ಆಯುಷ್ಮಾನ್ ಭಾರತ್ 2.0 ಆವೃತ್ತಿಗೆ ಕೇಂದ್ರ ಸರ್ಕಾರದ ಸಿದ್ಧತೆ – ಯಾರಿಗೆಲ್ಲಾ ಉಪಯೋಗ ಇದೆ ಗೊತ್ತಾ…!?
- ಸರ್ಕಾರಿ ಸೇವೆಗಳು
- March 29, 2023
- No Comment
- 221
ನ್ಯೂಸ್ ಆ್ಯರೋ : ನರೇಂದ್ರ ಮೋದಿ ನೇತೃತ್ವದ ಭಾರತ ಸರ್ಕಾರವು ಚುನಾವಣೆಗೆ ಮುನ್ನ ಮಧ್ಯಮ ವರ್ಗದ ಜನರಿಗೆ ಹೊಸ ಉಡುಗೊರೆಯನ್ನು ತರಲು ಹೊರಟಿದೆ. ಇದುವರೆಗೆ ಬಡತನ ರೇಖೆಗಿಂತ ಕೆಳಗಿರುವ ಜನರ ಆರೋಗ್ಯವನ್ನು ಮಾತ್ರ ಒಳಗೊಂಡಿರುವ ಆಯುಷ್ಮಾನ್ ಭಾರತ್ ಯೋಜನೆಯು ಇನ್ಮುಂದೆ ಮಧ್ಯಮ ವರ್ಗದ ಜನರನ್ನ ಸಹ ಒಳಗೊಳ್ಳಲಿದೆ.
ಇದಕ್ಕಾಗಿ ಸರ್ಕಾರ ಆಯುಷ್ಮಾನ್ ಭಾರತ್ 2.0 ಆವೃತ್ತಿಯನ್ನ ಸಿದ್ಧಪಡಿಸುತ್ತಿದೆ. ಇದರಿಂದ ಭಾರತದ 40 ಕೋಟಿ ಜನರಿಗೆ ಪರಿಹಾರ ಸಿಗಲಿದೆ. ವರದಿಯ ಪ್ರಕಾರ, ಆಯುಷ್ಮಾನ್ ಭಾರತ್ ಯೋಜನೆಯ ಮಾದರಿಯಲ್ಲಿ ಹೊಸ ಯೋಜನೆಯನ್ನ ಅನುಷ್ಠಾನಗೊಳಿಸುವಲ್ಲಿ ಒಳಗೊಂಡಿರುವ ವೆಚ್ಚ ಮತ್ತು ಸವಾಲುಗಳನ್ನ ಗಮನದಲ್ಲಿಟ್ಟುಕೊಂಡು ಪ್ರಸ್ತುತ ವಿವಿಧ ಆಯ್ಕೆಗಳನ್ನ ಪರಿಶೀಲಿಸಲಾಗುತ್ತಿದೆ. ಹೀಗಾದ್ರೆ, ಆದಾಯ ತೆರಿಗೆಯಲ್ಲಿ ರಿಲೀಫ್ ನೀಡಿ ಮಧ್ಯಮ ವರ್ಗದವರಿಗೆ ಸರ್ಕಾರ ನೀಡುವ ಮತ್ತೊಂದು ಕೊಡುಗೆ ಎನ್ನಬಹುದಾಗಿದೆ.
ಸರ್ಕಾರದ ಈ ಹೊಸ ಆಯುಷ್ಮಾನ್ ಭಾರತ್ 2.0 ಆವೃತ್ತಿಯಲ್ಲಿ ಮೊದಲಿನಂತೆ 5 ಲಕ್ಷ ರೂ.ಗಳ ಕವರೇಜ್ ನೀಡುವ ಕುರಿತು ಮಾತನಾಡಲಾಗಿದೆ ಎಂದು ವರದಿಯಲ್ಲಿ ತಿಳಿಸಲಾಗಿದೆ. ಇದಲ್ಲದೆ, ವೈಯಕ್ತಿಕ ಟಾಪ್-ಅಪ್ ಆಧಾರದ ಮೇಲೆ ಅದನ್ನ ತರಲು ಮಾತುಕತೆ ನಡೆಯುತ್ತಿದೆ. ಮತ್ತೊಂದೆಡೆ, ಮತ್ತೊಂದು ಆಯ್ಕೆಯಾಗಿ, ಆರೋಗ್ಯ ವಿಮಾ ಕಂಪನಿಯನ್ನ ಯೋಜನೆಯಲ್ಲಿ ಸೇರಿಸಿಕೊಳ್ಳಬಹುದು, ಇದರಲ್ಲಿ ಕೈಗೆಟುಕುವ ವೆಚ್ಚದಲ್ಲಿ ಮೂಲಭೂತ ವೈದ್ಯಕೀಯ ರಕ್ಷಣೆಯನ್ನು ಒದಗಿಸಲು ಅವರನ್ನ ಕೇಳಲಾಗುತ್ತದೆ.
ಆಯುಷ್ಮಾನ್ ಭಾರತ್ ಯೋಜನೆಯನ್ನ ಪ್ರಧಾನಿ ನರೇಂದ್ರ ಮೋದಿ ಅವರು ಬಡವರಿಗೆ ಆರೋಗ್ಯ ಯೋಜನೆಗಳನ್ನ ಒದಗಿಸಲು ಪ್ರಾರಂಭಿಸಿದರು. ಪ್ರಧಾನ ಮಂತ್ರಿ ಆಯುಷ್ಮಾನ್ ಭಾರತ್ ಯೋಜನೆ ಅಡಿಯಲ್ಲಿ ದೇಶದ 10 ಕೋಟಿ ಕುಟುಂಬಗಳಿಗೆ ಪ್ರಯೋಜನವನ್ನ ನೀಡುವುದು ಗುರಿಯಾಗಿತ್ತು. ಈ ಯೋಜನೆಯಡಿಯಲ್ಲಿ, ಸರ್ಕಾರವು ದೇಶದ 50 ಕೋಟಿ ಜನರಿಗೆ ಉಚಿತ ಚಿಕಿತ್ಸೆಯನ್ನ ಒದಗಿಸುತ್ತದೆ. ಅಂದರೆ, 50 ಕೋಟಿ ಜನರಿಗೆ ವಾರ್ಷಿಕವಾಗಿ 5 ಲಕ್ಷ ರೂಪಾಯಿಗಳ ಆರೋಗ್ಯ ರಕ್ಷಣೆಯನ್ನ ನೀಡಲಾಗುತ್ತದೆ.