ಏರ್ ಬ್ಯಾಗ್ ಕಂಟ್ರೋಲರ್ ಗಳಲ್ಲಿ ದೋಷ ಹಿನ್ನೆಲೆ – ಅಲ್ಟೊ, ಇಕೊ, ಬ್ರೆಝಾ ಸೇರಿದಂತೆ ಹಲವು ಕಾರ್ ಗಳನ್ನು ವಾಪಾಸ್ ಪಡೆದ ಸುಜುಕಿ ಕಂಪನಿ
- ಆಟೋ ನ್ಯೂಸ್
- January 22, 2023
- No Comment
- 124
ನ್ಯೂಸ್ ಆ್ಯರೋ : ಏರ್ಬ್ಯಾಗ್ ಕಂಟ್ರೋಲರ್ಗಳಲ್ಲಿನ ಸಂಭವನೀಯ ದೋಷದ ಕಾರಣದಿಂದಾಗಿ ತನ್ನ 17 ಸಾವಿರಕ್ಕೂ ಹೆಚ್ಚು ಕಾರುಗಳನ್ನು ಹಿಂಪಡೆಯುತ್ತಿರುವುದಾಗಿ ಭಾರತದ ಅತಿ ದೊಡ್ಡ ಕಾರು ತಯಾರಕ ಸಂಸ್ಥೆ ಮಾರುತಿ ಸುಜುಕಿ ಹೇಳಿದೆ.
ಡಿಸೆಂಬರ್ 8, 2022 ಮತ್ತು ಜನವರಿ 12, 2023ರ ನಡುವೆ ತಯಾರಿಸಲಾದ 17,362 ವಾಹನಗಳನ್ನು ಹಿಂಪಡೆಯುತ್ತಿರುವುದಾಗಿ ಮಾರುತಿ ಸುಜುಕಿ ಬುಧವಾರ ವಿವರ ನೀಡಿದೆ. ಕಾರುಗಳನ್ನು ಹಿಂಪಡೆಯುವ ಮೂಲಕ ಏರ್ಬ್ಯಾಗ್ ಕಂಟ್ರೋಲರ್ನ ಸಮಸ್ಯೆ ಇರುವ ಭಾಗವನ್ನು ಪರಿಶೀಲನೆ ನಡೆಸಿ ಈ ಭಾಗವನ್ನು ಬದಲಾಯಿಸಲಾಗುವುದು ಎಂದು ಮಾರುತಿ ಸುಜುಕಿ ಮಾಹಿತಿ ನೀಡಿದೆ.
ಅಪರೂಪದ ಸಂದರ್ಭಗಳಲ್ಲಿ ವಾಹನ ಅಪಘಾತವಾದಾಗ ಏರ್ಬ್ಯಾಗ್ಗಳು ಮತ್ತು ಸೀಟ್ ಬೆಲ್ಟ್ ಪ್ರಿಟೆನ್ಷನರ್ಗಳನ್ನು ಸೆನ್ಸಾರ್ಗಳು ನಿಯೋಜಿಸುವುದಿಲ್ಲ ಎಂದು ಮಾರುತಿ ಸುಜುಕಿ ಕಾರಿನಲ್ಲಿರುವ ಸಮಸ್ಯೆಯನ್ನು ವಿವರಿಸಿದೆ.
ಕಂಪನಿಯು ಹಿಂತೆಗೆದುಕೊಳ್ಳುತ್ತಿರುವ ಕಾರುಗಳು ಜನಪ್ರಿಯ ಮಾದರಿಯ ಕಾರುಗಳಾಗಿದ್ದು, ಮಾರುತಿ ಸುಜುಕಿ ಆಲ್ಟೊ ಕೆ10, ಎಸ್ – ಪ್ರೆಸ್ಸೊ, ಇಕೊ, ಬ್ರೆಝಾ, ಬಲೆನೊ ಮತ್ತು ಗ್ರ್ಯಾಂಡ್ ವಿಟಾರಾ ಮಾದರಿಗಳನ್ನು ಹಿಂಪಡೆಯುತ್ತಿರುವುದಾಗಿ ಕಂಪನಿಯು ಷೇರು ಮಾರುಕಟ್ಟೆಗೆ ಸಲ್ಲಿಸಿದ ದಾಖಲೆಗಳಲ್ಲಿ ತಿಳಿಸಿದೆ.
ಮಾರುತಿ ಸುಜುಕಿ ಈಗಾಗಲೇ ಜನವರಿ 16ರಿಂದ ಜಾರಿಗೆ ಬರುವಂತೆ ತನ್ನ ಎಲ್ಲಾ ಮಾದರಿಗಳ ಕಾರುಗಳ ಬೆಲೆಗಳನ್ನು ಸುಮಾರು ಶೇ. 1.1ರಷ್ಟು ಏರಿಕೆ ಮಾಡಿದೆ. ಹಣದುಬ್ಬರ ಮತ್ತು ಇತ್ತೀಚಿನ ನಿಯಂತ್ರಕ ಕ್ರಮಗಳಿಂದಾಗಿ ಕಾರುಗಳ ಉತ್ಪಾದನಾ ವೆಚ್ಚ ಹೆಚ್ಚಳವಾಗಿದ್ದು, ಇದರಿಂದ ವಾಹನಗಳ ಬೆಲೆ ಏರಿಕೆ ಮಾಡಿರುವುದಾಗಿ ಕಂಪನಿ ಸಮಜಾಯಿಷಿ ನೀಡಿದೆ.
ಸದ್ಯ ದೇಶೀಯ ಕಾರು ಉದ್ಯಮವು ಚೇತರಿಸಿಕೊಂಡಿದ್ದು, ಸೆಮಿಕಂಡಕ್ಟರ್ ಕೊರತೆಯು 2023ರಲ್ಲಿ ಕಡಿಮೆಯಾಗಲಿದೆ ಎಂದೂ ಮಾರುತಿ ಸುಜುಕಿ ಇಂಡಿಯಾ ಅಧ್ಯಕ್ಷ ಆರ್.ಸಿ. ಭಾರ್ಗವ ಹೇಳಿದ್ದಾರೆ.