‘ಸನಕ್’ ಹಾಡಿನ ಅಸಭ್ಯ ಸಾಹಿತ್ಯಕ್ಕೆ ತೀವ್ರ ಆಕ್ಷೇಪ – ಕೊನೆಗೂ ಕ್ಷಮೆಯಾಚಿಸಿದ ರ್ಯಾಪರ್ ಬಾದ್ ಶಾ : ಈ ಹಾಡಲ್ಲಿ ಅಂಥಾದ್ದೇನಿದೆ?
- ಮನರಂಜನೆ
- April 26, 2023
- No Comment
- 109
ನ್ಯೂಸ್ ಆ್ಯರೋ : ವಿವಾದ, ಗಲಾಟೆಗಳು, ಅತಿರೇಕದ ವರ್ತನೆ ಇವೆಲ್ಲಾ ಸೆಲೆಬ್ರಿಟಿಗಳ ಹುಟ್ಟುಗುಣದಂತೆ. ದಿನಕ್ಕೊಂದು ಸೆಲೆಬ್ರಿಟಿಯ ವಿವಾದಗಳು ಸುದ್ದಿಯಾಗುತ್ತಲೇ ಇರುತ್ತದೆ. ಇತ್ತೀಚೆಗೆ ರ್ಯಾಪ್ ಹಾಡುಗಳ ಕಿಂಗ್ ಎನಿಸಿಕೊಂಡ ಬಾದ್ ಶಾ ಹಾಡಿದ ‘ಸನಕ್’ ಹಾಡಿನ ಸಾಹಿತ್ಯಕ್ಕೆ ಸೋಶಿಯಲ್ ಮೀಡಿಯಾದಲ್ಲಿ ತೀವ್ರ ಆಕ್ಷೇಪ ವ್ಯಕ್ತವಾಗಿತ್ತು. ಅಂತಿಮವಾಗಿ ಬಾದ್ ಶಾ ಕ್ಷಮೆಯಾಚಿಸುವುದರೊಂದಿಗೆ ವಿವಾದಕ್ಕೆ ತೆರೆ ಬಿದ್ದಿದೆ. ಅಷ್ಟಕ್ಕೂ ಸಾಹಿತ್ಯದಲ್ಲಿ ಏನಿತ್ತು, ಬಾದ್ ಶಾ ಎಡವಿದ್ದೆಲ್ಲಿ ಎಂಬುದನ್ನು ನೋಡೋಣ.
ಅಷ್ಟಕ್ಕೂ ಆಗಿದ್ದೇನು?
ಬಾದ್ ಶಾ ಅವರ ‘ಸನಕ್’ ಹಾಡು ಬಿಡುಗಡೆಯಾಗುತ್ತಿದ್ದಂತೆ ಲಕ್ಷಾಂತರ ವೀಕ್ಷಣೆ ಪಡೆಯಿತು. ಆದರೆ ಹಾಡಿನ ಬಗ್ಗೆ ತಕರಾರು ಎತ್ತಿದ ಉಜ್ಜಯಿನಿಯ ಮಹಾಕಾಳೇಶ್ವರ ದೇಗುಲದ ಅರ್ಚಕರಾದ ಮಹೇಶ್ ಅವರು ‘ಹಾಡಿನಲ್ಲಿ ಅಶ್ಲೀಲ ಪದಗಳ ಜೊತೆಗೆ ಶಿವ ದೇವರ ಹೆಸರನ್ನು ಬಳಸಿದ್ದು ಅಕ್ಷಮ್ಯ ಅಪರಾಧ. ತಕ್ಷಣವೇ ಈ ಹಾಡಿನಿಂದ ದೇವರ ಹೆಸರನ್ನು ತೆಗೆದು ಕ್ಷಮೆ ಕೇಳಬೇಕು. ಇಲ್ಲವಾದಲ್ಲಿ ಈ ಬಗ್ಗೆ ಎಪ್.ಐ.ಆರ್ ದಾಖಲಿಸಲಾಗುವುದು’ ಎಂದು ಎಚ್ಚರಿಕೆ ನೀಡಿದ್ದರು.
ಕ್ಷಮೆ ಕೇಳಿದ ಬಾದ್ ಶಾ!
