ಮಂಗಳೂರು : ಗಂಡನಿಲ್ಲದೇ ಏಕಾಂಗಿಯಾದ ಮುಸ್ಲಿಂ ಮಹಿಳೆಯ ಕ್ಷೀರ ಕ್ರಾಂತಿ – 100ಕ್ಕೂ ಅಧಿಕ ಹಸು, 350 ಲೀಟರ್ ಹಾಲು ಉತ್ಪಾದನೆ : ಸಾಧಕಿಯ ಪರಿಚಯ ಮಾಡ್ಕೊಳ್ಳಿ..!!
- ವೈರಲ್ ನ್ಯೂಸ್
- November 23, 2023
- No Comment
- 145
ನ್ಯೂಸ್ ಆ್ಯರೋ : ಹೇಳುವುದಕ್ಕೆ ಎಂಜಿನಿಯರ್ ಪದವೀಧರೆ ಆದರೆ ಮಾಡುವುದಕ್ಕೆ ಕೆಲಸವಿಲ್ಲ, ಕೈ ಹಿಡಿದ ಪತಿಯ ಅಕಾಲಿಕ ಮರಣ, ಮೂರು ಜನ ಹೆಣ್ಣು ಮಕ್ಕಳನ್ನು ಸಾಕುವ ಹೊರೆ ಇಷ್ಟೆಲ್ಲ ಕಷ್ಟವಿದ್ದೂ ಕೂಡ ಆಕೆ ಎದೆಗುಂದಲಿಲ್ಲ. ಸವಾಲು, ಒತ್ತಡಗಳಿಗೆ ಮಣಿದು ಮೂಲೆಯಲ್ಲಿ ಕುಳಿತು ಅಳುತ್ತಾ ಕೂರಲಿಲ್ಲ. ಎಲ್ಲ ಸವಾಲುಗಳನ್ನು ಮೆಟ್ಟಿ ಆಕೆ ಹೈನುಗಾರಿಕೆ ಆರಂಭಿಸಿದಳು. ಹೈನುಗಾರಿಕೆಯಲ್ಲಿ ಕ್ಷೀರ ಕ್ರಾಂತಿಯನ್ನೇ ಮಾಡಿ ಇಂದು ಲಕ್ಷ ಲಕ್ಷ ಆದಾಯ ಸಂಪಾದಿಸುತ್ತಿದ್ದಾಳೆ. ಇಷ್ಟೆಲ್ಲಾ ಮಾಡಿದ್ದು ಓರ್ವ ಮುಸಲ್ಮಾನ್ ಮಹಿಳೆ. ಮಂಗಳೂರಿನ ಈ ದಿಟ್ಟ ಮಹಿಳೆಯ ಕ್ಷೀರ ಕ್ರಾಂತಿ ಯಶೋಗಥೆ ಇಲ್ಲಿದೆ.
ಸವಾಲುಗಳಿಗೆ ಹೆದರದ ಮೈಮುನಾ!
ದಕ್ಷಿಣ ಕನ್ನಡ ಜಿಲ್ಲೆಯ ಹರೇಕಳ ನಿವಾಸಿಯಾಗಿರುವ ಮೈಮುನಾ ಇಂಜಿನಿಯರಿಂಗ್ ಪದವೀಧರೆ. ಇವರ ಪತಿ ಮಜೀದ್ ಕೆಲ ವರ್ಷಗಳ ಹಿಂದೆ ಅಕಾಲಿಕವಾಗಿ ಸಾವಿಗೀಡಾದರು. ಮೂರು ಹೆಣ್ಣು ಮಕ್ಕಳನ್ನು ಸಾಕುವ ಹೊರೆ ಮೈಮುನಾ ಮೇಲೆ ಬಿತ್ತು. ಆದರೆ ಮಾಡುವುದಕ್ಕೆ ಯಾವುದೇ ಕೆಲಸವಿರಲಿಲ್ಲ.
