14 ವರ್ಷದಿಂದ ಈಕೆ ಹಾಲು ಮತ್ತು ಬೆಲ್ಲ ಬಿಟ್ಟು ಮತ್ತೇನನ್ನೂ ಸೇವಿಸಿಲ್ಲ! – ಅಚ್ಚರಿಯ ಜೀವನ ನಡೆಸುತ್ತಿದ್ದಾಳೆ ಕರ್ನಾಟಕದ ಈ ಬಾಲಕಿ! ಯಾರೀಕೆ?

ನ್ಯೂಸ್ ಆ್ಯರೋ : ಮನುಷ್ಯ ಆರೋಗ್ಯವಾಗಿರಲು ಆಹಾರ ಬಲು ಮುಖ್ಯ. ಮೂರು ಹೊತ್ತು ಚೆನ್ನಾಗಿ ಆಹಾರ ಸೇವಿಸಿದರೆ ಮಾತ್ರ ಆರೋಗ್ಯವೂ ಚೆನ್ನಾಗಿರುತ್ತದೆ. ಕೆಲವೊಬ್ಬರಿಗೆ ಒಂದು ಹೊತ್ತು ಊಟ ಬಿಟ್ಟರೂ ಆರೋಗ್ಯ ಹಾಳಾಗುತ್ತದೆ. ಅಂತಹದ್ದರಲ್ಲಿ ಇಲ್ಲೊಬ್ಬ ಬಾಲಕಿ ಬರೋಬ್ಬರಿ 14 ವರ್ಷದಿಂದ ಬೆಲ್ಲ ಮತ್ತು ಹಾಲನ್ನು ಬಿಟ್ಟು ಮತ್ತೇನನ್ನೂ ಸೇವಿಸಿಲ್ಲ. ಹಾಗಂತ ಈ ಬಾಲಕಿಯ ಆರೋಗ್ಯವೇನು ಹದಗೆಟ್ಟಿಲ್ಲ. ಹಾಗಿದ್ದರೆ ಇಂತಹದ್ದೊಂದು ಅಚ್ಚರಿಯ ಜೀವನ ನಡೆಸುತ್ತಿರುವ ಬಾಲಕಿ ಯಾರು? ಆಕೆಯ ಹಿನ್ನಲೆಯೇನು ಎಂಬುದನ್ನು ನೋಡೋಣ.

ಯಾರು ಈ ಬಾಲಕಿ?

ಯಾದಗಿರಿ ಜಿಲ್ಲೆಯ ಸುರಪುರ ಪಟ್ಟಣದ ರಂಗಂಪೇಟ ನಿವಾಸಿ ನಾಗಪ್ಪ-ಅಡಿವೆಮ್ಮ ಎಂಬ ದಂಪತಿಯ 2ನೇ ಮಗಳಾದ ರೇಣುಕಮ್ಮ ಈ ಅಚ್ಚರಿಯ ಜೀವನ ನಡೆಸುತ್ತಿರುವ ಬಾಲಕಿ.‌ ಈಕೆ ಕೇವಲ ಬೆಲ್ಲ ಹಾಗೂ ಹಾಲು ಸೇವಿಸಿ ಬರೋಬ್ಬರಿ 14 ವರ್ಷದಿಂದ ಬದುಕಿದ್ದಾಳೆ.

ಜೊತೆಗೆ ದೈಹಿಕ ಮತ್ತು‌ಮಾನಸಿಕವಾಗಿಯೂ ಆರೋಗ್ಯವಾಗಿದ್ದಾಳೆ. 14 ವರ್ಷ ವಯಸ್ಸಿನ‌ ಈಕೆ ರಂಗಂಪೇಟೆಯ ಪ್ರಿಯದರ್ಶಿನಿ ಪ್ರೌಢಶಾಲೆಯಲ್ಲಿ ವಿದ್ಯಾಭ್ಯಾಸ ಮಾಡ್ತಿದ್ದಾಳೆ.