ಅರ್ಚಕರ ಖಡಕ್ ಎಚ್ಚರಿಕೆಯ ನಂತರ ಎಲ್ಲಾ ಕಡೆಯಿಂದ ಬಾದ್ ಶಾ ಅವರಿಗೆ ಟೀಕೆಗಳು, ಆಕ್ರೋಶದ ಮಾತುಗಳು ಕೇಳಿ ಬರಲಾರಂಭಿಸಿದವು. ಇದರಿಂದ ಎಚ್ಚೆತ್ತುಕೊಂಡ ಬಾದ್ ಶಾ ತಮ್ಮ ಸೋಶಿಯಲ್ ಮೀಡಿಯಾ ಖಾತೆಯ ಮೂಲಕ, ‘ಇತ್ತೀಚೆಗೆ ಬಿಡುಗಡೆಯಾದ ‘ಸನಕ್’ ಸಾಹಿತ್ಯವು ಕೆಲವರ ಭಾವನೆಗೆ ದಕ್ಕೆ ತಂದಿದೆ ಎಂಬ ವಿಚಾರ ನನ್ನ ಗಮನಕ್ಕೆ ಬಂದಿದೆ. ಇದನ್ನು ಸ್ವ ಇಚ್ಛೆಯಿಂದ ಅಥವಾ ತಿಳಿದು ನಾನು ಮಾಡಿಲ್ಲ. ನಾನು ಅತ್ಯಂತ ಉತ್ಸಾಹ ಮತ್ತು ಪ್ರಾಮಾಣಿಕತೆಯಿಂದ ಸಾಹಿತ್ಯಗಳನ್ನು ಅಭಿಮಾನಿಗಳೆದುರು ತರಲು ಆಶಿಸುತ್ತೇನೆ. ಹೀಗಾಗಿ ನನ್ನ ಹಾಡಿನ ಕೆಲವು ಸಾಹಿತ್ಯಗಳನ್ನು ಬದಲಾಯಿಸಲು ಕ್ರಮ ಕೈಗೊಂಡಿದ್ದೇನೆ’ ಎಂದಿದ್ದಾರೆ.
ಮುಂದುವರೆಸಿದ ಬಾದ್ ಶಾ,’ ಇದರೊಂದಿಗೆ ಡಿಜಿಟಲ್ ಫ್ಲಾಟ್ ಫಾರ್ಮ್ ನಲ್ಲೂ ಬದಲಿ ಕ್ರಮ ಕೈಗೊಳ್ಳುತ್ತೇನೆ. ಹೀಗಾಗಿ ಅಭಿಮಾನಿಗಳು ಮತ್ತು ಜನರು ಸ್ವಲ್ಪ ಕಾಲಾವಕಾಶ ನೋಡಿ ತಾಳ್ಮೆಯಿಂದ ಇರಬೇಕು. ನನಗೆ ಅಭಿಮಾನಿಗಳೇ ಆಧಾರ.. ಹೀಗಾಗಿ ನಾನು ನಿಮ್ಮ ಮಾತಿಗೆ ಗೌರವ ನೀಡುತ್ತೇನೆ ಮತ್ತು ನಿಮ್ಮನ್ನು ಪ್ರೀತಿಸುತ್ತೇನೆ’ ಎಂದು ಬರೆದುಕೊಂಡಿದ್ದಾರೆ.
ತಿಂಗಳ ಹಿಂದಷ್ಟೇ ಬಿಡುಗಡೆಯಾದ ‘ಸನಕ್’ ಸಾಹಿತ್ಯವು ಅತ್ಯಂತ ಕಡಿಮೆ ಸಮಯದಲ್ಲಿ ಬರೋಬ್ಬರಿ 22 ಮಿಲಿಯನ್ ವೀಕ್ಷಣೆ ಪಡೆದಿತ್ತು. ಆದರೆ ಇದೀಗ ಅದಕ್ಕೆ ಆಕ್ಷೇಪ ವ್ಯಕ್ತವಾಗಿರುವ ಕಾರಣ ರ್ಯಾಪರ್ ಬಾದ್ ಶಾ ಸಾಹಿತ್ಯದ ಸಾಲುಗಳನ್ನು ಬದಲಿಸಲು ನಿರ್ಧರಿಸಿದ್ದಾರೆ.