಮತ್ತು 9 ಇಂಚು ಉದ್ದದ ಕೂದಲು ಬೆಳೆಸಿಕೊಂಡಿದ್ದಾರೆ. ಸಣ್ಣ ವಯಸ್ಸಿನಲ್ಲೇ ಅವರಿಗೆ ತಮ್ಮ ಕೂದಲಿನ ಮೇಲೆ ಪ್ರೀತಿ ಉಂಟಾಗಿತ್ತು. ಹೀಗಾಗಿ ಕೂದಲನ್ನು ಕತ್ತರಿಸದೆ ಹಾಗೆ ಬಿಟ್ಟಿದ್ದರು. 1980ರ ದಶಕದ ಉದ್ದ ಮತ್ತು ಸುಂದರವಾದ ಕೂದಲನ್ನು ಹೊಂದಿದ್ದ ಹಿಂದಿ ನಟಿಯರ ಶೈಲಿಯನ್ನು ಅನುಕರಿಸಲು ಪ್ರಾರಂಭಿಸಿದ ಸ್ಮಿತಾ ಅವರ ವಯಸ್ಸು ಆಗ ಕೇವಲ 14.

ಕೂದಲು ಬಿಟ್ಟರೆ ಆಯಿತೇ? ಅಷ್ಟು ಉದ್ದ ಕೂದಲನ್ನು ನೋಡಿಕೊಳ್ಳುವುದು ಸುಲಭದ ಮಾತಲ್ಲ. ಪ್ರತಿ ವಾರ ಕೂದಲನ್ನು ತೊಳೆಯಲು, ಒಣಗಿಸಲು, ತೊಡೆದುಹಾಕಲು ಮತ್ತು ಸ್ಟೈಲಿಂಗ್ ಮಾಡಲು ಸುಮಾರು 3 ಗಂಟೆ ಬೇಕಾಗುತ್ತದೆ. ಇದರಲ್ಲಿ ಕೇವಲ ಕೂದಲು ತೊಳೆಯಲು 45 ನಿಮಿಷ ತೆಗೆದುಕೊಳ್ಳುತ್ತದೆ ಎನ್ನುತ್ತಾರೆ ಅವರು.

ಇಷ್ಟೆಲ್ಲ ಕಷ್ಟವಾಗಿದ್ದರೂ ನಾನು ನನ್ನ ಕೂದಲನ್ನು ಹೆಚ್ಚು ಪ್ರೀತಿಯಿಂದ ಆರೈಕೆ ಮಾಡಿದ್ದೇನೆ. ಇದೀಗ ಅವರ ಪರಿಶ್ರಮಕ್ಕೆ ಪ್ರತಿಫಲ ಎನ್ನುವಂತೆ ಅವರು ತಮ್ಮ ಸೊಂಪಾದ ಕೂದಲಿನಿಂದ ಗಿನ್ನೆಸ್‌ ವಿಶ್ವ ದಾಖಲೆ ಬರೆದಿದ್ದಾರೆ.