ಡ್ಯಾನ್ಸ್ ಶೋ ನಲ್ಲಿ ಪೋಷಕರ ಲೈಂಗಿಕತೆ ಬಗ್ಗೆ ಮಗುವಿಗೆ ಪ್ರಶ್ನೆ – ಸೋನಿ ಪಿಕ್ಚರ್ಸ್ ನೆಟ್ವರ್ಕ್ ವಿರುದ್ಧ ನೋಟಿಸ್ ಜಾರಿ
- ಮನರಂಜನೆ
- July 28, 2023
- No Comment
- 181
ನ್ಯೂಸ್ ಆ್ಯರೋ : ಮಕ್ಕಳ ರಿಯಾಲಿಟಿ ಶೋ ಒಂದರಲ್ಲಿ ಭಾಗವಹಿಸಿದ್ದ ಮಗುವಿನ ಬಳಿ ಅಸಭ್ಯ ಹಾಗೂ ಅಶ್ಲೀಲ ಪ್ರಶ್ನೆಗಳನ್ನು ಕೇಳಿದ ಭಾಗವನ್ನು ಪ್ರಸಾರ ಮಾಡಿದ್ದಕ್ಕಾಗಿ ರಾಷ್ಟ್ರೀಯ ಮಕ್ಕಳ ಹಕ್ಕುಗಳ ರಕ್ಷಣಾ ಆಯೋಗವು ಸೋನಿ ಪಿಕ್ಚರ್ಸ್ ವಿರುದ್ಧ ನೋಟಿಸ್ ಜಾರಿ ಮಾಡಿದೆ.
ಹೌದು ರಿಯಾಲಿಟಿ ಶೋನಲ್ಲಿ ಮಗುವೊಂದಕ್ಕೆ ಜಡ್ಜ್ಗಳು ಪೋಷಕರ ಕುರಿತಾಗಿ ಅನುಚಿತ ಮತ್ತು ಲೈಂಗಿಕ ವಿಚಾರಕ್ಕೆ ಸಂಬಂಧಿಸಿದ ಪ್ರಶ್ನೆಗಳನ್ನು ಕೇಳಿದ್ದರು. ಅದರ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿತ್ತು. ಅದನ್ನು ಗಮನಿಸಿರುವ ಆಯೋಗ ಕಾರ್ಯಕ್ರಮವನ್ನು ಪ್ರಸಾರ ಮಾಡಿದ ಸೋನಿ ವಾಹಿನಿಯ ಮುಖ್ಯ ಸಂಸ್ಥೆಯಾದ ಸೋನಿ ಪಿಕ್ಚರ್ಸ್ ನೆಟ್ವರ್ಕ್ಗೆ ನೋಟಿಸ್ ಕಳುಹಿಸಿಕೊಟ್ಟಿದೆ.
ಹಾಗೆಯೇ ಆ ವಿಡಿಯೊವನ್ನು ಎಲ್ಲ ಕಡೆಗಳಲ್ಲೂ ಡಿಲೀಟ್ ಮಾಡುವಂತೆ ಸೂಚಿಸಿದ್ದು, ಆ ಕಾರ್ಯಕ್ರಮದಲ್ಲಿ ಬಾಲ ಕಲಾವಿದರಿಗೆ ಆ ರೀತಿಯ ಅನುಚಿತ ಪ್ರಶ್ನೆಗಳನ್ನು ಏಕೆ ಕೇಳಲಾಯಿತು ಎಂದು ಆಯೋಗಕ್ಕೆ ವಿವರಣೆ ನೀಡಬೇಕು ಎಂದೂ ತಿಳಿಸಲಾಗಿದೆ.
ಸೂಪರ್ ಡ್ಯಾನ್ಸರ್ 3 ಕಾರ್ಯಕ್ರಮ 2019ರಲ್ಲಿ ಪ್ರಸಾರವಾಗಿತ್ತು. ಆಗ ಕೂಡ ಈ ವಿಡಿಯೋ ಬಗ್ಗೆ ಅಸಮಾಧಾನ ವ್ಯಕ್ತವಾಗಿದ್ದರಿಂದ ಅದನ್ನು ವಾಹಿನಿ ತೆರವುಗೊಳಿಸಿತ್ತು ಎನ್ನಲಾಗಿದೆ. ಆದರೆ ಇದೀಗ ಅದೇ ವಿಡಿಯೋ ಮತ್ತೆ ಹೇಗೆ ವೈರಲ್ ಆಯಿತು ಎನ್ನುವುದರ ಬಗ್ಗೆ ಚರ್ಚೆ ಆರಂಭವಾಗಿದ್ದು, ಈ ಬಗ್ಗೆ ವಾಹಿನಿಯು ಶೀಘ್ರವೇ ಆಯೋಗಕ್ಕೆ ವಿವರಣೆಯನ್ನು ನೀಡಲಿದೆ.
ಈ ಕಾರ್ಯಕ್ರಮದಲ್ಲಿ ಶಿಲ್ಪಾ ಶೆಟ್ಟಿ, ಗೀತಾ ಕಪೂರ್ ಮತ್ತು ಅನುರಾಗ್ ಬಸು ತೀರ್ಪುಗಾರರಾಗಿದ್ದರು. ಕೋಲ್ಕತಾದ ರುಪ್ಪಾ ಬಟಾಬ್ಯಾಲ್ ಅವರು ಕಾರ್ಯಕ್ರಮದ ವಿಜೇತರಾಗಿ ಹೊರಹೊಮ್ಮಿದ್ದರು. ಈ ಸೀಸನ್ ಆದ ನಂತರ ಸೂಪರ್ ಡ್ಯಾನ್ಸರ್ 4 ನಡೆಸಲಾಯಿತು. ಅದಾದ ನಂತರ ಕಾರ್ಯಕ್ರಮವನ್ನು ಸ್ಥಗಿತಗೊಳಿಸಲಾಯಿತು.
ಇದೀಗ ಪ್ರಕರಣಕ್ಕೆ ಸಂಬಂಧಿಸಿದಂತೆ ಮಕ್ಕಳ ಆಯೋಗ ನೋಟೀಸ್ ಜಾರಿ ಮಾಡಿದ್ದು, ಮಗುವಿನ ಪೋಷಕರ ಬಗ್ಗೆ ಅನುಚಿತ ಮತ್ತು ಲೈಂಗಿಕವಾದ ಪ್ರಶ್ನೆಗಳನ್ನು ಕೇಳುವ ಮೂಲಕ ಮಕ್ಕಳ ಆಯೋಗದ ನಿಯಮವನ್ನು ಉಲ್ಲಂಘಿಸಲಾಗಿದೆ. ಈ ಬಗ್ಗೆ ಯಾವ ಕ್ರಮವನ್ನು ಕೈಗೊಂಡಿದ್ದೀರಿ ಎಂದು ಏಳು ದಿನಗಳೊಳಗೆ ಉತ್ತರಿಸುವಂತೆ ಆಯೋಗ ಹೇಳಿದೆ.