ಮರದಿಂದಲೇ ತಯಾರಿಸಿದ್ದ ಕಾರ್ ದಾಖಲೆ ಮೊತ್ತಕ್ಕೆ ಸೇಲ್ – ಸಿಟ್ರ‌ನ್ 2ಸಿವಿ ಕಾರ್ ಗೆ ಹರಾಜು ಬೆಲೆ ಎಷ್ಟು ಕೋಟಿ ಗೊತ್ತಾ?

ನ್ಯೂಸ್ ಆ್ಯರೋ‌ : ಫ್ರಾನ್ಸ್ ನಲ್ಲಿ ನೋಂದಣಿಯಾಗಿರುವ ಮರದ ಕಾರೊಂದು ದಾಖಲೆಯ ಮೊತ್ತಕ್ಕೆ ಮಾರಾಟವಾಗಿದೆ. ಮರದ ಸಿಟ್ರನ್ 2ಸಿವಿ ಕಾರು ಹರಾಜಿನಲ್ಲಿ 2.10 ಲಕ್ಷ ಪೌಂಡ್ (ಸುಮಾರು 1.86 ಕೋಟಿ ರೂ.) ಗೆ ಸೇಲ್ ಆಗಿ ಅಚ್ಚರಿ ಮೂಡಿಸಿದೆ.

ಈ ಕಾರಿನ ಬಾಡಿಯು ಸಂಪೂರ್ಣವಾಗಿ ಮರದಿಂದ ಮಾಡಲ್ಪಟ್ಟಿದೆ ಎನ್ನುವುದು ವಿಶೇಷ. ಇದನ್ನು ಸಾಮಾನ್ಯ ಕಾರಿನಂತೆ ಬಳಸಬಹುದು. ಪ್ಯಾರಿಸ್ ಮೂಲದ ವಿಂಟೇಜ್ ಕಾರು ಮತ್ತು ಮ್ಯೂಸಿಯಂ ಮಾಲಕ ಸೀನ್ ಪಾಲ್ ಫಾವಂಡ್ ಈ ಬ್ಲಾಕ್-ಫಿನಿಶ್ಡ್ ಕಾರನ್ನು ಹರಾಜಿನಲ್ಲಿ ಪಡೆದುಕೊಂಡಿದ್ದಾರೆ.

ಮೈಕೆಲ್ ರೊಬಿಲಾರ್ಡ್ 2CV ಮಾದರಿಯ ಬಾಡಿ ಮತ್ತು ಇತರ ಭಾಗಗಳನ್ನು ಮರದಲ್ಲಿ ಕೆತ್ತಿದ್ದಾರೆ. ಕಾರಿನ ಬದಿಗಳಿಗೆ ವಾಲ್‌ನಟ್ ಮತ್ತು ಚಾಸಿಸ್‌ಗೆ ಪೇರಳೆ ಮತ್ತು ಸೇವಿನ ಮರಗಳನ್ನು ಬಳಸಲಾಗಿದೆ ಎಂದು ಮೂಲಗಳು ತಿಳಿಸಿವೆ.

ಸಿಟ್ರನ್ 2CV ಮಾದರಿಯು ಈ ಹಿಂದೆ ಮಾರುಕಟ್ಟೆಯಲ್ಲಿ ಫೋಕ್ಸ್‌ವ್ಯಾಗನ್ ಬೀಟಲ್ ಕಾರಿಗೆ ಪೈಪೋಟಿಯನ್ನು ನೀಡುತ್ತಿತ್ತು. ಇದನ್ನು ನಿರ್ಮಿಸಿದ ರಾಬಿಲಾರ್ಡ್ ಇದೇ ರೀತಿಯ ಮತ್ತೊಂದು ಯೋಜನೆಯನ್ನು ಜಾರಿಗೊಳಿಸಲು ಉದ್ದೇಶಿಸಿದ್ದಾರೆ ಎನ್ನಲಾಗಿದೆ. ದಾಖಲೆ ಮೊತ್ತಕ್ಕೆ ಮಾರಾಟವಾದ ಅಪರೂಪದ ಕಾರಿನ ಚಿತ್ರಗಳು ವೈರಲ್ ಆಗಿದೆ.