ಸಂಬಂಧಿಕರು ದೂರವಾದರು. ಬದುಕುವುದಕ್ಕಾಗಿ ಮನೆಯಲ್ಲಿದ್ದ ಹಸುಗಳನ್ನು ಮಾರಾಟ ಮಾಡಿದರು. ಆದರೂ ಜೀವನ ನಿರ್ವಹಣೆ ಕಷ್ಟವಾಯಿತು. ಅಂತಿಮವಾಗಿ ಮತ್ತೆ ಮೈಮುನಾ ದಿಟ್ಟ ನಿರ್ಧಾರ ಮಾಡಿ ಹೈನುಗಾರಿಕೆಯೆಡೆಗೆ ದೃಷ್ಟಿ ನೆಟ್ಟರು.
ಮಗಳ ಸಲಹೆ ಮೇರೆಗೆ ಹಸು ಖರೀದಿ!
ಪತಿಯನ್ನು ಕಳೆದುಕೊಂಡ ಮೇಲೆ ಮೈಮುನಾ ಜೀವನ ನಡೆಸುವುದಕ್ಕಾಗಿ, ಮಕ್ಕಳನ್ನು ಸಾಕುವುದಕ್ಕಾಗಿ ಹರ ಸಾಹಸ ಪಟ್ಟಿದ್ದರು. ಇದೇ ವೇಳೆ ಇವರ ಮಗಳು ಮರ್ಜಿನಾ ಮತ್ತೆ ಹಸುಗಳನ್ನು ಸಾಕುವ ಸಲಹೆ ನೀಡಿದ್ದಳು. ಮಗಳ ಸಲಹೆಯ ಮೇರೆಗೆ ಮೈಮುನಾ ಮತ್ತೆ ಹೈನುಗಾರಿಕೆ ಆರಂಭಿಸಿದರು. ಲಕ್ಷ್ಮಿ ಎಂಬ ಗರ್ಭಿಣಿ ಹಸುವನ್ನು ತಂದು ಸಾಕಿದರು. ಅಂದಿನಿಂದ ಇಂದಿನ ವರೆಗೆ ಮೈಮುನಾ ಹಿಂದಿರುಗಿ ನೋಡಿಲ್ಲ. ಹೈನುಗಾರಿಕೆಯಲ್ಲಿ ಮೈಮುನಾ ಮುಟ್ಟಿದ್ದೆಲ್ಲ ಚಿನ್ನವಾಗಿದೆ.
ದಿನಕ್ಕ 350 ಲೀಟರ್ ಹಾಲು ಉತ್ಪಾದನೆ!
ಒಂದು ಹಸುವಿನಿಂದ ಆರಂಭವಾದ ಮೈಮುನಾ ಅವರ ಹೈನುಗಾರಿಕೆ ಇಂದು ದೊಡ್ಡ ಯಶಸ್ಸು ಗಳಿಸಿದೆ. ಸವಾಲುಗಳಿಂದ ಕಂಗೆಟ್ಟು ಹೋಗಿದ್ದ ಮೈಮುನಾ ಇಂದು ನೂರು ಹಸುಗಳ ಒಡತಿ. ದಿನವೊಂದಕ್ಕೆ ಇವರು 350 ಲೀಟರ್ ಹಾಲು ಉತ್ಪಾದಿಸುತ್ತಾರೆ. ಇದರೊಂದಿಗೆ ಮೇಕೆ, ಕುರಿ, ಕೋಳಿ ಸಾಕಾಣೆ ಮಾಡುತ್ತಾ ಲಕ್ಷ, ಲಕ್ಷ ಸಂಪಾದನೆ ಮಾಡುತ್ತಾರೆ. ಸ್ವಾವಲಂಬನೆಯ ಕನಸು ಹೊತ್ತ ಪ್ರತಿಯೊಬ್ಬ ಮಹಿಳೆಗೂ ಹರೇಕಳದ ಮೈಮುನಾ ಸ್ಪೂರ್ತಿಯ ಚಿಲುಮೆಯಾಗಿದ್ದಾರೆ.