ನೂತನ ಮುಖ್ಯಮಂತ್ರಿ ಸಿದ್ದರಾಮಯ್ಯ ಆಸ್ತಿ ಮೌಲ್ಯ ಎಷ್ಟು ಗೊತ್ತಾ? – ಕೋಟ್ಯಾಧಿಪತಿಯಾದ್ರೂ ಇವರಿಗಿದೆ ಕೋಟಿ‌ ಕೋಟಿ ಸಾಲ…!!

ನ್ಯೂಸ್ ಆ್ಯರೋ‌ : ರಾಜ್ಯದ 24ನೇ ಮುಖ್ಯಮಂತ್ರಿಯಾಗಿ ಇಂದು ಸಿದ್ದರಾಮಯ್ಯ ಪ್ರಮಾಣ ವಚನ ಸ್ವೀಕರಿಸಿದ್ದಾರೆ. ಈ ಪಟ್ಟ ಅವರಿಗೆ ಒಲಿದಿರುವುದು ಇದು ಎರಡನೇ ಬಾರಿ. ಹಾಗಾದರೆ ಸಿದ್ದರಾಮಯ್ಯ ಎಷ್ಟು ಮೌಲ್ಯದ ಅಸ್ತಿ ಹೊಂದಿದ್ದಾರೆ ಎನ್ನುವ ಕುತೂಹಲ ಮೂಡುವುದು ಸಹಜ. ಅಫಿಡವಿತ್ ನಲ್ಲಿ ಸಿದ್ದರಾಮಯ್ಯ ತಮ್ಮ ಆದಾಯಗಳ ವಿವರಗಳನ್ನು ಸಲ್ಲಿಸಿದ್ದು ಆ ಕುರಿತಾದ ಮಾಹಿತಿ ಇಲ್ಲಿದೆ.

ಸಿದ್ದರಾಮಯ್ಯ 2023ರ ಚುನಾವಣಾ ಅಫಿಡವಿಟ್‌ನಲ್ಲಿ ಒಟ್ಟು 51 ಕೋಟಿ ರೂ. ಆಸ್ತಿ ಹೊಂದಿರುವುದಾಗಿ ತಿಳಿಸಿದ್ದರು. ಸಿದ್ದರಾಮಯ್ಯ ಮತ್ತು ಅವರ ಪತ್ನಿ ಪಾರ್ವತಿ ಸುಮಾರು 21 ಕೋಟಿ ರೂ. ಮೌಲ್ಯದ ಚರ ಆಸ್ತಿ ಹೊಂದಿದ್ದಾರೆ. ಸಿದ್ದರಾಮಯ್ಯ ಹೆಸರಿನಲ್ಲಿ 9 ಕೋಟಿ ರೂ., ಪತ್ನಿ ಹೆಸರಲ್ಲಿ 11 ಕೋಟಿ ರೂ. ಇದೆ. ಅದೇ ರೀತಿ ಇಬ್ಬರೂ ಸುಮಾರು 29 ಕೋಟಿ ರೂ. ಮೌಲ್ಯದ ಸ್ಥಿರ ಆಸ್ತಿಯನ್ನು ಹೊಂದಿದ್ದಾರೆ.

ಸಿದ್ದರಾಮಯ್ಯ ಅವರ ಬಳಿ 9 ಕೋಟಿ ರೂ. ಸ್ಥಿರಾಸ್ತಿ ಇದ್ದರೆ, ಅವರ ಪತ್ನಿ ಸುಮಾರು 20 ಕೋಟಿ ರೂ. ಮೌಲ್ಯದ ಸ್ಥಿರಾಸ್ತಿ ಹೊಂದಿದ್ದಾರೆ. ಸಿದ್ದರಾಮಯ್ಯ ಮತ್ತು ಅವರ ಕುಟುಂಬ ಸುಮಾರು 23 ಕೋಟಿ ರೂ. ಸಾಲ ಮಾಡಿದ್ದು ತೀರಿಸಲು ಬಾಕಿ ಇದೆ.

ಮೈಸೂರಿನ ಶಾರದಾ ವಿಲಾಸ ಕಾನೂನು ಕಾಲೇಜಿನಲ್ಲಿ ಎಲ್‌ಎಲ್‌ಬಿ ಪದವಿ ಪಡೆದಿರುವ ಸಿದ್ದರಾಮಯ್ಯ ತಮ್ಮ ಆದಾಯದ ಮೂಲವಾಗಿ ವ್ಯಾಪಾರವನ್ನೂ ಉಲ್ಲೇಖಿಸಿದ್ದಾರೆ. ಅವರ ಪತ್ನಿ ವೈಎಸ್ ಡಯಾಗ್ನೋಸ್ಟಿಕ್ಸ್ ಪ್ರೈ. ಲಿಮಿಟೆಡ್ ನಿರ್ದೇಶಕರು, ಬಿಎಂಎಂಎನ್ ಎಂಟರ್‌ಪ್ರೈಸಸ್ ಮತ್ತು ಪಿ.ಆರ್.ವೈ. ಪ್ರಾಜೆಕ್ಟ್ಸ್ ನ ಪಾಲುದಾರರೆಂದು ಉಲ್ಲೇಖಿಸಲಾಗಿದೆ.