Fathima Babu : ನಾನು ಯಾವ ಕಾಂಡೋಮ್ ಬಳಸುತ್ತೇನೆ ಎಂದು ಕೇಳುತ್ತೀರಾ ಎಂದು ನಟಿ ಪ್ರಶ್ನಿಸಿದ್ಯಾಕೆ?

ನ್ಯೂಸ್ ಆ್ಯರೋ‌ : ಕಲಾವಿದರ ಸಾಮಾಜಿಕ ಜಾಲತಾಣಗಳ ಖಾತೆಯಿಂದಾಗಿ ಹಲವು ಬಾರಿ ಚಿತ್ರಗಳಿಗೆ ಹೆಚ್ಚಿನ ಪ್ರಚಾರ ಸಿಗುತ್ತದೆ. ಅದಕ್ಕೆ ತಕ್ಕಂತೆ ಕಲಾವಿದರು ಕೆಲವೊಮ್ಮೆ ಪ್ರಶ್ನೋತ್ತರ ಸೆಷನ್ ನಡೆಸಿ ಅಭಿಮಾನಿಗಳ ಸಂಪರ್ಕದಲ್ಲಿರುತ್ತಾರೆ. ಆದರೆ ಹಲವು ಬಾರಿ ಅಭಿಮಾನಿಗಳು ತೀರಾ ವೈಯಕ್ತಿಕ, ಮುಜುಗರದ ಪ್ರಶ್ನೆ ಕೇಳಿ ಕಲಾವಿದರಿಗೆ ಇರಿಸು ಮುರಿಸು ಉಂಟು ಮಾಡುತ್ತಾರೆ. ಅಂತಹದ್ದೇ ಒಂದು ಸಂದರ್ಭವನ್ನು ಕಾಲಿವುಡ್ ನಟಿ ಫಾತಿಮಾ ಬಾಬು ಎದುರಿಸಿದ್ದಾರೆ.

ಇತ್ತೀಚೆಗೆ ಫಾತಿಮಾ ಸಾಮಾಜಿಕ ಜಾಲತಾಣದಲ್ಲಿ ತಮ್ಮ ಅಭಿಮಾನಿಗಳೊಂದಿಗೆ ಸಂವಾದ ನಡೆಸುತ್ತಿದ್ದರು. ಈ ವೇಳೆ ವ್ಯಕ್ತಿಯೊಬ್ಬ ಕೇಳಿದ ಪ್ರಶ್ನೆಗಳ ಸ್ಕ್ರೀನ್ ಶಾಟ್ ಅನ್ನು ಅವರು ಶೇರ್ ಮಾಡಿಕೊಂಡಿದ್ದಾರೆ.

ಮುಸ್ಲಿಂ ಆಗಿದ್ದುಕೊಂಡು ಹಿಂದೂ ವ್ಯಕ್ತಿಯನ್ನು ಮದುವೆಯಾದ ನೀವು ಮಕ್ಕಳಿಗೇಕೆ ಮುಸ್ಲಿಂ ಹೆಸರುಗಳನ್ನು ಇಟ್ಟಿದ್ದೀರಿ? ಎಂದು ಪ್ರಶ್ನಿಸಿದ್ದಾನೆ. ಇದಕ್ಕೆ ನಟಿ ಖಡಕ್ ಆಗಿ ಉತ್ತರಿಸಿ, ನನ್ನ ಮಕ್ಕಳಿಗೆ ಅವರ ಹೆಸರಿನ ಕುರಿತು ಯಾವುದೇ ಸಮಸ್ಯೆ ಇಲ್ಲ. ನಿಮಗೇನಾದರೂ ಇದರಿಂದ ತೊಂದರೆಯೇ? ಎಂದಿದ್ದಾರೆ.

ಅದಕ್ಕೆ ಅವನು ಉತ್ತರಿಸಿ, ನನಗೆ ಕೇಳಬೇಕು ಎನಿಸಿದ್ದರಿಂದ ಕೇಳಿದೆ ಎಂದನು. ಆಗ ಫಾತಿಮಾ, ನನ್ನ ಮದುವೆ ಹಿಂದೂ ವ್ಯಕ್ತಿಯ ಜೊತೆ ಮಸೀದಿಯಲ್ಲಿ ನಡೆಯಿತು. ಮುಸ್ಲಿಂ ಹೆಸರು ನಿಮಗೆ ಏಕೆ ದೊಡ್ಡ ವಿಷಯವಾಗಿದೆ? ಎಂದು ಪ್ರಶ್ನಿಸಿದ್ದಾರೆ.

ಆಗ ಆ ವ್ಯಕ್ತಿ, ಇದು ಸಾರ್ವಜನಿಕ ವೇದಿಕೆ. ನಾನು ಅನುಚಿತವಾದ ಏನನ್ನೂ ಕೇಳಲಿಲ್ಲ ಎಂದ. ಆಗ ಫಾತಿಮಾ, ಯಾವ ಸಾರ್ವಜನಿಕ ವೇದಿಕೆ? ಇದು ಸಾರ್ವಜನಿಕ ವೇದಿಕೆ ಎಂಬ ಕಾರಣಕ್ಕೆ ನಾನು ಯಾವ ಕಾಂಡೋಮ್ ಬಳಸುತ್ತೇನೆ ಎಂದು ಕೇಳುತ್ತೀರಾ? ಯಾವುದೇ ಕಾರಣಕ್ಕೂ ವೈಯಕ್ತಿಕ ವಿಚಾರ ಸಾರ್ವಜನಿಕ ವೇದಿಕೆಯಲ್ಲಿ ಚರ್ಚೆಯಾಗಬಾರದು ಎಂದು ಬುದ್ಧಿವಾದ ಹೇಳಿದರು.