ಹತ್ತು ವರ್ಷಗಳ ಬಳಿಕ ತೆರೆದ ಮೈಸೂರು ಅರಮನೆಯ ಖಜಾನೆ – ಅಮೂಲ್ಯ 369 ವಸ್ತುಗಳು ಪತ್ತೆ

ನ್ಯೂಸ್ ಆ್ಯರೋ‌ : ವಿಶ್ವ ಪ್ರಸಿದ್ಧ ಮೈಸೂರು ಅರಮನೆಗೆ ಭೇಟಿ ನೀಡಿದ ಪ್ರವಾಸೋದ್ಯಮ ಸಚಿವ ಪರಿಶೀಲನೆ ನಡೆಸಿದರು. ಅವರ ಸಮ್ಮುಖದಲ್ಲಿ ಸುಮಾರು ಹತ್ತು ವರ್ಷಗಳ ಬಳಿಕ ಅರಮನೆಯ ಖಜಾನೆ ತೆರಯಲಾಗಿದ್ದು, ಅಪರೂಪದ, ಬೆಲೆ ಬಾಳುವ ವಸ್ತುಗಳು ಕಂಡು ಬಂದಿವೆ.

ಪಾರಂಪರಿಕ ಪ್ರವಾಸೋದ್ಯಮ

ಪಾರಂಪರಿಕ ಪ್ರವಾಸೊದ್ಯಮಕ್ಕೆ ಒತ್ತು ನೀಡುವ ನಿಟ್ಟಿನಲ್ಲಿ ಸಚಿವರಿಗೆ ಸಲಹೆ ನೀಡಲಾಗಿತ್ತು. ಅದರ ಭಾಗವಾಗಿ ಅವರು ಅರಮನೆಗೆ ಭೇಟಿ ನೀಡಿದ್ದರು. ಖಜಾನೆಯಲ್ಲಿ 369 ಅಪರೂಪದ ವಸ್ತುಗಳಿವೆ. ಇದು ತಾಮ್ರಪತ್ರ, ನಟರಾಜ ವಿಗ್ರಹ, ನಾಣ್ಯ ಇತ್ಯಾದಿಗಳನ್ನು ಒಳಗೊಂಡಿದೆ. ಇದನ್ನೆಲ್ಲ ನೋಡುವ ಅವಕಾಶ ಸಾರ್ವಜನಿಕರಿಗೆ ಸಿಗಬೇಕು ಎಂದು ಪಾಟೀಲ್ ಹೇಳಿದರು.

ವಸ್ತು ಪ್ರದರ್ಶನಕ್ಕೆ ವ್ಯವಸ್ಥೆ

ಜಿಲ್ಲಾಧಿಕಾರಿ ಹಳೆ ಕಚೇರಿ ಕಟ್ಟಡವು ಪಾರಂಪರಿಕ ಕಟ್ಟಡವಾಗಿದ್ದು, ಅದನ್ನು ವಸ್ತು ಪ್ರದರ್ಶನಕ್ಕೆ ಬಳಸಿಕೊಳ್ಳಲಾಗುವುದು ಮತ್ತು ಅದರ ರಕ್ಷಣೆ, ನಿರ್ವಹಣೆ ಬಗ್ಗೆ ಸೂಕ್ತ ವ್ಯವಸ್ಥೆ ಮಾಡಲಾಗುವುದು ಎಂದು ಸಚಿವರು ಭರವಸೆ ನೀಡಿದರು.

ಖಜಾನೆಯಲ್ಲಿ ಕಂಡುಬಂದ ಕೆಲವು ನಾಣ್ಯಗಳು ಅಕ್ಕಿಕಾಳಿನ ಗಾತ್ರದಲ್ಲಿದ್ದರೆ ಕೆಲವು ಅವರೆ ಕಾಳಿನ ಗಾತ್ರದಲ್ಲಿದ್ದವು. ಶತಮಾನಗಳ ಹಿಂದೆ ಬಳಕೆಯಲ್ಲಿದ್ದ ಚಿನ್ನದ ನಾಣ್ಯಗಳೂ ಇಲ್ಲಿವೆ. ಶಾತವಾಹನರು, ರೋಮನ್ನರು, ವಿಜಯ ನಗರ ಸಾಮ್ರಾಜ್ಯ, ಮೈಸೂರು ಅರಸರ ಕಾಲದ ನಾಣ್ಯಗಳೂ ಇಲ್ಲಿವೆ. ಹಲವು ವರ್ಷಗಳ ಹಿಂದೆ ಉತ್ಖನನ ಮಾಡಲಾಗಿದ್ದ ಇವನ್ನು ಖಜಾನೆಯಲ್ಲಿ ಸಂಗ್ರಹಿಸಿಡಲಾಗಿದೆ.

ಬಹು ದೊಡ್ಡ ತಾಮ್ರ ಪತ್ರವೂ ಪತ್ತೆಯಾಗಿದ್ದು, ಅದರಲ್ಲಿ ಸಾಕಷ್ಟು ಲಿಪಿಗಳಿವೆ. ಇದು ಶತಮಾನಗಳ ಇತಿಹಾಸ ಹೊಂದಿದೆ. ಆಡಳಿತಗಾರರು ಆದೇಶಗಳನ್ನು ಬರೆಯಲು ಇದನ್ನು ಬಳಸುತ್ತಿದ್ದರು ಎನ್ನುತ್ತದೆ ಇತಿಹಾಸ.

ಏನಿದು ಖಜಾನೆ?

ಕರ್ನಾಟಕದಲ್ಲಿ ಪಾರಂಪರಿಕ, ಪುರಾತತ್ವ ಮತ್ತು ವಸ್ತು ಸಂಗ್ರಹಾಲಯಗಳ ಇಲಾಖೆ ಕೇಂದ್ರ ಸ್ಥಾನ ಮೈಸೂರಿನಲ್ಲಿದೆ. ದಶಕಗಳಿಂದ ಪಾರಂಪರಿಕ, ಪುರಾತತ್ವ ಇಲಾಖೆಗೆ ಸಂಬಂಧಿಸಿದ ತಾಣಗಳು, ವಸ್ತು ಸಂಗ್ರಹಾಲಯ, ಕಟ್ಟಡಗಳು, ವಸ್ತುಗಳ ನಿರ್ವಹಣೆ ಮಾಡಲಾಗುತ್ತಿದೆ. ಈ ಇಲಾಖೆ ಸುಪರ್ದಿಯಲ್ಲಿ ಹಲವು ಪಾರಂಪರಿಕ ಮಹತ್ವದ ವಸ್ತುಗಳಿದ್ದು, ಇವುಗಳನ್ನು ಮೈಸೂರು ಅರಮನೆಯ ಆವರಣದ ಪ್ರತ್ಯೇಕ ಕೊಠಡಿಯಲ್ಲಿ ಇರಿಸಲಾಗಿದೆ. ರಾಜ್ಯದ ಏಕೈಕ ಪುರಾತನ ವಸ್ತುಗಳ ಟ್ರಜರಿ ಇದಾಗಿದೆ.