ದಳಪತಿ ವಿಜಯ್ ಸಿನಿಮಾಗೆ ಲೋಕೇಶ್ ಕನಕರಾಜ್ ಆ್ಯಕ್ಷನ್ ಕಟ್ – ಕನಕರಾಜ್ ಯೂನಿವರ್ಸ್ ಎಂಟ್ರಿಯಾಗ್ತಾರ ದಳಪತಿ..??
- ಮನರಂಜನೆ
- January 31, 2023
- No Comment
- 158
ನ್ಯೂಸ್ ಆ್ಯರೋ : ದಳಪತಿ ವಿಜಯ್ ಹಾಗೂ ರಶ್ಮಿಕಾ ಮಂದಣ್ಣ ಅಭಿನಯದ ‘ವಾರಿಸು’ ಚಿತ್ರ ವಿಶ್ವದಾದ್ಯಂತ ಯಶಸ್ವಿ ಪ್ರದರ್ಶನ ಕಂಡು ಬಾಕ್ಸ್ ಆಫೀಸ್ನಲ್ಲಿ 275 ಕೋಟಿ ಬಾಚಿತ್ತು. ಇದೀಗ, ವಿಜಯ್ ಅವರು ತಮಿಳಿನ ಹೆಸರಾಂತ ಯುವ ನಿರ್ದೇಶಕ ಲೋಕೇಶ್ ಕನಕರಾಜ್ ಅವರೊಂದಿಗೆ ಹೋಸ ಸಿನಿಮಾ ಮಾಡುವುದು ಪಕ್ಕಾ ಆಗಿದೆ. ಸದ್ಯ, ಚಿತ್ರಕ್ಕೆ ‘ದಳಪತಿ 67’ ಎಂದು ಹೆಸರಿಡಲಾಗಿದೆ.
ವಿಜಯ್ ಹಾಗೂ ಲೋಕೇಶ್ ಕನಕರಾಜ್ ಎರಡನೇ ಬಾರಿ ಒಂದಾಗುತ್ತಿದ್ದಾರೆ. ಇನ್ನೂ ಹೆಸರಿಡದ ‘ದಳಪತಿ 67’ ಸಿನಿಮಾವನ್ನು, ವಿಜಯ್ ಅವರ ಈ ಹಿಂದಿನ ಸಿನಿಮಾಗಳಾದ ‘ವಾರಿಸು ಹಾಗೂ ಮಾಸ್ಟರ್’ ಸಿನಿಮಾಗೆ ಹೂಡಿಕೆ ಮಾಡಿದ್ದ 7 ಸ್ಕ್ರೀನ್ ಸ್ಟೂಡಿಯೋಸ್ ಸಂಸ್ಥೆ ನಿರ್ಮಾಣ ಮಾಡಲಿದೆ. ಈ ನಿರ್ಮಾಣ ಸಂಸ್ಥೆ ಮೂರನೇ ಬಾರಿ ವಿಜಯ್ ಅವರೊಂದಿಗೆ ಕೈ ಜೋಡಿಸುತ್ತಿದೆ.
ಲೋಕೇಶ್ ಕನಕರಾಜ್ ‘ಮಾಸ್ಟರ್’ ಸಿನಿಮಾದ ನಂತರ ಇದೀಗ ಎರಡನೇ ಬಾರಿಗೆ ವಿಜಯ್ ಅವರಿಗೆ ಆ್ಯಕ್ಷನ್ ಕಟ್ ಹೇಳಲಿದ್ದಾರೆ. ಈ ಇಬ್ಬರ ಕೂಡುವಿಕೆಯಲ್ಲಿ ಈ ಹಿಂದೆ ಬಿಡುಗಡೆಯಾದ ‘ಮಾಸ್ಟರ್’ ಸಿನಿಮಾ ಸೂಪರ್ ಹಿಟ್ ಆಗಿತ್ತು.
ವಿಜಯ್, ಕನಕರಾಜ್ ಯೂನಿವರ್ಸ್ ಎಂಟ್ರಿಯಾಗ್ತಾರಾ?
ಕೈದಿ ಹಾಗೂ ವಿಕ್ರಮ್ ಮೂಲಕ ತಮಿಳು ಸಿನಿ ರಂಗದಲ್ಲಿ ಕನಕರಾಜ್ ಯೂನಿವರ್ಸ್ ತೆರೆದುಕೊಂಡಿದೆ. ತಮಿಳಿನ ಸ್ಟಾರ್ ನಟರಾದ ಕಮಲ್ ಹಾಸನ್, ಕಾರ್ತಿ, ಸೂರ್ಯ, ವಿಜಯ್ ಸೇತುಪತಿ ಮುಂತಾದವರು ಕನಕರಾಜ್ ಯೂನಿವರ್ಸ್ ನಲ್ಲಿದ್ದಾರೆ. ಇದೀಗ ‘ದಳಪತಿ 67’ ಮೂಲಕ ವಿಜಯ್ ಅವರ ಪ್ರವೇಶವಾಗಲಿದೆ ಎಂಬ ಮಾತುಗಳು ಕೇಳಿ ಬರುತ್ತಿವೆ. ಇನ್ನುಳಿದಂತೆ, ಈ ಸಿನಿಮಾದಲ್ಲಿ ನಟ ವಿಕ್ರಮ್ ಕೂಡ ನಟಿಸಲಿದ್ದಾರೆ ಎನ್ನಲಾಗಿದೆ.
‘ಕೈದಿ, ಮಾಸ್ಟರ್, ವಿಕ್ರಮ್ ಮತ್ತು ಬೀಸ್ಟ್ ಸಿನಿಮಾಗಳಿಗೆ ಸಂಗೀತ ಸಂಯೋಜನೆ ಮಾಡಿದ್ದ, ತಮಿಳಿನ ಮ್ಯಾಜಿಕ್ ಕಂಪೋಸರ್ ಅನಿರುದ್ಧ್ ರವಿಚಂದರ್ ‘ದಳಪತಿ 67’ ಸಿನಿಮಾಗೂ ಸಂಗೀತ ನೀಡಲಿದ್ದಾರೆ. ಇನ್ನುಳಿದಂತೆ, ಲೋಕೇಶ್ ಕನಕರಾಜ್ ಚಿತ್ರಕ್ಕೆ ನಿರ್ದೇಶನ, ಕತೆ, ಸಂಭಾಷಣೆ ಬರೆದಿದ್ದು, ಸತೀಶ್ ಕುಮಾರ್ ಅವರ ಛಾಯಾಗ್ರಹಣವಿರಲಿದೆ. ಸಿನಿಮಾ ಬಗೆಗಿನ ಇನ್ನಷ್ಟು ಅಪ್ಡೇಟ್ಸ್ ಫೆಬ್ರವರಿ 1 ಹಾಗೂ 2 ರಂದು ನೀಡಲಿದ್ದೇವೆ ಎಂದು ಈ ಹಿಂದೆ ಲೋಕೇಶ್ ಕನಕರಾಜ್ ಘೋಷಿಸಿದ್ದರು. ಸದ್ಯ ದಳಪತಿ ಫ್ಯಾನ್ಸ್ ಅಪ್ಡೇಟ್ ಗಾಗಿ ಕಾಯುತ್ತಿದ್ದಾರೆ.