ಈಕೆ ಯಾಕೆ ಊಟ ಮಾಡುವುದಿಲ್ಲ?

ರೇಣುಕಮ್ಮ ತಮ್ಮ ಮನೆಯಲ್ಲಿ ತಾನೇ ಅಡುಗೆ ತಯಾರು ಮಾಡ್ತಾಳೆ. ಆದರೆ ತಯಾರಿಸಿದ ಯಾವುದೇ ಅಡುಗೆಯನ್ನು ಊಟ ಮಾತ್ರ ಮಾಡುವುದಿಲ್ಲ. ಮನೆಯಲ್ಲಿ ಅವರ ತಂದೆ-ತಾಯಿ, ಸಹೋದರರು ಹಾಗೂ ತಮ್ಮ ಕ್ಲಾಸಿನ ಸಹಪಾಠಿಗಳು ಎಷ್ಟೇ ಒತ್ತಾಯ ಮಾಡಿದ್ರು ಊಟ ಮಾತ್ರ ಮಾಡೋದಿಲ್ಲ.

ಯಾಕಂದ್ರೆ ಈ ಬಾಲಕಿ ರೇಣುಕಮ್ಮನಿಗೆ ಊಟ ಮಾಡಿದ್ರೆ ವಾಂತಿ ಆಗುತ್ತಂತೆ. ಇನ್ನು ಬಾಲಕಿ ಸೇವಿಸುವ ಆಹಾರ ಪದ್ಧತಿ ಬಗ್ಗೆಯೂ ವೈದ್ಯರು ತಪಾಸಣೆ ಮಾಡಿದ್ದು, ಈಕೆಯ ಆಹಾರ ಪದ್ದತಿಯಲ್ಲಿ ವೈದ್ಯ ಲೋಕಕ್ಕೆ ಸವಾಲೆಸೆದಂತಿದೆ.

ಕಂಗಾಲಾದ ಹೆತ್ತವರು!

ಬಾಲಕಿ ರೇಣುಕಮ್ಮ ಅಚ್ಚರಿಯ ಜೀವನ ಹೆತ್ತವರಿಗೆ ನುಂಗಲಾಗದ ತುತ್ತಾಗಿದೆ. ಈಕೆ ಮಗುವಾಗಿದ್ದಾಗಲೂ ಊಟ ಮಾಡುತ್ತಿರಲ್ಲಿಲ್ಲವಂತೆ. ಆಗ ಕೇವಲ ಹಾಲನ್ನು ಕುಡಿಸುತ್ತಿದ್ದರು. ಬಳಿಕ ತುಸು ದೊಡ್ಡವಳಾದ ಮೇಲೆ ಈಕೆ ಊಟ ಮುಟ್ಟಲಿಲ್ಲ.ಆಗ ಹಸಿವು ತಣಿಸಲು ಹೆತ್ತವರು ಬೆಲ್ಲ ಮತ್ತು ಹಾಲು‌ ನೀಡಿದ್ದಾರೆ. ಅಂದಿನಿಂದ ಹಿಡಿದು ಇಂದಿನವರೆಗೂ ರೇಣುಕಮ್ಮ ಹಾಲು, ಬೆಲ್ಲ ಬಿಟ್ಟು ಮತ್ಯಾವ ಆಹಾರವನ್ನೂ ತಿಂದಿಲ್ಲ. ಈಕೆ ಯಾಕೆ ಹೀಗೆ? ಎಂದು ವೈದ್ಯರಿಗೂ ಅರ್ಥವಾಗುತ್ತಿಲ್ಲ. ಹೆತ್ತವರಂತೂ ಮಗಳನ್ನು ಕಂಡು ಕಂಗಾಲಾಗಿದ್ದಾರೆ. ಸದ್ಯ, ಈ ವಿಚಾರ ಎಲ್ಲೆಡೆ ವೈರಲ್ ಆಗಿದೆ.