ನವೆಂಬರ್ 24ರಿಂದ ಕೃಷ್ಣನಗರಿ ಉಡುಪಿಯಲ್ಲಿ ಲಕ್ಷದೀಪೋತ್ಸವ – ಭಕ್ತರಿಗಾಗಿ ಇಲ್ಲಿದೆ ಮಾಹಿತಿ
- ಕರಾವಳಿ
- November 23, 2023
- No Comment
- 71
ನ್ಯೂಸ್ ಆ್ಯರೋ : ದ.ಕ ಜಿಲ್ಲೆಯಲ್ಲಿ ಜನರ ಅಪಾರ ನಂಬಿಕೆಯೇ ದೇವರು ಮತ್ತು ಇಲ್ಲಿ ನೆಲೆ ನಿಂತಿರುವ ದೈವಗಳ ಕಾರ್ಣಿಕ ಶಕ್ತಿ. ದೇಗುಲಗಳಲ್ಲಿ ಜರಗುವ ಜಾತ್ರಾ ಮಹೋತ್ಸವ, ರಥೋತ್ಸವ ಕಣ್ತುಂಬಿಸಿಕೊಳ್ಳುವುದೇ ಒಂದು ರೀತಿಯ ಆನಂದ. ಇದೀಗ ಉಡುಪಿಯ ಲಕ್ಷದೀಪೋತ್ಸವವು ಕೂಡಾ ಶೀಘ್ರದಲ್ಲೇ ಆರಂಭವಾಗಲಿದ್ದು ಸಿದ್ಧತೆಗಳು ಭರ್ಜರಿಯಿಂದ ಸಾಗುತ್ತಿದೆ.
ಈಗಾಗಲೇ ಕಾರ್ತಿಕ ಮಾಸ ಆರಂಭವಾಗಿದ್ದು ಎಲ್ಲೆಡೆ ದೀಪೋತ್ಸವ, ಲಕ್ಷದೀಪೋತ್ಸವದಂತಹ ಧಾರ್ಮಿಕ ಕಾರ್ಯಗಳು ಶುರುವಾಗಿದೆ.
ನಿಮಗೆಲ್ಲರಿಗೂ ತಿಳಿದಿರುವಂತೆ ದೀಪಾರಾಧನೆ, ದೀಪಾರ್ಪಣೆ, ದೀಪೋತ್ಸವಕ್ಕೆ ಕಾರ್ತಿಕ ಮಾಸವೇ ಸೂಕ್ತ ಮಾಸವಾಗಿದೆ. ವಿಷ್ಣುವಿಗೆ ಅರ್ಪಿತವೆಂದೇ ಭಾವಿಸಲಾಗುವ ಈ ತಿಂಗಳು ಶಿವದೇವರಿಗೂ ಬಲುಪ್ರಿಯ. ಶಿವ ಹಾಗೂ ಕೃಷ್ಣನ ಆರಾಧನಾ ಸ್ಥಳಗಳಲ್ಲಿ ದೀಪೋತ್ಸವ ನಡೆಸಲಾಗುತ್ತದೆ. ಅದರಲ್ಲಿ ಧರ್ನಸ್ಥಳ ದೀಪೋತ್ಸವವೂ ಒಂದು. ಇನ್ನು ಕೃಷ್ಣನಗರಿ ಉಡುಪಿ ಶ್ರೀಕೃಷ್ಣ ಮಠವೂ ಇದಕ್ಕೆ ಹೊರತಾಗಿಲ್ಲ. ಇಲ್ಲಿ ಪ್ರತೀ ವರ್ಷದಂತೆ ಈ ವರ್ಷವೂ ಅದ್ಧೂರಿಯಾಗಿ ಲಕ್ಷ ದೀಪೋತ್ಸವ ನಡೆಯಲಿದೆ.
ಈ ಬಾರಿ ಉಡುಪಿ ಲಕ್ಷ ದೀಪೋತ್ಸವ ಯಾವಾಗ..?
ಉಡುಪಿ ಶ್ರೀ ಕೃಷ್ಣ ಮಠದಲ್ಲಿ ನವೆಂಬರ್ 24ರಿಂದ 27ರವರೆಗೆ 4ದಿನಗಳ ಪರ್ಯಂತ ಲಕ್ಷದೀಪೋತ್ಸವ ನಡೆಯಲಿದೆ. ಉತ್ಥಾನ ದ್ವಾದಶಿಯಿಂದ ಹುಣ್ಣಿಮೆಯವರೆಗೆ ಲಕ್ಷದೀಪೋತ್ಸವ ನಡೆಯಲಿದ್ದು ಬಳಿಕ ರಥೋತ್ಸವ ಕೂಡಾ ಆರಂಭವಾಗುತ್ತದೆ.
ಯಾವ ರೀತಿ ಸಿದ್ಧತೆಗಳು ನಡೆಯುತ್ತಿದೆ..?
ಈಗಾಗಲೇ ಮಠದ ರಥಬೀದಿಯಲ್ಲಿ ರಥ ಕಟ್ಟುವ ಕಾರ್ಯ ಕೂಡಾ ಆರಂಭವಾಗಿದ್ದು ಲಕ್ಷದೀಪೋತ್ಸವಕ್ಕೂ ಸಿದ್ಧತೆಗಳು ಆರಂಭಗೊಳ್ಳುತ್ತಿದೆ. ದೀಪೋತ್ಸವಕ್ಕಾಗಿ ಸಿದ್ಧತೆಗಳು ಅಂತಿಮ ಹಂತದಲ್ಲಿದೆ. ರಥಬೀದಿಯ ಸುತ್ತ ಸಲಾಕೆಗಳನ್ನು ಅಳವಡಿಸಲಾಗಿದ್ದು ಇದರಲ್ಲಿ ಹತ್ತು ಸಾವಿರಕ್ಕೂ ಹೆಚ್ಚು ಹಣತೆಗಳನ್ನು ಇಡಲಾಗಿದೆ. ಪ್ರತೀ ದಿನ 25ಸಾವಿರ ಬತ್ತಿ ಹಾಗೂ 75ಲೀ ಎಳ್ಳೆಣ್ಣೆ ಬಳಸಿಕೊಂಡು ಮಠದ ಸುತ್ತಲೂ ದೀಪ ಬೆಳಗಿಸಲಾಗುತ್ತದೆ.
ಪ್ರಮುಖ ಮಠಾಧೀಶರಿಂದ ಲಕ್ಷದೀಪೋತ್ಸವಕ್ಕೆ ಹಣತೆ ಮುಹೂರ್ತ:
ಲಕ್ಷದೀಪೋತ್ಸವದ ಹಿನ್ನೆಲೆ
ನವೆಂಬರ್ 24ರ ಬೆಳಿಗ್ಗೆ ಶ್ರೀ ಕೃಷ್ಣ ಮಠದ ಪ್ರಾಂಗಣದಲ್ಲಿರುವ ತುಳಸಿಕಟ್ಟೆಯಲ್ಲಿ ತುಳಸಿ ಪೂಜೆ ನಡೆಯಲಿದೆ. ಮಧ್ಯಾಹ್ನ ಪರ್ಯಾಯ ಶ್ರೀ ವಿದ್ಯಾಸಾಗರ ತೀರ್ಥ ಸ್ವಾಮೀಜಿಯ ನೇತೃತ್ವದಲ್ಲಿ ವಿವಿಧ ಮಠಾಧೀಶರು ಲಕ್ಷದೀಪೋತ್ಸವಕ್ಕೆ ಹಣತೆ ಮುಹೂರ್ತ ನೆರವೇರಿಸಲಿದ್ದಾರೆ.